Read Biatah Bidayuh PINANDŬNG 1 Bible Online

PINANDŬNG 1 - Biatah Bidayuh bible

PINANDŬNG 1

¹Surat ati inŭh di yŭn kayuh kayuh adi Jesus Kristus pinandŭng dog nuris. Tapa nggen di Ayŭh pinandŭng anŭ ngga kiren di bara urun-I kayuh adi re rikas jadi. Kristus bada urun-I John puan kayuh kayuh anŭ so malaikat-I adi-I pait ka ayŭh,

²ka John muko kidaan sopŭrŭg anŭ adi-i ko kiris. Ati inŭh pinganang-i pasar agah so Tapa samŭn kayuh kayuh adi dog pinandŭng Jesus Kristus.

³Sanang inŭh sianŭ adi basa surat ati, ka sanang inŭh ngara adi dingah pinganang-binabi ati ka tunda kayuh adi dog nuris darŭm surat ati! Amai tipuh-i re rikas mandŭg adi ngga sopŭrŭg kayuh ati re tambus.

⁴ So John nuju ju eklisia di utung rais Asia: Pinyirasi-mandis ngga damai mbŭh jangān so Tapa, adi madin, adi mbŭh, ka adi re mandŭg, ka so ju roh adi di jawin takta-I,

⁵ ka so Jesus Kristus, saksi adi tŭtŭd, adi sibungas dog pakat so kabŭs ka adi pimritah di tunduh raja raja di ong. Ayŭh rindu ata, ka ngga pinyikabŭs-I adi sadis Ayŭh mbŭh pirupas ata so dosa ta

⁶ ka bada ata jadi bara raja ka bituan di Tapa adi Sama-I nimun bara imam. Di Jesus Kristus bragah ngga kuasa ndŭg situi tui! Amen.

⁷ Tingga, Ayŭh mandŭg di tunduh abun! Sopŭrŭg daya re kiris Ayŭh, samŭn ngara adi ko siŭ Ayŭh. Sopŭrŭg daya di ong re muās Ayŭh. Isa-i jadi simŭnŭ!

⁸ “Aku ati adi sibungas ngga adi sikasŭn,” nang Tuhan Tapa Bisa-pŭrŭg, adi madin, adi mbŭh, ka adi re mandŭg.

⁹Aku ati John, madis ngan, ka darŭm aku adi pinunda Jesus aku sua ngga angān darŭm kinyam ngga atin tŭtŭd sangsara anŭ adi nyatŭk sinadan adi dog dapu Pinyipritah Jesus. Aku dog taran ka purau Patmos sabab aku piagah pinganang Tapa samŭn kayuh kayuh adi dog pinandŭng Jesus.

¹⁰Di andu Tuhan, Roh Kudus nguasa aku, ka aku agi dingah sirŭŭn bana, adi sak jawŭn trompet, minyu di punok ku.

¹¹Sirŭŭn anŭ nang, “Nuris kayuh adi kuu kiris, ka pait surat anŭ nuju eklisia eklisia di ju kupo ati: Ephesus, Smyrna, Pergamum, Thyatira, Sardis, Philadelphia, ka Laodicea.”

¹²Aku kimat bait tauh an puan asi daya anŭ adi minyu ngga aku, ka aku kiris ju rika-mas prita,

¹³ ka di uruk rika-mas prita anŭ agi ndi naan mun manusia, nēn jipo-ambu adi ambu ndŭg kaja-I, ka sudo-I dog marut ngga banang mas.

¹⁴ Ubok-I buda mun kapas, puan kah mun salju, ka batŭh-I bijireb mun apui;

¹⁵ kaja-I bringam mun timaga adi ko dog pibisig ka dog ngusu, ka sirŭŭn-I sak jawŭn piin ribuan.

¹⁶Ayŭh digŭng ju bitang di tangan tauh-I, ka ndi pedang adi duwŭh siid-i ruah so baba-I. Jawin-I jawa mun jawa batŭh andu yun kumbeng.

¹⁷ Kan aku kiris Ayŭh aku suman adŭp ku di kaja-I, mun adi kabŭs. Ayŭh na tangan tauh-I tama aku ka nang, “Dŭhnyah taru! Aku ati adi sibungas ngga adi sikasŭn.

¹⁸Aku ati adi udip! Aku ko kabŭs, pak madin aku ati udip adu adu. Aku biyŭn kuasa di tunduh pinyikabŭs ka di tunduh ong daya adi mbŭh kabŭs.

¹⁹Nuris meh, kayuh adi kuu kiris, kayuh adi madin ngga kayuh adi re sundis jadi.

²⁰Ati inŭh rati adi bisukan yŭn ju bitang adi kuu kiris di tangan tauh Ku, samŭn yŭn ju rika-mas prita anŭ: ju bitang inŭh rati-i ju malaikat eklisia, ka ju rika prita inŭh rati-i ju eklisia.