Read Biatah Bidayuh PINANDŬNG 10 Bible Online

PINANDŬNG 10 - Biatah Bidayuh bible

PINANDŬNG 10

¹Ripas anŭ aku kiris dinge ndi naan malaikat adi bikuasa mūn so shorga. Ayŭh dog kirurung abun ka agi ujen-bukang di sambu ubak-i. Jawin-i mun batŭh andu, ka kaja-i mun tŭngŭn apui.

²Ayŭh agi anak surat-barun di tangan-i. Ayŭh na kaja tauh-i di rawŭt ka kaja bait-i di deyŭh.

³Ayŭh bagan ngga sirŭŭn bana adi sak jawŭn dudu singah ngŭr. Ripas ayŭh bagan, ju dudū nam ngga jawŭn-i.

⁴Darŭm ngara minyu, aku rasu re piguru nuris. Pak aku dingah sirŭŭn minyu so shorga, “Sukan adŭ kayuh adi ju dudū ko nang; dŭhnyah nuris-i!”

⁵ Komŭnŭ malaikat adi aku kiris mijog di rawŭt ngga di deyŭh pakat tangan tauh-i ka shorga

⁶ka bipayu ngga adŭn Tapa, adi udip adu adu, adi napa rangit, ong, ka rawŭt, samŭn sopŭrŭg kayuh adi agi dieh. Malaikat anŭ nang, “Dŭhsah tia kajŭn tipuh-i!

⁷Pak di andu malaikat anŭ adi numbor ju mambak trompet-i, Tapa re ngamas atur pinyiraan-I adi tian ti taŭn mbŭh rusia-I, adi-I ko kidaan di urun-I bara nabi.”

⁸ Komŭnŭ sirŭŭn adi aku ko dingah minyu so shorga nang di aku dinge, “Panu di tambit surat-barun anŭ adi tiburai so tangan malaikat anŭ adi mijog di rawŭt ngga di deyŭh.”

⁹Aku di tudu malaikat anŭ ka mite surat-barun adi siit anŭ. Ayŭh nang di aku, “Tambit ka man-i; ayŭh re masŭm darŭm tain mu, pak di baba mu ayŭh re nyibanyis nyam ju banyis.”

¹⁰Aku tambit surat-barun adi siit anŭ so tangan-i ka man-i; ayŭh nyibanyis nyam ju banyis di baba ku. Pak ripas aku tŭrŭn-i, ayŭh marui masŭm darŭm tain ku.

¹¹Ka aku dog kidaan, “Kuu dŭh siŭn dŭh piagah dinge agah so Tapa pasar barang rais, barang bangsa, piminyu, ka raja raja.”