Read Biatah Bidayuh PINANDŬNG 14 Bible Online

PINANDŬNG 14 - Biatah Bidayuh bible

PINANDŬNG 14

¹ Komŭnŭ aku tingga, ka diginŭ agi Anak Biri mijog di Sandah Zion; ngga Ayŭh agi 144,000 daya adi biyŭn adŭn-I ngga adŭn Sama-I dog nuris di arŭ ngara.

²Ka aku dingah sirŭŭn so shorga adi sak jawŭn piin ribuan, sak jawŭn dudū. Ayŭh sak ragu dog mambak ngga kachapi.

³144,000 naan daya mijog nura takta, pat dāng udip, ka bara nyamba; ngara biragu nang ragu bauh, adi ngara sadi adŭ bisa birajar. So ndi rayat rayat manusia ngara sadi adŭ adi mbŭh dog nyiramat.

⁴Ngara inŭh bara dari adi bŭn kinais adŭp ngara ngga dayung; ngara daya tibŭn. Ngara tunda Anak Biri ka barang yŭn-i panu. Ngara mbŭh dog nubos so rayat manusia adi bŭkŭn ka mbŭh adi sibungas dog jugan ka Tapa ngga Anak Biri.

⁵ Ngara bŭn nang piminyu kadong; ngara dŭh biyŭn sarah.

⁶Komŭnŭ aku kiris malaikat adi bŭkŭn mikabur bigatung di rangit, taban Agah Kana adi tan adu adu re-i piagah ka manusia di ong, ka barang bangsa, tibaran-asar, piminyu, ka rais.

⁷Ayŭh nang ngga sirŭŭn bana, “Stabi di Tapa ka muji bragah-I! Amai tika-i mbŭh mandŭg adi ngga-I nggen bisara di sopŭrŭg daya. Nyambah Ayŭh adi napa rangit, ong, rawŭt, ka atak atak piin!”

⁸ Malaikat adi numbor duwŭh tunda adi diŭ, nang, “Ayŭh mbŭh rabu! Babylon adi bās mbŭh rabu! Ayŭh bada sopŭrŭg daya nok wain-i, wain-i adi bisā, anŭ inŭh pingandai kais!”

⁹Ndi naan dinge malaikat adi numbor taruh tunda ngara duwŭh adi diŭ, nang ngga sirŭŭn bana, “Ngara adi nyambah dāng anŭ ngga tibudo-i ka kambat tandā di arŭ ngara puan kah di tangan ngara

¹⁰ re nok wain Tapa, wain baji-I, adi-I ko bandar ren darŭm makuk baji-I! Sopŭrŭg adi bada Ayŭh baji re dog pijera darŭm apui ngga mirirang di sirung jawin malaikat kudus ngga Anak Biri.

¹¹ Asuh apui adi pijera ngara adu adu maad ka rangit. Re mating rŭŭ sandu bait singarŭm yŭn ngara adi nyambah dāng anŭ samŭn tibudo-i, ngara adi biyŭn tandā dŭn-i.”

¹²Sirati-i bara daya adi Tapa mbŭh mien dŭh siŭn dŭh an biyŭn pinyitŭtŭd atin, ngara adi sita Pinyipesan Tapa ka adi tŭtŭd di Jesus.

¹³Komŭnŭ aku dingah sirŭŭn so shorga nang, “Nuris ati: So madin, sanang inŭh ngara adi kabŭs darŭm ngara bituan di Tuhan!” “Manŭn sawŭ!” nam Roh Kudus. “Ngara re rŭŭ so kraja jera ngara, amai ngara re dog ngupah sabab pingandai kana ngara.”

¹⁴ Komŭnŭ aku tingga ka kiris abun buda, ka guru di abun anŭ agi mun manusia pakai makota mas di ubak-I ka gayang di tangan-I.

¹⁵ Komŭnŭ malaikat adi bŭkŭn ruah so Ramin Tapa ka nang ngga sirŭŭn bana di sianŭ adi guru di abun, “Pakai gayang Mai ka ngatŭm meh, sabab tika-i mbŭh mandŭg; ong mbŭh sukup masak yŭn dog ngatŭm!”

¹⁶Jadi sianŭ adi guru di abun ngibas gayang-i di ong, ka buwa pingatŭm di ong mbŭh dog sun.

¹⁷Komŭnŭ aku kiris malaikat adi bŭkŭn ruah so Ramin Tapa di shorga; ayŭh gŭh biyŭn gayang adi reja.

¹⁸Komŭnŭ malaikat adi bŭkŭn dinge, adi jaga apui, mandŭg so mija-sambah. Ayŭh nyirais ngga sirŭŭn bana nang di malaikat adi digŭng gayang adi reja, “Pakai gayang mu, ka ngatŭm buwa buwa anggor so teya anggor di ong, sabab-i mbŭh masak!”

¹⁹Jadi malaikat anŭ ngibas gayang-i di ong, kapŭg buwa buwa anggor so daan-i, ka ren-i ka darŭm yŭn mŭ-i, anŭ inŭh baji Tapa.

²⁰ Buwa buwa anggor dog mŭ di tarun yŭn-i dog mŭ di sapa kupo, deya ruah so nŭ ka paman mun uba, taruh ratus kilomita jo-i ka agi duwŭh mita tŭrŭp-i.