Read Biatah Bidayuh PINANDŬNG 18 Bible Online

PINANDŬNG 18 - Biatah Bidayuh bible

PINANDŬNG 18

¹Ko anŭ aku kiris agi dinge malaikat adi bŭkŭn mūn so shorga. Ayŭh biyŭn kuasa bās, ka sangŭn-i nyekar di ndi ong ong.

² Ayŭh nyirais nang ngga sirŭŭn bana: “Ayŭh mbŭh rabu! Babylon adi bās mbŭh rabu! Ayŭh madin mbŭh jadi yŭn pinyirŭŭ umot ngga roh kais. Barang masam manuk adi kais ngga adi tiru daya dieh rŭŭ darŭm ayŭh.

³ Amai sopŭrŭg bangsa mbŭh nok wain-i, wain-i adi bisā, anŭ inŭh, pingandai kais-i. Raja raja di ong ndai pingandai kais ngga ayŭh, ka bara daya dagang mbŭh jadi kaya so pingandai kais-i adi dŭh ko ko.”

⁴ Komŭnŭ aku dingah dinge sirŭŭn so shorga, nang, “Ruah meh, bara daya Ku! Ruah so ayŭh! Angān dŭh siŭn sua ndai dosa adi-i ndai; dŭh angān patut sua dog ukum ngga ayŭh!

⁵ Amai dosa-i mbŭh bitugung ndŭg rangit, ka Tapa ingat kayuh arap adi-i ko ndai.

⁶ Ndai di ayŭh nimun ayŭh ko ndai di angān; maras ayŭh piduwŭh rupet yŭn sopŭrŭg anŭ adi ayŭh mbŭh ndai. Ngisi makuk-i ngga nok adi piduwŭh kari bisā so nok adi-i ko nggen di angān.

⁷ Nggen di ayŭh sangsara ngga pinyusah brinyam ngga bragah ka sangŭn adi-i nggen di adŭp-i. Amai ayŭh dŭh ko ko nang di adŭp-i: ‘Aku rani adi mritah! Aku dŭh dayung uban, Aku dŭh re kinyam pinyusah!’

⁸Sabab anŭ meh, darŭm ndi andu ayŭh re dog nyatŭk susah-bās mun andam, pinyusah, ka apag. Ayŭh re dog badang ngga apui, sabab Tuhan Tapa, adi nggen bisara di ayŭh, inŭh bikuasa.”

⁹ Raja raja di ong adi ko ndai arap ka pingandai kais ngga ayŭh re sien ka muās kupo anŭ kan ngara kiris asuh so jireb apui adi man ayŭh.

¹⁰Ngara mijog tingga so jo, sabab ngara taru ka dŭh an sua kinyam sangsara-i. Ngara nang, “Mbŭh raru payah! Mbŭh tadah gŭh! Kupo Babylon adi ko raru timagah! Darŭm ndi jam adŭ kuu mbŭh dog ukum!”

¹¹ Bara daya dagang di ong gŭh sien ka muās ayŭh, sabab mating daya tia miris kayuh dagang ngara.

¹² mating daya tia miris so ngara mas, pirak, batuh adi brega, ka mutiara. Kayuh dagang ngara, mun banang linen, banang adi bēng, banang sutera, banang adi takod bireh-i; barang masam kayuh ramu, ka barang masam kayuh adi dog ndai so bŭbŭt gajah so kayuh adi saruh puan kah so timaga, so basi, ka mabel;

¹³samŭn kurit kurit kayuh adi buuh ramak, rapah, dawŭn dawŭn kayuh adi buuh ramak, myrrh, ka kimanyan; wain ngga inyo, tibaduk ngga gandom, sapi ngga biri, kuda ngga krita kuda, daya urun ngga asŭng manusia.

¹⁴Bara daya dagang anŭ nang di ayŭh, “Sopŭrŭg kayuh adi kuu gruwŭn an biyŭn mbŭh miyap, ka sopŭrŭg pinyikaya mu ngga sangŭn mu mbŭh mating; kuu dŭh re tia dapŭd-i!”

¹⁵ Bara daya dagang, adi mbŭh kaya so dagang ngara di kupo anŭ, re mijog so jo, sabab ngara taru ka dŭh an sua kinyam sangsara-i. Ngara re sien ka muās,

¹⁶nang, “Mbŭh payah! Mbŭh tadah gŭh kupo bās anŭ! Ayŭh adi ko ngabuh adŭp-i ngga banang linen, adi bēng, ka adi takod bireh, ka muno adŭp-i ngga pimakai mas, batuh adi brega, ka mutiara!

¹⁷ Ka darŭm ndi jam sopŭrŭg pinyikaya-i anŭ mbŭh mating!” Sopŭrŭg pingubak kapar ngga bara pinupang-i, bara adi pimanu kapar ngga sopŭrŭg adi nyiraja kudip adŭp-i di rawŭt, mijog so jo,

¹⁸ nyirais nang darŭm ngara kiris asuh so jireb apui adi man ayŭh: “Gi-mating kupo bās mun ati!”

¹⁹ Ngara taran dabu di ubak-i, ngga nandā adŭp-i ngurid, ka muās, nang, “Mbŭh payah! Mbŭh tadah gŭh kupo bās anŭ! Ayŭh inŭh kupo di yŭn sopŭrŭg daya adi birayar di rawŭt dapŭd kaya so pinyikaya-i! Darŭm ndi jam sopŭrŭg kayuh-i mbŭh manyap!”

²⁰ Gaŭn meh, shorga, sabab pinyirubuh-i! Gaŭn meh, bara daya adi Tapa mbŭh mien ngga bara pinyuruh ka bara nabi, amai Tapa mbŭh nunggu ayŭh sabab kayuh adi-i ko ndai di angān!

²¹ Komŭnŭ agi ndi malaikat adi bikuasa pakat tibande batuh mati batuh kisar ka taran-i ka rawŭt, nang, “Simŭnŭ inŭh kupo bās Babylon re dog taran ka dŭh re tia dog kiris.

²² Jawŭn kachapi ngga sirŭŭn manusia, ka jawŭn tirari ngga trompet, re dŭh tia dog dingah darŭm kuu! Daya adi ndai tadŭ masam dagang re mating tia darŭm kuu; ka jawŭn batuh kisar re mating tia!

²³Mating gŭh jawa prita re dog kiris darŭm kuu dinge; mating tia sirŭŭn bara pingaten dayung ngga pingaten dari dog dingah darŭm kuu dinge! Daya dagang mu ko adi siabo bikuasa di ndi ong ong, ka ngga pingandai biruri karŭm mu kuu ko nyibudo sopŭrŭg daya di ong!”

²⁴ Babylon dog ukum sabab deya nabi ngga deya bara daya adi Tapa mbŭh mien mbŭh dog dapŭd darŭm-i. Sawŭ, deya sopŭrŭg daya adi dog siŭ di ong.