Read Biatah Bidayuh PINANDŬNG 2 Bible Online

PINANDŬNG 2 - Biatah Bidayuh bible

PINANDŬNG 2

¹“Nuris surat ati nuju malaikat eklisia di Ephesus: “Ati inŭh agah so sianŭ adi digŭng ju bitang di tangan tauh-I ka adi panu di uruk ju rika-mas prita.

²Aku puan kayuh adi kuu ko ndai; Aku puan munki masam kuu bandar nyiraja ka munki masam tŭtŭd-i kuu nan pinyusah. Aku puan nang kuu dŭh suka daya adi arap ka mbŭh suba ngara adi nang adŭp-i pinyuruh pak sibandar-i dŭh; kuu mbŭh puan nang ngara daya pingadong.

³Kuu tŭtŭd, kuu mbŭh sangsara sabab Aku, pak kuu dŭh jimŭ.

⁴Pak ati kayuh adi yŭn Ku nyarah kuu: kuu dŭh rindu Aku mun dawŭ-i.

⁵Suba kira munki masam kuu mbŭh rabu! Dŭh tia bidosa pak ndai nimun dawŭ-i di andu kuu babŭ sabah di Aku. Kambŭi dŭh, Aku re mandŭg ka kuu ka tambit rika prita mu so tarun yŭn-i.

⁶Pak ati pinyikana mu: kuu tiru di pingandai bara pinunda Nicolaitan, batur mun Aku gŭh.

⁷ “Ayŭh adi biyŭn kajit, dingah meh garang kayuh adi Roh Kudus nang di barang eklisia! “Di ngara adi mbŭh manang Aku re nggen hak da man buwa so tŭngŭn kayuh adi nggen udip, adi timbu di teya Tapa.

⁸ “Nuris surat ati nuju malaikat eklisia di Smyrna: “Ati inŭh agah so sianŭ adi sibungas ngga adi sikasŭn, adi kabŭs ka adi udip dinge.

⁹Aku puan pinyusah mu; Aku puan kuu sirata, pak kuu sawŭ kaya! Aku puan pinganang arap adi daya nang maka kuu. Ngara nang adŭp-i daya Jahudi pak sibandar-i dŭh. Ngara inŭh tibaran adi dog dapu Shetan!

¹⁰Dŭhnyah taru kayuh adi re bada kuu sangsara. Ingat! Siarap re taran kada so bara mu ka darŭm jer ngga suba kuu, ka kuu re susah sitian simŭng andu. Tŭtŭd meh darŭm Aku, sunggu kuu dog siŭ bait kani, ka Aku re nggen di kuu udip adi sawŭ adi tan adu adu ndu upah pimanang mu.

¹¹ “Ayŭh adi biyŭn kajit, dingah meh garang kayuh adi Roh Kudus nang di barang eklisia! “Ngara adi mbŭh manang dŭh re kinaman da pinyikabŭs adi numbor duwŭh.

¹²“Nuris surat ati nuju malaikat eklisia di Pergamum: “Ati inŭh agah so sianŭ adi biyŭn pedang adi duwŭh siid-i reja.

¹³Aku puan diki kuu rŭŭ, diginŭ di yŭn takta Shetan. Kuu bijijŭ ngga Aku, ka pinyabah mu di Aku bŭn kuu pasan, sawŭ ndŭg ka andu adi ngga Antipas, saksi Ku adi tŭtŭd, dog siŭ diginŭ di yŭn Shetan rŭŭ.

¹⁴ Pak agi kada kayuh adi yŭn Ku nyarah kuu: agi kada so bara mu adi mbŭh tunda ajar Balaam, adi ko ngajar Balak munki ayŭh dapŭd nguru daya Israel da bidosa darŭm-i mujuk ngara da man pinguman adi ko dog jugan ka tibudo buang da ndai urah adi dŭh tatu darŭm pingandai kais.

¹⁵Simŭnŭ gŭh di dupan bara mu agi adi mbŭh tunda ajar Nicolaitan.

¹⁶Marik pimudip mu pari ka Tapa! Kambŭi dŭh, Aku re rikas mandŭg ka yŭn mu ka rawan ngara ngga pedang adi ruah so baba Ku.

¹⁷ “Ayŭh adi biyŭn kajit, dingah meh garang kayuh adi Roh Kudus nang di barang eklisia! “Di ngara adi mbŭh manang Aku re nggen kada manna adi bisukan. Aku re nggen gŭh di barang naan ngara batuh buda di yŭn agi dog nuris dŭn bauh adi mating daya puan adŭ-i sianŭ adi kambat-i.

¹⁸“Nuris ka malaikat eklisia di Thyatira: “Ati inŭh agah so Anak Tapa, Ayŭh adi bijireb batŭh-I, Ayŭh adi bringam kaja-I mun timaga ko dog ngusu.

¹⁹Aku puan kayuh ndai mu. Aku puan pinyirindu mu, atin tŭtŭd mu, kraja pingandai mu, ka atin sabar mu. Aku puan kuu mbŭh ndai rabis so adi mbŭh.

²⁰ Pak ati inŭh kayuh adi yŭn Ku nyarah kuu: kuu nurut dayung anŭ adi dŭn Jezebel, adi kadŭn adŭp-i pinyisung Tapa. Ngga ajar-i ayŭh kinanyap bara urun Ku ka darŭm pimudip adi dŭh tatu darŭm pingandai kais ka man pinguman adi ko dog jugan ka tibudo.

²¹Aku mbŭh nggen di ayŭh tipuh yŭn-i ngubah adŭp-i ka dŭh tia bidosa, pak ayŭh abah pasan kraja pingandai kais-i anŭ.

²²Jadi Aku meh re na ayŭh di pangō di yŭn-i ngga ngara adi tanggah ngga ayŭh re kinyam sangsara. Aku re ndai simŭnŭ di ngara kambŭi ngara dŭh ko ndai pingandai kais anŭ ngga ayŭh.

²³ Aku re siŭ bara pinunda-i gŭh, ka komŭnŭ sopŭrŭg eklisia re puan nang Aku ati inŭh sianŭ adi puan sopŭrŭg pikir-kira ngga pinyiraan manusia. Aku re maras barang naan so bara mu nanyam ka pingandai adŭp ngara.

²⁴“Pak bara mu adi bŭkŭn di Thyatira mating tunda ajar adi arap anŭ; kuu mating birajar kayuh adi ngara bŭkŭn kadŭn ‘Rusia bās Shetan.’ Aku nang di kuu Aku dŭh re nanuh kuu ngga pinyipesan adi bŭkŭn.

²⁵Pak ndŭg ka Aku mbŭh mandŭg, kuu dŭh siŭn dŭh an bidigŭng tagap di anŭ adi kuu mbŭh biyŭn.

²⁶ Nuju ngara adi mbŭh manang, adi bijijŭ ndŭg sikasŭn-i ndai kayuh adi Aku raan, Aku re nggen kuasa anŭ adi Aku mbŭh kambat so Sama Ku: Aku re nggen di ngara kuasa di tunduh barang bangsa, da mritah-i ngga sikud basi ka da mape pirandŭk-i mun tipayan tana. Aku gŭh re nggen di ngara bitang isan isan.

²⁹“Ayŭh adi biyŭn kajit, dingah meh garang kayuh adi Roh Kudus nang di barang eklisia!