Read Biatah Bidayuh PINANDŬNG 20 Bible Online

PINANDŬNG 20 - Biatah Bidayuh bible

PINANDŬNG 20

¹Komŭnŭ aku kiris malaikat mūn so shorga, digŭng kusi rasan ong ka parik basi adi bat.

² Ayŭh nakap naga anŭ, jippŭh adi jah. Jippŭh anŭ inŭh Siarap, puan kah Shetan, ka muak ayŭh sitian siribu sawa.

³Malaikat anŭ taran ayŭh ka rasan ong, ngusi ka ngabŭt-i, isa ayŭh dŭh tia nipu barang bangsa ndŭg ka siribu sawa mbŭh ripuan. Ripas anŭ ayŭh re dog piruah nyitiro.

⁴ Komŭnŭ aku kiris takta takta, ka sopŭrŭg adi guru dieh dog nggen kuasa ngga nggen bisara. Aku kiris gŭh simangi ngara adi ko dog nggen ukum kabŭs sabab ngara piagah ajar adi sawŭ adi Jesus ko pinandŭng ka sabab ngara ngajar pinganang Tapa. Ngara mating nyambah dāng anŭ bait tibudo-i, dŭh gŭh kambat tandā dāng anŭ di arŭ puan kah di tangan ngara. Ngara udip dinge ka keya ka raja mritah ngga Kristus sitian siribu sawa.

⁵(Adi bŭkŭn adi mbŭh kabŭs dŭh udip dinge ndŭg ka siribu sawa mbŭh ripuan.) Ati inŭh sibungas pinyimakat daya so kabŭs.

⁶Sanang ka raru biberkat inŭh ngara adi sua di sibungas pinyimakat so kabŭs anŭ. Pinyikabŭs adi numbor duwŭh dŭh biyŭn kuasa di tunduh ngara; ngara re jadi imam Tapa ngga Kristus, ka re mritah ngga Ayŭh sitian siribu sawa.

⁷Kan siribu sawa mbŭh ripuan, Shetan re dog piruah so yŭn-i dog kurung.

⁸ Ayŭh re ruah di nipu barang bangsa adi papar sasah di ndi ong ong, anŭ inŭh, Gog ngga Magog. Shetan re taban sopŭrŭg ngara ngga biperang; sikiang tungang-i taban kiang dudu sumat di pang rawŭt.

⁹Ngara kutung adŭp-i di ndi ong ong ka kirurung bari bari bara daya adi Tapa mbŭh mien, samŭn kupo adi Tapa rindu. Pak apui mūn so shorga ka pirabur ngara.

¹⁰Komŭnŭ Siarap, adi nipu ngara, dog taran ka darŭm danu apui ngga mirirang, di yŭn dāng anŭ ngga nabi kadong anŭ dog taran. Diginŭ ngara re dog pijera sandu singarŭm ndŭg situi tui.

¹¹ Komŭnŭ aku kiris takta bās adi buda ngga sianŭ adi guru dieh. Ong ngga rangit babak bu so sirung jawin-I ka dŭh tia dog kiris.

¹²Ka aku kiris bara adi mbŭh kabŭs, bās ngga adi sŭ, mijog nura takta. Surat surat dog kuka, ka agi dinge dog kuka gŭh, surat di yŭn dŭn bara daya adi Tapa mbŭh mien dog nuris. Bara adi mbŭh kabŭs dog bisara nanyam ka pingandai ngara, nimun adi mbŭh dog nuris di surat surat anŭ.

¹³Komŭnŭ rawŭt piruah daya adi mbŭh kabŭs darŭm-i. Pinyikabŭs ngga Sibayan gŭh piruah jangi daya adi mbŭh kabŭs. Ka sopŭrŭg bisara nanyam ka pingandai ngara.

¹⁴Komŭnŭ Pinyikabŭs ngga Sibayan dog taran ka darŭm danu apui anŭ. (Danu apui ati inŭh pinyikabŭs adi numbor duwŭh.)

¹⁵Ngara adi dŭh biyŭn dŭn-i dog nuris darŭm surat di yŭn dŭn bara daya adi Tapa mbŭh mien dog nuris, dog taran ka darŭm danu apui anŭ.