Read Biatah Bidayuh PINANDŬNG 21 Bible Online

PINANDŬNG 21 - Biatah Bidayuh bible

PINANDŬNG 21

¹ Komŭnŭ aku kiris rangit bauh ngga ong bauh. Rangit adi diŭ ngga ong adi diŭ mbŭh manyap, ka rawŭt ani.

² Ka aku kiris Kupo Kudus, anŭ inŭh Jerusalem adi bauh. Ayŭh mūn so shorga so Tapa, mbŭh dog ngatur ka dog sidia mun pingaten dayung re bidapŭd ngga banŭh-i.

³ Aku dingah sirŭŭn minyu so takta anŭ: “Madin Tapa rŭŭ ngga bara daya! Ayŭh re rŭŭ ngga ngara, ka ngara re jadi bara daya-I. Adŭp Tapa re agi ngga ngara, ka Ayŭh re jadi Tapa ngara.

⁴ Ayŭh re ngutos randang batŭh ngara. Re mating tia pinyikabŭs, re mating tia pinyusah, sien bait sangsara. Kayuh adi amba mbŭh miyap.”

⁵Komŭnŭ sianŭ adi guru di tunduh takta nang, “Madin meh Aku bada sopŭrŭg kayuh bauh!” Ayŭh gŭh nang di aku, “Nuris ati, sabab pinganang ati agi sawŭ buang bisa dog sabah.”

⁶ Ka Ayŭh nang, “Mbŭh kamas! Aku ati adi sibungas ngga adi sikasŭn, adi puun ngga adi pimungan. Di ngara adi aus Aku re nggen piin nok adi mandŭg so atak piin adi nggen udip, dŭh bibayar.

⁷ Ngara adi manang re dapŭd ati so Aku: Aku re jadi Tapa ngara, ka ngara re jadi bara anak Ku.

⁸Pak ngara adi pinakut, adi nyipunok Jesus, adi sembar, adi pinyiŭ, adi udip darŭm pimudip adi dŭh tatu darŭm pingandai kais, adi ndai biruri karŭm, adi nyambah tibudo, samŭn sopŭrŭg adi pingadong; tarun yŭn ngara inŭh danu anŭ adi bijagu ngga apui ka mirirang, anŭ inŭh pinyikabŭs adi numbor duwŭh.”

⁹Ndi so malaikat anŭ adi ju naan adi biyŭn ju makuk brisi ngga ju masam sikasŭn susah-bās mandŭg ka aku ka nang, “Kamati, aku re kiren di kuu Pingaten Dayung, adi sawŭn Anak Biri.”

¹⁰ Roh Kudus nguasa aku, ka malaikat anŭ taban aku ka tibung ndi darŭd adi bigatung. Ayŭh kiren di aku Jerusalem, Kupo Kudus, mūn so shorga so adŭp Tapa

¹¹buang-i nyirinyak ngga bragah Tapa. Kupo anŭ nyirinyak mun batuh adi brega, mun batuh jasper adi tanis mun kristal.

¹² Sindung Kupo anŭ tabar buang bigatung, agi simŭng-duwŭh tiban ngga simŭng-duwŭh malaikat adi jaga-i. Di barang tiban anŭ agi dog nuris dŭn simŭng-duwŭh tibaran-asar daya Israel.

¹³Di tiap parad agi taruh tiban: taruh tura ka timor, taruh tura ka siratan, taruh tura ka utara, ka taruh tura ka barat.

¹⁴Sindung kupo anŭ dog pijog di tunduh simŭng-duwŭh batuh pinagap-rasan, di yŭn dog nuris dŭn bara pinyuruh Anak Biri adi simŭng-duwŭh naan.

¹⁵ Malaikat adi minyu ngga aku biyŭn ndi sikud pingŭkŭd adi dog ndai so mas, ngga ngŭkŭd kupo anŭ, tiban tiban-i, ka sindung-i.

¹⁶Kupo anŭ mbŭh sukup misagi-i, darŭm buka ngga ambu-i. Malaikat anŭ ngŭkŭd kupo anŭ ngga sikud pingŭkŭd anŭ: ambu-i, 2,400 kilomita; ambu, buka ka bigatung-i agi samah.

¹⁷Malaikat anŭ ngŭkŭd gŭh sindung, ka-i agi nŭm puru mita bigatung,[7] nunda ka pingŭkŭd adi kanyet ka patut daya pakai.

¹⁸ Sindung anŭ dog ndai so batuh jasper, ka adŭp kupo anŭ dog ndai so tigŭrŭ mas adi tanis mun siramin.

¹⁹Batuh batuh pinagap-rasan sindung kupo dog ngabuh ngga barang masam batuh adi brega. Sibungas batuh pinagap-rasan anŭ inŭh jasper, adi numbor duwŭh batuh nilam, adi numbor taruh batuh akek, adi numbor pat batuh zamrud,

²⁰adi numbor rimŭh batuh oniks, adi numbor nŭm batuh akek bireh, adi numbor ju batuh kuarza sia, adi numbor mai batuh beril, adi numbor prii batuh topaz, adi numbor simŭng batuh kalsedoni, adi numbor simŭng-ndi batuh firus, ka adi numbor simŭng-duwŭh batuh kecubung.

²¹Simŭng-duwŭh tiban anŭ mbŭh simŭng-duwŭh mutiara; tiap tiban dog ndai so tigŭrŭ mutiara. Aran kupo mbŭh tigŭrŭ mas, sinau mun siramin.

²²Aku mating kiris ramin simayang di kupo anŭ, amai ramin simayang inŭh Tuhan Tapa Bisa-pŭrŭg ngga Anak Biri.

²³ Kupo anŭ dŭh biguna di jawa batŭh andu puan kah jawa buran, sabab bragah Tapa nyirinyak dieh, ka Anak Biri mbŭh prita-i.

²⁴ Bara daya di ong re udip pakai jawa-i, ka bara raja di ong re taban pinyikaya ngara ka darŭm-i.

²⁵ Tiban tiban kupo anŭ re tikuka ndi andu andu; dŭhsah-i dog tŭŭp, sabab mating singarŭm diginŭ.

²⁶Bragah ngga pinyikaya so barang bangsa re dog taban ka darŭm kupo anŭ.

²⁷ Pak mating kayuh adi sembar re bisa mŭrŭt ka darŭm kupo anŭ; dŭh gŭh daya adi ndai kayuh adi taban mangŭh puan kah daya pingadong re bisa mŭrŭt ka darŭm-i. Kaŭs-i ngara, adi dog nuris dŭn-i di surat Anak Biri di yŭn dŭn bara daya adi Tapa mbŭh mien dog nuris, bisa mŭrŭt kamanŭ. Surat anŭ inŭh surat dŭn bara Daya adi dog dapu Tapa.