Read Biatah Bidayuh PINANDŬNG 22 Bible Online

PINANDŬNG 22 - Biatah Bidayuh bible

PINANDŬNG 22

¹ Malaikat anŭ gŭh kiren di aku sungi adi nggen piin udip, adi bringam mun kristal. Piin anŭ aman so takta Tapa ngga takta Anak Biri

² ka aman di yun aran raya di kupo. Di so-duwŭh parad sungi anŭ agi tŭngŭn kayuh adi nggen udip, adi buān simŭng-duwŭh kari darŭm ndi sawa, anŭ inŭh ndi buran ndi sidah. Dawŭn-i bisa dog pakai ngga pibua barang bangsa.

³ Mating kayuh adi ko dog pangu Tapa tungang dog dapŭd darŭm kupo anŭ. Takta Tapa ngga Takta Anak Biri re agi dieh, ka bara urun Tapa re nyambah Ayŭh.

⁴Ngara re kiris raŭn-I, ka adŭn-I re dog nuris di arŭ ngara.

⁵ Re mating tia singarŭm ka ngara re dŭh tia biguna di prita puan kah di jawa sandu, sabab Tuhan Tapa re jadi jawa ngara. Ngara re mritah nimun raja ndŭg situi tui.

⁶Komŭnŭ malaikat anŭ nang di aku, “Pinganang ati sawŭ ka bisa dog sabah. Ka Tuhan Tapa, adi nggen Roh-I di bara nabi, mbŭh pait malaikat-I da kiren di bara urun-I kayuh adi dŭh siŭn dŭh re rikas jadi.”

⁷“Dingah!” nang Jesus. “Aku re rikas mandŭg! Sanang inŭh ngara adi tunda pinganang-binabi darŭm surat ati!”

⁸Aku John, mbŭh dingah ka kiris sopŭrŭg kayuh ati. Kan aku muko dingah ka kiris sopŭrŭg-i, aku sidikang buang mutu di kaja malaikat anŭ adi mbŭh kiren kayuh kayuh anŭ di aku, ka mbŭh re nyambah ayŭh.

⁹Pak ayŭh nang di aku, “Dŭh nŭh simŭnŭ! Aku ati urun mun kuu gŭh. Aku samah ngga bara dingan mu adi bara nabi ka ngga ngara adi tunda pinganang surat ati. Nyambah Tapa nŭh!”

¹⁰Ka ayŭh nang di aku, “Dŭhnyah sukan pinganang-binabi surat ati, sabab tika-i mbŭh sindŭk adi ngga sopŭrŭg kayuh ati re tambus.

¹¹ Asi asi adi arap re adu adu ndai arap, ka asi asi adi sembar re adu adu sembar; asi asi adi kana re adu adu ndai kana, ka asi asi adi kudus re adu adu kudus.”

¹² “Dingah!” Jesus nang. “Aku re rikas mandŭg! Aku re taban upah, an Ku nggen di barang naan daya nanyam ka pingandai-i.

¹³ Aku ati adi sibungas ngga adi sikasŭn, adi puun ngga adi pimungan.”

¹⁴ Sanang inŭh ngara adi ngu piraka ambu ngara da bisig ka biyŭn hak man buwa so tŭngŭn kayuh adi nggen udip, ka mŭrŭt so tiban di ka darŭm kupo.

¹⁵Pak di sapa kupo inŭh ngara adi sembar ngga adi ndai biruri karŭm, ngara adi dŭh tatu pimudip-i darŭm pingandai kais ka ngara adi pinyiŭ, ngara adi nyambah tibudo ka ngara adi pingadong darŭm piminyu ka darŭm pingandai.

¹⁶ “Aku, Jesus, mbŭh pait malaikat Ku da kidaan kayuh kayuh ati di barang eklisia. Aku ati sesang David; Aku ati bitang adi jawa nyekar isan isan.”

¹⁷ Roh Kudus ngga Pingaten Dayung nang, “Mandŭg!” Barang naan adi dingah anŭ dŭh siŭn dŭh gŭh nang, “Mandŭg!” Mandŭg, asi asi adi aus; kambat meh pinganggen ati, piin adi nggen udip, tadŭ tadŭ angān adi raan.

¹⁸ Aku, John, bakan barang naan daya adi dingah-pinganang binabi surat ati: kambŭi agi daya nambah kayuh dieh, Tapa re nambah ukum ngara ngga susah-bās nimun adi dog kidaan di surat ati.

¹⁹Ka kambŭi agi daya kadi pinganang-binabi surat ati, Tapa re kadi jangi utung so man buwa so tŭngŭn kayuh anŭ adi nggen udip samŭn so Kupo Kudus anŭ ani, nimun adi dog kidaan di surat ati.

²⁰Ayŭh adi nggen taksi-I yŭn sopŭrŭg ati nang, “Manŭn sawŭ Aku re rikas mandŭg!” Amen. Mandŭg, Tuhan Jesus!

²¹Isa-i pinyirasi-mandis Tuhan Jesus agi ngga barang naan daya.[8]