Read Biatah Bidayuh PINANDŬNG 3 Bible Online

PINANDŬNG 3 - Biatah Bidayuh bible

PINANDŬNG 3

¹“Nuris ka malaikat eklisia di Sardis: “Ati inŭh agah so sianŭ adi biyŭn ju roh Tapa ka ju bitang. Aku puan kayuh ndai mu; Aku puan kuu mun adi udip, pak sibandar-i kuu mbŭh kabŭs!

²Makat meh, ka nyibake adi dŭm di adŭp mu sibayuh-i abo kabŭs. Amai di dapŭd Ku kayuh adi kuu mbŭh ndai gibayuh sukup kana di batŭh Tapa Ku.

³ Ingat nŭh meh, kayuh adi ko dog ngajar di kuu ka kayuh adi ko mu dingah; tunda-i ka ngubah adŭp mu ka dŭh tia bidosa. Kambŭi kuu dŭh makat, Aku re mandŭg ka yŭn mu keya ka pinaku, ka kuu dŭh re puan tika Ku mandŭg.

⁴Pak agi kada bara mu di Sardis mbŭh jaga piraka-i da bisig. Kuu re panu ngga Aku, nēn piraka buda, sabab kuu mbŭh sadang kana di batŭh Ku.

⁵ Ngara adi mbŭh manang re dog kibarui simŭnŭ ngga piraka buda, ka Aku dŭh re kadi dŭn ngara so surat di yŭn dŭn bara daya adi Tapa mbŭh mien dog nuris. Di sirung jawin Sama Ku ka di sirung jawin bara malaikat-I Aku re kidaan nang ngara mbŭh tung jaku.

⁶“Ayŭh adi biyŭn kajit, dingah meh garang kayuh adi Roh Kudus nang di barang eklisia!

⁷ “Nuris ka malaikat eklisia di Philadelphia: “Ati inŭh agah so sianŭ adi kudus ka adi sawŭ. Ayŭh biyŭn kusi adi dog dapu David, ka kan Ayŭh kuka tiban, mating daya dapŭd tŭŭp-i, ka kan Ayŭh tŭŭp-i, mating daya dapŭd kuka-i.

⁸Aku puan kayuh ndai mu; Aku puan kuu biyŭn nisŭ kuasa; kuu agi tunda ajar Ku ka mbŭh tŭtŭd ngga Aku. Aku mbŭh kuka tiban yŭn mu, adi mating daya tungang tŭŭp.

⁹ Dingah! Mun tibaran anŭ adi dog dapu Shetan, piminyu kadong-i adi nang adŭp-i bangsa Jahudi pak sibandar-i dŭh, Aku re bada ngara sidikang di kaja mu. Sopŭrŭg ngara re puan nang Aku rindu kuu.

¹⁰Sabab kuu mbŭh dingah pinyipesan Ku ngga mu jadi tŭtŭd, Aku re kingat gŭh kuu di tika pinyusah adi re mandŭg ka ong adi ngga sopŭrŭg daya di ong dog suba.

¹¹Aku re rikas mandŭg. Bidigŭng tagap meh di anŭ adi kuu mbŭh biyŭn, isa mating daya bisa sirabut upah pimanang mu.

¹² Aku re bada ngara adi manang jadi keya ka bara tiang darŭm ramin Tapa Ku, ka ngara re adu adu rŭŭ diginŭ. Aku re nuris di ngara adŭn Tapa Ku ka dŭn kupo Tapa Ku, adi Jerusalem bauh, adi re mūn so shorga so Tapa Ku. Aku re nuris gŭh di ngara adŭn bauh Ku.

¹³“Ayŭh adi biyŭn kajit, dingah meh garang kayuh adi Roh Kudus nang di barang eklisia!

¹⁴ “Nuris ka malaikat eklisia di Laodicea: “Ati inŭh agah so Amen anŭ, saksi adi tŭtŭd ngga adi sawŭ, adi tibirik puun[1] sopŭrŭg kayuh adi Tapa ko napa.

¹⁵Aku puan kayuh ndai mu; Aku puan kuu dŭh madud dŭh paras. Kana dŭ inŭh kuu ndi so anŭ duwŭh!

¹⁶Pak sabab kuu mbŭh paras-madud, dŭh ruai paras dŭh ruai madud, Aku re ruān kuu so baba Ku!

¹⁷Kuu nang, ‘Aku ati kaya ka mbŭh udip sanang; aku biyŭn sopŭrŭg kayuh adi aku biguna.’ Pak kuu dŭh puan munki masam payah ka susah-i kuu! Kuu sirata, sitagor, ka karak.

¹⁸Sabab anŭ Aku pitayan kuu, miris mas so Aku, tigŭrŭ mas, ngga mu jadi kaya. Miris gŭh piraka buda ngga kibarui adŭp mu ka nutu adŭp mu adi sitagor. Miris gŭh inyo ngga nginyo batŭh mu, isa kuu bisa kiris tarun.

¹⁹ Aku nang ka ngukum sopŭrŭg adi Aku rindu. Ndai meh pikir mu yŭn ngubah adŭp mu ka dŭh tia bidosa.

²⁰Dingah! Aku agi mijog di tiban ka gutog; kambŭi agi daya dingah sirŭŭn Ku ka kuka tiban, aku re mŭrŭt ka darŭm ramin-i ka man ngga ngara, ka ngara re man ngga Aku.

²¹Di ngara adi mbŭh manang Aku re nggen hak da guru ngapid Aku di takta Ku, nimun Aku mbŭh manang ka madin mbŭh guru ngapid Sama Ku di takta-I.

²²“Ayŭh adi biyŭn kajit, dingah meh garang kayuh adi Roh Kudus nang di barang eklisia!”