Read Biatah Bidayuh PINANDŬNG 4 Bible Online

PINANDŬNG 4 - Biatah Bidayuh bible

PINANDŬNG 4

¹Ko anŭ aku agi dinge keya ka darŭm pŭmŭh kiris ndi tiban tikuka di shorga. Ka sirŭŭn anŭ adi sak jawŭn trompet adi aku ko dingah, nang, “Maad kamati, Aku raan kiren di kuu kayuh adi re jadi ripas ati.”

² Jam anŭ gŭh Roh Kudus nguasa aku. Di shorga agi ndi takta ka agi daya guru dieh.

³Jawin-I bringam keya ka batuh adi brega mun jasper ngga batuh akek bireh, ka nyirungan takta anŭ agi ujen-bukang adi jawa mun zamrud.

⁴Maning takta anŭ agi duwŭh puru-pat takta adi bŭkŭn, di yŭn duwŭh puru-pat naan bara nyamba guru nēn piraka buda ka di ubak ngara agi makota mas.

⁵ So takta anŭ kijat mikirab ruah ngga jawŭn dudū. Di jawin takta anŭ agi ju prita-siru' adi mbŭh sakŭt, anŭ inŭh ju roh Tapa.

⁶ Di jawin takta anŭ gŭh agi kayuh mun rawŭt siramin, tanis mun kristal. Maning takta anŭ di so-pat parad-i agi pat dāng udip adi puno ngga dudu batŭh di punok ngga di jawin-i.

⁷Adi numbor ndi mun singah; adi numbor duwŭh mun sapi; adi numbor taruh biyŭn jawin mun jawin manusia; ka adi numbor pat mun beuh adi aŭn mikabur.

⁸ Barang pat dāng udip anŭ biyŭn nŭm urad-i, ka pŭrŭng ngara puno ngga dudu batŭh, di darŭm ngga di sapa. Sandu singarŭm ngara dŭh ko ko biragu nang: “Kudus, kudus, kudus, Tuhan Tapa Bisa-pŭrŭg, adi mbŭh, adi madin, ka adi re mandŭg.”

⁹Barang pat dāng udip anŭ nang ragu bragah ngga puji ka trima kaseh ka sianŭ adi guru di takta, adi udip adu adu. Darŭm ngara biragu sakanŭ,

¹⁰duwŭh puru-pat naan bara nyamba anŭ sidikang nyambah Ayŭh adi guru di takta, Ayŭh adi udip adu adu. Ngara na makota ngara di jawin takta ka nang,

¹¹“Tuhan ami ka Tapa ami! Kaam inŭh adi patut kambat bragah, stabi, ngga kuasa. Amai Kaam inŭh adi napa sopŭrŭg kayuh, ka ngga pinyiraan Mai ngara mbŭh agi, buang udip.”