Read Biatah Bidayuh PINANDŬNG 6 Bible Online

PINANDŬNG 6 - Biatah Bidayuh bible

PINANDŬNG 6

¹Komŭnŭ aku kiris Anak Biri kuka ju patis anŭ, piguru so adi numbor ndi; ka aku dingah ndi so pat dāng udip anŭ nang ngga sirŭŭn bana sak dudū, “Mandŭg!”

² Rasu aku tingga, ka kiris kuda buda. Pinunggang-i digŭng bawŭh panah, ka dog nggen di ayŭh makota. Ayŭh adi tukang nyerang mbŭh matak di nyerang.

³Komŭnŭ Anak Biri kuka patis adi numbor duwŭh; ka aku dingah ndi so dāng udip anŭ, adi numbor duwŭh nang, “Mandŭg!”

⁴ Kuda adi bŭkŭn ruah, adi bireh. Pinunggang-i dog nggen kuasa ngga taban perang ka ong, isa daya siŭ dingan-i. Ayŭh dog nggen tibande pedang.

⁵ Komŭnŭ Anak Biri kuka patis adi numbor taruh; ka aku dingah ndi so dāng udip anŭ, adi numbor taruh nang, “Mandŭg!” Aku tingga, ka kiris kuda singŭt. Pinunggang-i digŭng pinimbang di tangan-i.

⁶Aku dingah kayuh sak sirŭŭn mandŭg so pat dāng udip anŭ, adi nang, “Ndi kilogram gandom yŭn gaji ndi andu, ka taruh kilogram jeri yŭn gaji ndi andu. Pak dŭhnyah pirusak tŭngŭn tŭngŭn kanā ngga teya teya anggor!”

⁷Komŭnŭ Anak Biri kuka patis adi numbor pat; ka aku dingah dāng udip anŭ adi numbor pat nang, “Mandŭg!”

⁸ Aku tingga ka kiris kuda adi pusat. Pinunggang-i inŭh dog kadŭn Pinyikabŭs, ka Sibayan[3] agi tunda, sindŭk di punok. Ngara dog nggen kuasa di tunduh ndi utung darŭm pat so ong ati, da siŭ daya ngga biperang, ngga apag, ngga andam, ka ngga dāng tarun.

⁹Komŭnŭ Anak Biri kuka patis adi numbor rimŭh. Aku kiris di ribo mija-sambah simangi ngara adi ko dog siŭ sabab ngara ko piagah pinganang Tapa buang mbŭh tŭtŭd darŭm kidaan pasar pinyabah ngara.

¹⁰Ngara nyirais ngga sirŭŭn bana, “Tuhan adi Bisa-pŭrŭg, kudus ka adi tŭtŭd! Ndŭg sinde meh kieh kajŭn Kaam nggen bisara di daya di ong ka ngukum ngara amai ko siŭ kieh?”

¹¹Barang naan ngara dog nggen jipo-ambu adi buda, ka dog kidaan da rŭŭ-paya mua tian-i, ndŭg ka sukup kiang bara dingan ngara adi bŭkŭn adi samah sabah dog siŭ, mun adŭp ngara.

¹² Ka aku kiris Anak Biri kuka patis adi numbor nŭm. Tana agi rasu bana bigugoh, batŭh andu jadi singŭt mun banang singŭt, buran marui bireh mun deya.

¹³ Bitang bitang rabu ka tana, mun buwa ara adi bayuh sukup masak rabu so tŭngŭn-i kan sabak bana poh ngugoh-i.

¹⁴ Rangit miyap mun surat-barun dog marun, ka barang darŭd ngga purau dog mindah so tarun yŭn-i.

¹⁵ Jadi bara raja di ong, bara pinguasa ngga pingubak soldadu, daya kaya ngga adi bikuasa samŭn sopŭrŭg daya bŭkŭn, urun ngga daya bebas, bisukan di tang ka di ribo batuh di darŭd.

¹⁶ Ngara nyirais nang di darŭd ngga di batuh, “Nyatŭk kieh ka sukan kieh so batŭh sianŭ adi guru di takta, ka so baji Anak Biri!

¹⁷ Andu adi raru sipŭ mbŭh mandŭg. Tapa ngga Anak Biri re kiren baji-I, ka asi meh re tungang nura-i?”