Read Biatah Bidayuh RUTH 1 Bible Online

RUTH 1 - Biatah Bidayuh bible

RUTH 1

¹Jah, di jaman Israel gibayuh biyŭn raja, agi apag di tarun tana anŭ. Jadi ndi naan dari dŭn Elimelech, adi so manak Ephrath adi rŭŭ di Bethlehem di Judah, bipindah ngga sawŭn-i Naomi ngga duwŭh madis anak dari ngara Mahlon ngga Chilion di rŭŭ nyitiro di rais Moab. Sitadŭn ngara mbŭh diginŭ,

³Elimelech kabŭs tingge Naomi sadi rŭŭ ngga anak-i adi duwŭh madis,

⁴adi sawŭn dayung daya Moab, Orpah ngga Ruth. Atur simŭng sawa ripas anŭ

⁵Mahlon ngga Chilion kabŭs gŭh, ngga Naomi mbŭh rŭŭ udip sadi, dŭh biyŭn banŭh dŭh biyŭn anak.

⁶Mua tian ripas anŭ, Naomi dingah TUHAN mbŭh nyiberkat daya-I ngga bagŭ buwa pimuruh adi kana. Jadi Naomi makat ka bipisŭn yŭn re bu so Moab ngga iban dayung-i adi duwŭh naan.

⁷Ngara samah matak ka Judah, pak darŭm ngara panu,

⁸ayŭh nang di ngara, “Pari adŭ angān, ka rŭŭ ngga sindŭ ngan. Isa-i Tuhan mandis ngga angān nimun angān mbŭh mandis ngga aku ka ngga ngara adi mbŭh kabŭs.

⁹Ka isa-i Tuhan ngatur angān duwŭh bada banan bauh ka biyŭn ramin arŭn adŭp ngan.” Jadi Naomi sium ngara ka kidaan adŭp-i panu di ngara. Pak gŭt ngara sien

¹⁰ka nang di ayŭh, “Abah! Kieh an panu tunda kaam di ka yŭn bangsa adŭp mai.”

¹¹“Angān dŭh siŭn dŭh pari, nak,” Naomi nam. “Mani angān raan tunda aku? Angān pikir aku re tungang biyŭn anak re ngan banŭh dinge kah?

¹²Mari ka rawang adŭp ngan, amai aku ati paŭh mbŭh minyamba ka dŭh re dapŭd banan dinge. Ka kambŭi aku dapŭd gŭh nyamtadar-i, ka banan sikambŭh ka dapŭd anak anak dari,

¹³tungang kah angān kajŭn ndŭg ka ngara mbŭh baga? Dŭh kah anŭ re kinarang angān banŭh dari bŭkŭn? Angān puan-i dŭh bisa jadi simŭnŭ. Tuhan mbŭh ngukum aku, ka aku raru masi di angān duwŭh.”[1]

¹⁴Ngara duwŭh sien dinge. Komŭnŭ Orpah sium dinŭh-i, kidaan adŭp-i panu ka rasu mari ka ramin adŭp-i,[2] pak Ruth abah birakang ngga dinŭh-i.

¹⁵Jadi Naomi nang di ayŭh, “Ruth, sawŭn jurud mu mbŭh pari di ka yŭn daya adŭp-i ka tapa adŭp-i.[3] Panu mari tunda ayŭh.”

¹⁶Pak Ruth nam, “Dŭhnyah bada aku bu so kaam! Bada aku tunda kaam. Aku raan tunda kaam ka barang yŭn mai; di tadŭ yŭn mai rŭŭ, diginŭ gŭh aku re. Bangsa mai bangsa ku, ka Tapa mai Tapa ku.

¹⁷Diki kaam kabŭs, diginŭ gŭh aku re, ka diginŭ inŭh yŭn aku re dog kubur. Isa-i ukum TUHAN adi bisā nyatŭk aku kambŭi aku bada tadŭ tadŭ kayuh bada aku birakang so kaam, adŭ-i pinyikabŭs!”

¹⁸Kan Naomi kiris Ruth mbŭh bigŭtŭ raan tunda adŭp-i, ayŭh dŭh tia nang ani ani.

¹⁹Ngara panu adŭ meh ndŭg ka ngara mbŭh ndŭg Bethlehem. Kan ngara mbŭh ndŭg nŭ, sopŭrŭg daya darŭm kupo guga, ka bara dayung siken, “Sawŭ Naomi kah anŭ?”

²⁰“Dŭhnyah bagan aku Naomi,” ayŭh nam; “Bagan aku Marah,[4] amai Tapa Bisa-pŭrŭg mbŭh bada pimudip ku raru jera.

²¹Di andu aku bu tingge tarun ati dawŭ-i, aku biyŭn bagŭ kayuh, pak madin Tuhan mbŭh taban aku pari dŭh biyŭn ani ani. Mani bagan aku Naomi, kan TUHAN Bisa-pŭrŭg mbŭh nunggu aku ka bada aku susah?”

²²Simŭnŭ inŭh Naomi pari so Moab ayō Ruth, iban dayung-i daya Moab. Kan ngara mandŭg ka Bethlehem, nganŭ mbŭh tika ngatŭm jeri.