Read Biatah Bidayuh RUTH 2 Bible Online

RUTH 2 - Biatah Bidayuh bible

RUTH 2

¹Naomi biyŭn ndi naan madis adi kaya buang adi dog stabi daya, dŭn Boaz. Ayŭh so rawang banŭh-i Elimelech.

² Ndi andu, Ruth nang di Naomi, “Bada aku matak ka ŭmŭh ka ngatŭm reru jeri adi bara adi ngatŭm mbŭh tingge. Tatu aku re dapŭd daya adi re bada aku nyiraja ayō adŭp-i.” Naomi nam, “Panu, nak.”

³Jadi Ruth matak ka ŭmŭh ka panu tunda punok daya adi ngatŭm, sun reru ngara. Tipia gŭh Ruth di ŭmŭh Boaz.

⁴Dŭh tui ripas anŭ, adŭp Boaz mandŭg so Bethlehem, ka nggen tabi di bara adi nyiraja. “TUHAN agi ngga angān!” ayŭh nang. “TUHAN nyiberkat kaam!” ngara nam.

⁵Boaz siken di sianŭ adi tukang jaga bara adi nyiraja, “Asi dayung adi gi-mara ajeh?”

⁶Daya anŭ nam, “Ayŭh anŭ pinami so Moab, adi mari ayō Naomi.

⁷Ayŭh mite aku bada adŭp-i tunda bara adi ngatŭm ka sun reru. Ayŭh nyiraja so jŭjah, ka madin ayŭh bauh rŭŭ nyitiro di bari.”

⁸Komŭnŭ Boaz nang di Ruth, “Bada aku pitayan kuu. Dŭhnyah ngatŭm di tarun bŭkŭn adŭ-i di ŭmŭh ati. Nyiraja ngga bara dayung adi digiti.

⁹Ngatin diki ngara ngatŭm ka tunda ngara. Aku muko mritah bara dari adi nyiraja bada dŭh mito kuu. Ka kan kuu badŭh asŭng, di nok so tipayan piin adi ngara muko ngisi.”

¹⁰Ruth mutu ubak-i ka nang di Boaz, “Mani kaam sah mbit bat pasar aku? Mani kaam sah raru mandis ngga daya pinami?”

¹¹Boaz nam, “Aku mbŭh dingah pasar sopŭrŭg kayuh adi kuu mbŭh ndai yŭn dinŭh mu sitian banŭh mu mbŭh kabŭs. Aku puan nang kuu mbŭh tingge sindŭ sama mu ngga rais adŭp mu, ka mbŭh mandŭg ka rŭŭ ngga bangsa daya adi dŭh mu puan.

¹²Isa-i TUHAN ngupah kuu sabab kayuh adi mbŭh mu ndai. Isa-i kuu dapŭd upah ngga sipuno-i so TUHAN adi Tapa Israel, adi kuu mbŭh tudu yŭn pinyigrindung.”

¹³Ruth nam, “Kaam mbŭh raru mandis[5] ngga aku, tuan. Kaam mbŭh nyaduh atin ku darŭm mai minyu duduh ngga aku, pŭn ka aku dŭh ndi so daya-gaji mai.”

¹⁴Di tika guru man, Boaz nang di Ruth, “Ja man. Man, njug ruti anŭ di sambar.” Jadi Ruth guru man ayō bara adi nyiraja, ka Boaz jugan ka ayŭh sirandang gandom. Ayŭh man ndŭg bisoh, ka pinguman-i gibabŭ bagŭ dŭm.

¹⁵Ripas Ruth mbŭh makat re di ngatŭm, Boaz nang di bara adi ngatŭm, “Tandah ayŭh ngatŭm di aŭn jeri, ka dŭhnyah nyara ayŭh. Nambah ka anŭ, tarik kada tundun aŭn jeri so bŭtŭs-i ka tandah isa agi nguruk-i.”

¹⁷Jadi Ruth ngatŭm di ŭmŭh anŭ ndŭg singumi andu. Ka kan ayŭh ngiik jeri ayŭh kiris adŭp-i agi dapŭd prungun jeri-i sindŭk simŭng kilogram.

¹⁸Ayŭh taban jeri anŭ ngga mari ka kupo ka kiren kiang pingandu-i di dinŭh-i. Ayŭh nggen gŭh di dinŭh-i tadŭh pinguman adi-i nyikŭn ripas muko man.

¹⁹Naomi siken ayŭh, “Diki kuu ngatŭm jeri ati andu ati? Ŭmŭh asi adi yŭn mu nyiraja? Isa-i Tapa nyiberkat dari anŭ adi mandis ngga kuu!” Jadi Ruth kidaan di Naomi nang adŭp-i agi nyiraja di ŭmŭh ndi naan daya dŭn Boaz.

²⁰ “Isa-i TUHAN nyiberkat Boaz!” Naomi nang. “TUHAN taŭn ari ingat janji-I ngga daya adi udip ngga adi mbŭh kabŭs.” Naomi pijuu nang, “Daya anŭ inŭh kada ta, ndi so ngara adi patut biyŭn pinanggong di tunduh ata.”

²¹Komŭnŭ Ruth nang, “Adi siabo kana inŭh ayŭh bada aku babŭ sua ngatŭm ngga bara daya-i ndŭg ka pinangŭh.”

²²Naomi nang di Ruth, “Sawŭ nak, kana dŭ inŭh kuu nyiraja biayo ngga bara dayung anŭ di ŭmŭh Boaz. Kambŭi kuu di ka ŭmŭh daya bŭkŭn, kadŭ-i kuu dog mito daya.”

²³Jadi Ruth nyiraja biayo ngga ngara sun jeri ngga gandom ndŭg ka sopŭrŭg-i mbŭh abo dog ngatŭm. Ka Ruth gibabŭ rŭŭ samah ngga dinŭh-i.