Read Biatah Bidayuh RUTH 3 Bible Online

RUTH 3 - Biatah Bidayuh bible

RUTH 3

¹Mua tian ripas anŭ Naomi nang di Ruth, “Aku dŭh siŭn dŭh jiroh banŭh yŭn mu, isa kuu bisa biyŭn ramin arŭn adŭp mu.

²Ingat daya anŭ adi dŭn Boaz, adi biyŭn bara dayung adi ngga mu samah nyiraja, inŭh madis ta. Dingah ati. Singumi andu ati ayŭh re ngiik jeri.

³Mamuh adŭp mu, pakai wangi, ka nēn piraka mu adi siabo ramus. Komŭnŭ di ka yŭn-i ngiik, pak dŭhnyah bada ayŭh puan adŭp mu agi diginŭ ndŭg ka ayŭh muko man nok.

⁴Nakit nyibatŭh diki ayŭh guring, ka kan ayŭh mbŭh bŭŭs rŭrŭ, pakat putong-i ka guring di sigŭn kaja-i. Ayŭh re kidaan di kuu kayuh adi re mu ndai.”

⁵Ruth nam, “Aku re ndai sopŭrŭg adi nang mai.”

⁶Jadi Ruth di ka tarun adi yŭn daya ngiik ka ndai nimun adi ko dinŭh-i kidaan di ayŭh.

⁷Kan Boaz muko man nok, ayŭh gaŭn asŭng-i. Ayŭh di ka yŭn tugung jeri ka guring diginŭ rasu bŭŭs. Ruth pirŭngŭt di ka yŭn-i, pakat putong anŭ ka guring di sigŭn kaja-i.

⁸Di ngarŭm anŭ Boaz gŭgŭh rada tarun ka bigiring ka mbŭh nginga kiris dayung agi guring di sigŭn kaja-i.

⁹“Asi kuu?” Boaz siken. “Aku Ruth, tuan,” ayŭh nam. “Sabab kaam mbŭh madis adi sindŭk ka patut biyŭn pinanggong di tunduh aku, ngapŭi turung sawŭn adŭ aku.”

¹⁰“TUHAN nyiberkat kuu,” Boaz nang. “Ngga pingandai mu adi mun ati madin, kuu mbŭh kiren stabi bisaya adi bās dŭ so anŭ adi kuu mbŭh ndai di dinŭh mu, amai kuu bisa gŭh di jiroh dari adi gi-mara, adi kaya puan kah adi sirata, pak kuu dŭh.

¹¹Jadi madin dŭhnyah gapang Ruth. Aku re ndai ani ani adi kuu mite; amai barang naan daya di kupo mbŭh puan nang kuu ati dayung adi kana.

¹² Taŭn sawŭ aku ati madis adi sindŭk ka biyŭn pinanggong di tunduh mu, pak agi dari adi bŭkŭn adi rabis sindŭk so aku.

¹³Rŭŭ digiti ndŭg ripuan ngarŭm ati, ka isan isan sipagi ata di natu raan kah abah dari anŭ biyŭn pinanggong di tunduh mu. Kambŭi ayŭh raan, kana; pak kambŭi ayŭh abah, aku bipayu di TUHAN adi udip, aku re dapu pinanggong ati. Madin, guring ka rŭŭ digiti ndŭg isan isan sipagi.”

¹⁴Jadi Ruth guring di sigŭn kaja Boaz, pak Ruth makat diŭ so andu batur jawa amai abah dog kiris daya, sabab Boaz dŭh raan tadŭ tadŭ daya puan nang Ruth agi diginŭ.

¹⁵Boaz nang di ayŭh, “Kadi jipo mu ka mamad-i digiti.” Ruth ndai simŭnŭ ka Boaz ren jeri sindŭk duwŭh puru kilogram dieh ka-i turung ayŭh pakat bakot jeri anŭ, na di kawin-i. Komŭnŭ ayŭh maad taban jeri anŭ ka kupo.

¹⁶Kan ayŭh ndŭg ramin-i, dinŭh-i siken di ayŭh, “Munki meh angān duwŭh, nak?” Ruth kidaan di ayŭh sopŭrŭg kayuh adi Boaz ndai yŭn-i.

¹⁷Ruth nambah nang, “Ayŭh kidaan di aku nang aku dŭh siŭn pari ka yŭn mai bŭrŭh-beyang. Anŭ sabab-i nggen di aku jeri ati.”

¹⁸Naomi nang di ayŭh, “Kuu an tŭtŭd, Ruth, ndŭg ka kuu mbŭh kiris pinŭbŭn-i. Boaz dŭh re rŭŭ-paya andu ati ndŭg ka ayŭh mbŭh bada kayuh ati tirase.”