Read Biatah Bidayuh 1 SAMUEL 12 Bible Online

1 SAMUEL 12 - Biatah Bidayuh bible

1 SAMUEL 12

¹Jadi Samuel nang di daya Israel, “Aku mbŭh ndai kayuh adi angān bada aku ndai. Aku mbŭh nggen di angān raja da mritah angān,

²ka madin angān mbŭh biyŭn ayŭh da nguru angān. Ka aku ati, aku mbŭh minyamba ka ubok ku mbŭh buda, ka bara anak dari ku agi ngga angān. Aku jadi pinguru ngan so aku gi-mara ndŭg madin.

³Ta aku. Kambŭi aku agi ndai sarah, angān bisa nyarah aku di sirung jawin TUHAN ka di sirung jawin raja adi-I mbŭh mien. Mbŭh kah aku tambit sapi daya bait kaldi daya? Mbŭh kah aku nipu bait kinanyuh daya? Kambŭi aku agi ndai kayuh anŭ, aku bisa bayar pari.”

⁴Bara daya nam, “Mating, kaam mating nipu bait kinanyuh kieh; kaam mating tambit kayuh so tadŭ daya.”

⁵Samuel nam, “TUHAN ngga raja adi Ayŭh mbŭh mien inŭh saksi andu ati angān nang aku mating ndai sarah.” “Sawŭ, TUHAN inŭh saksi ami,” ngara nam.

⁶ Samuel pijuu minyu, “TUHAN inŭh adi mien Moses ngga Aaron adi taban tayung-babuk ngan ruah so Egypt.

⁷Mijog di yŭn ngan madin, ka aku re nyarah angān di sirung jawin TUHAN isa angān ingat[27] sopŭrŭg pingandai bās TUHAN adi ngga-I nyiramat angān ngga tayung-babuk ngan.

⁸ Kan Jacob ngga rawang-i di ka Egypt ka daya Egypt kinanyuh ngara,[28] tayung-babuk ngan bagan ka TUHAN mite turung, ka Ayŭh pait Moses ngga Aaron, adi taban ngara ruah so Egypt ka bada ngara rŭŭ di tarun tana ati.

⁹ Pak daya kambŭt TUHAN adi Tapa ngara, jadi Ayŭh bada daya Philistine ngga raja so Moab ngga Sisera adi pingibās bara soldadu so kupo Hazor, biperang rawan ka ngarah tayung-babuk ngan.

¹⁰ Komŭnŭ ngara bagan ka TUHAN mite turung ka nang, ‘Kieh mbŭh bidosa, sabab kieh nyipunok kaam, TUHAN, ka nyambah tibudo Baal ngga Astart. Pirupas kieh so pinganyu ami, ka kieh re nyambah Kaam!’

¹¹ Ka TUHAN pait Gideon, Barak,[29] Jephthah, ka sikasŭn-i aku. Barang naan kieh pirupas angān so pinganyu ngan, ka angān udip ngga siramat.

¹² Pak kan angān kiris Raja Nahash so Ammon re nyerang angān, angān abah di TUHAN jadi raja ngan ka nang di aku, ‘Kieh raan biyŭn raja da mritah kieh.’

¹³“Madin angān mbŭh biyŭn raja adi adŭp ngan mbŭh mien; angān mite ayŭh, ka madin TUHAN mbŭh nggen ayŭh di angān.

¹⁴Angān re sanang kambŭi angān stabi di TUHAN adi Tapa ngan, bituan di Ayŭh, dingah pinganang-I, ka tunda pinyipesan-I, ka kambŭi angān ngga raja ngan tŭtŭd di Ayŭh.

¹⁵Pak kambŭi angān dŭh dingah pinganang TUHAN ka nyibireu pinyipesan-I, Ayŭh re rawan angān samŭn raja ngan.[30]

¹⁶Ngapŭi meh, mijog diginŭ, ka angān re kiris kayuh bās adi TUHAN re ndai.

¹⁷Ati mbŭh tipuh raga, dŭh kah? Pak aku re bidua, ka TUHAN re pait dudū ngga ujen. Kan kayuh anŭ jadi, angān re rada angān agi ndai dosa bās rawan TUHAN kan angān mite Ayŭh nggen raja di angān.”

¹⁸Jadi Samuel bidua, ka di andu anŭ gŭh TUHAN pait dudū ngga ujen. Ka sopŭrŭg daya mbŭh taru di TUHAN ngga di Samuel,

¹⁹ka ngara nang di Samuel, “Turung, tuan, bidua ka TUHAN adi Tapa mai, mite kieh dŭh kabŭs. Kieh rada madin, samŭn dosa ami adi bŭkŭn, kieh mbŭh bidosa darŭm kieh mite raja.”

²⁰“Dŭhnyah taru,” Samuel nam. “Sunggu angān mbŭh ndai pingandai adi sarah mun anŭ, dŭhnyah angān nyipunok TUHAN, pak bituan di Ayŭh ngga siabo atin ngan.

²¹Dŭhnyah tunda tapa tapa adi dŭh sawŭ; ngara dŭh dapŭd turung angān bait nyiramat angān, amai ngara dŭh sawŭ.

²²TUHAN mbŭh bipayu, ka Ayŭh dŭh re tagan angān, amai Ayŭh mbŭh natu re bada angān jadi daya-I.

²³Ka aku ati, bidosa rawan TUHAN inŭh aku kambŭi aku dŭh bidua yŭn ngan. Aku re ngajar angān ndai kayuh adi kana ngga adi batur.

²⁴Dingah pinganang TUHAN ka tŭtŭd bituan di Ayŭh ngga siabo atin ngan. Ingat kayuh bās adi Ayŭh mbŭh ndai yŭn ngan.

²⁵Pak kambŭi angān ngandŭ ndai dosa, angān ngga raja ngan re binasa.”