Read Biatah Bidayuh 1 SAMUEL 19 Bible Online

1 SAMUEL 19 - Biatah Bidayuh bible

1 SAMUEL 19

¹Saul kidaan di anak-i Jonathan samŭn di sopŭrŭg pinurung-i nang adŭp an siŭ[56] David. Pak Jonathan mbŭh ruai siŭt David,

²jadi ayŭh nang di David, “Sama ku suba re siŭ kuu. Turung nakit ngga adŭp mu isan isan sipagi; di bisukan di tarun yŭn adi dŭh daya puan ka rŭŭ diginŭ.

³Aku re ruah ka sapa tarun ngga sama ku di ka yŭn mu bisukan, ka aku re minyu ngga ayŭh pasar kuu. Kambŭi agi ani ani, aku re kidaan di kuu.”

⁴Jonathan nganju David di sirung jawin Saul, nang-i, “Tuan, dŭhnyah ida ida ngga urun mai David. Ayŭh bŭn ndai sarah di kaam; tibarik kayuh adi mbŭh-i ndai siraru jadi pinurung bās di kaam.

⁵Ayŭh ruban asŭng di andu ayŭh siŭ Goliath, ka TUHAN nggen pimanang bās di Israel. Kan kaam kiris-i, adŭp mai munos asŭng. Mani, meh, kaam raan ida ida ngga daya adi dŭh sarah ka siŭ David ngga dŭh biyŭn pada?”

⁶Saul dingah pinganang Jonathan ka bipayu ngga adŭn TUHAN ayŭh dŭh re siŭ David.

⁷Jadi Jonathan bagan David ka kidaan di ayŭh sopŭrŭg-i; komŭnŭ ayŭh taban ayŭh ka yŭn Saul, ka David bituan di raja Saul nimun adi mbŭh.

⁸Biperang ngga daya Philistine timbur dinge. David nyerang ngara ka bana ngarah ngara ndŭg ka ngara babak bu.

⁹Ndi andu, roh arap so TUHAN nguasa Saul. Ayŭh guru di ramin-i ka jarok di tangan-i, ka David agi diginŭ, main kachapi-i.

¹⁰Saul suba nyigaru David bada rakat di sindung ngga jarok-i, pak David sigen adŭp-i, ka jarok anŭ rakat di sindung. David bikaduh bu nyiramat adŭp-i.

¹¹ Ngarŭm anŭ gŭh Saul pait kada daya bada nyibatŭh ramin David ka siŭ ayŭh andu jawa ndi. Michal, adi sawŭn David, bakan ayŭh, “Kambŭi kuu dŭh bu ngarŭm ati, sipagi kuu kabŭs.”

¹²Michal bisor ayŭh so pinjan, ka ayŭh bu pirupas adŭp-i.

¹³Komŭnŭ Michal tambit tibudo rawang-i, piguring-i di ambok, na batar adi dog ndai so buruh kambing tura ka ubak-i, ka nutu-i ngga putong.

¹⁴Kan daya Saul mandŭg an di nakap David, Michal kidaan di ngara nang ayŭh sungoh.

¹⁵Pak Saul bada ngara pari di tingga David. Ayŭh mritah ngara, “Taban ayŭh kamati samŭn ambok-i, ka aku siŭ ayŭh.”

¹⁶Ngara mŭrŭt ramin ka dapŭd tibudo rawang di ambok ka batar buruh kambing di tura ka ubak-i.

¹⁷Saul siken Michal, “Mani kuu nyibudo aku mun ati, bada pinganyu ku rupas?” Ayŭh nam, “Ayŭh nang adŭp-i re siŭ aku kambŭi aku dŭh turung ayŭh pirupas adŭp-i.”

¹⁸David bu ka di ka yŭn Samuel di Ramah ka kidaan di ayŭh sopŭrŭg kayuh adi Saul mbŭh ndai di adŭp-i. Komŭnŭ ayŭh di ngga Samuel ka Naioth ka rŭŭ diginŭ.

¹⁹Saul agi dog kidaan nang David agi di Naioth di Ramah,

²⁰jadi ayŭh pait kada daya bada nakap ayŭh. Ngara kiris[57] tibaran nabi bitanda buang nyirais, ayō Samuel adi pinguru ngara. Komŭnŭ roh Tapa nguasa daya Saul, ka ngara piguru sua bitanda ka nyirais.

²¹Kan Saul dingah kayuh anŭ, ayŭh pait bagŭ dinge pinyisung, ka ngara gŭh piguru bitanda ka nyirais. Ayŭh pait bara pinyisung, adi pitaruh saba, ka simŭnŭ gŭh kayuh jadi di ngara.

²²Komŭnŭ adŭp-i matak ka Ramah. Kan ayŭh mandŭg ka tibande prigi di Secu, ayŭh siken diki Samuel ngga David, ka dog kidaan nang ngara di Naioth.

²³Darŭm ayŭh panu kamanŭ, roh Tapa nguasa ayŭh gŭh, ka ayŭh bitanda ka nyirais ndi aran aran ndŭg Naioth.

²⁴ Ayŭh kadi piraka-i ka bitanda ka nyirais di sirung jawin Samuel, ka guring sitagor ndi andu andu anŭ ka ndi ngarŭm ngarŭm anŭ. (Simŭnŭ inŭh pinganang ati timbur, “Saul mbŭh jadi nabi gŭh kah?”)