Read Biatah Bidayuh 1 SAMUEL 24 Bible Online

1 SAMUEL 24 - Biatah Bidayuh bible

1 SAMUEL 24

¹Kan Saul mari muko biperang rawan daya Philistine, ayŭh dog kidaan nang David agi di tarun tana-pajam sindŭk Engedi.

²Saul taban taruh ribu naan soldadu-i adi siabo pandai birawan so dupan daya Israel ka matak di jiroh David ngga bara daya-i di timor Batuh Kambing Tarun.

³ Ayŭh mandŭg di ndi tāng adi sindŭk kandang kandang biri di bŭngŭn aran ka mŭrŭt di bijamban. Tāng anŭ tipia tāng adi yŭn David ngga daya-i bisukan jeh tura ka darŭm-i.

⁴Ngara nang di ayŭh, “Ati inŭh pluang mai! TUHAN mbŭh kidaan di kaam nang adŭp-I re na pinganyu mai di tangan mai ka kaam bisa ndai di ayŭh nanyam pinyiraan mai.” David sigawang di ka yŭn Saul, ka Saul dŭh rada ayŭh kapŭg sigŭn jipo ambu-i.

⁵Pak komŭnŭ pikir-kira atin David dŭh sanang ripas-i muko ndai simŭnŭ,

⁶ ka ayŭh nang di daya-i, “Isa-i TUHAN pijo aku so ndai sarah di tunduh tuan ku adi adŭp TUHAN mbŭh mien bada jadi raja! Aku manŭn dŭh siŭn ida ida ngga ayŭh, sabab ayŭh raja adi dog mien adŭp TUHAN!”

⁷Jadi David nŭtŭd atin bara daya-i ka dŭh nyibandar ngara nyerang Saul. Saul makat, ruah bu so tāng anŭ, ka radus pijuu pimanu-i.

⁸Komŭnŭ David ruah tunda punok-i, ka bagan ayŭh, “Tuan Raja!” Saul bigiring, ka David mutu ubak-i ka tana ngga stabi

⁹ka nang, “Mani kaam dingah pinganang daya adi nang aku suba an kinaman kaam?

¹⁰Adŭp mai bisa tingga, tejah di darŭm tāng TUHAN mbŭh na kaam ka darŭm tangan ku. Kada daya ku bada aku siŭ kaam, pak aku masi di kaam ka nang aku dŭh siŭn kinaman kaam, sabab kaam inŭh daya adi TUHAN mbŭh mien bada jadi raja.

¹¹Tingga, ma, tingga supek jipo-ambu mai di tangan ku! Muko aku siŭ kaam kambŭi aku raan, pak kaŭs aku kapŭg supek ati adŭ. Ati inŭh kayuh adi bisa natu di kaam nang aku taŭn dŭh biyŭn pikir-kira adi an rawan kaam puan kah an kinaman kaam. Kaam ngasū aku yŭn re siŭ aku, pŭn ka aku mating ndai sarah di kaam.

¹²Isa-i TUHAN tingga asi so ata duwŭh manak adi sarah! Isa-i Ayŭh ngukum kaam sabab pingandai mai di tunduh aku, amai aku manŭn dŭh re kinaman kaam.

¹³Kaam puan pinganang nyamba jah adi nang, ‘Arap inŭh dog ndai daya adi arap.’ Ngapŭi aku dŭh re kinaman kaam.

¹⁴ Tingga kayuh adi raja Israel suba an siŭ! Tingga kayuh adi-i tadak! Tadang kasong, kutid!

¹⁵TUHAN re tingga asi so ata duwŭh manak adi sarah. Isa-i Ayŭh nakit tingga kayuh ati, grindung aku, ka nyiramat aku so kaam.”

¹⁶Kan David muko minyu, Saul nang, “Sawŭ kuu kah anŭ David, anak ku?” Ka ayŭh piguru sien.

¹⁷Komŭnŭ ayŭh nang di David, “Batur kuu, ka aku inŭh adi sarah. Kuu mbŭh raru kana ngga aku darŭm aku mbŭh ndai sarah di kuu!

¹⁸Andu ati kuu mbŭh kiren munki masam kana kuu ngga aku, sabab kuu dŭh siŭ aku, sunggu TUHAN mbŭh na aku ka darŭm tangan mu.

¹⁹Jarang raru daya pirupas pinganyu-i buang bada-i dŭh kinaman ripas-i muko nakap. TUHAN nyiberkat kuu amai kayuh adi mbŭh mu ndai andu ati!

²⁰Madin aku puan nang kuu re jadi raja Israel ka pritah anŭ re adu adu di ribo pinyipritah mu.

²¹Pak bijanji ngga aku ngga adŭn TUHAN kuu dŭh re siŭ bara sesang ku, isa dŭn ku ngga dŭn rawang ku dŭh re manyap.”

²²David bijanji adŭp-i re ndai simŭnŭ. Komŭnŭ Saul mari ka ramin-i, ka David ngga bara daya-i pari ka tarun yŭn ngara bisukan.