Read Biatah Bidayuh 1 SAMUEL 25 Bible Online

1 SAMUEL 25 - Biatah Bidayuh bible

1 SAMUEL 25

¹Samuel kabŭs, ka sopŭrŭg daya Israel mandŭg tikuruk di muās ayŭh. Ngara kubur ayŭh di badag ramin-i di Ramah. Ripas anŭ, David di ka tarun tana-pajam Paran.

²Agi ndi naan daya so manak Caleb dŭn Nabal, so kupo Maon, ka adi dapu ndi engan tana sindŭk kupo Carmel. Ayŭh daya kaya, biyŭn taruh ribu biri ka siribu kambing. Sawŭn-i Abigail ramus buang pitar, pak Nabal daya adi gŭtŭh. Nabal gumbak buruh biri-i di Carmel,

⁴ka David, di tarun tana-pajam, agi dingah pasar anŭ,

⁵jadi ayŭh pait simŭng naan dari bujang ngga pinganang bada di ka Carmel, di jiroh Nabal, ka nggen tabi-i di ayŭh.

⁶Ayŭh ngajar ngara bada nang di Nabal: “David pait tabi ka kaam, ka rawang mai, ngga ka sopŭrŭg adi agi ngga kaam.

⁷Ayŭh dingah kaam gumbak buruh biri mai, ka ayŭh raan kaam puan nang pingingat pingingat-biri mai agi ngga kieh ka kieh mating ida ida ngga ngara. Mating kayuh adi ngara dapu dog naku sitadŭn ngara agi ngga kieh di Carmel.

⁸Bisa siken ngara, ka ngara re kidaan di kaam. Kieh mandŭg di tika gawai, ka David mite kaam trima kieh ngga sanang asŭng. Turung nggen kayuh adi kaam biyŭn di kieh urun mai ka di David adi jerā mai.”

⁹Daya David nggen pinganang anŭ di Nabal pakai dŭn David. Komŭnŭ ngara kajŭn diginŭ,

¹⁰ka Nabal nam, “David? Asi ayŭh? Bŭn aku dingah asi daya anŭ! Sapa rais mbŭh puno ngga dudu urun adi bu so tuan-i madin!

¹¹Aku dŭh re tambit ruti ngga piin, samŭn dāng adi aku mbŭh simareh yŭn ngara adi tukang gumbak buruh biri, ka nggen-i di daya adi mandŭg so abong adi dŭh aku puan!”

¹²Daya David pari ka kidaan di ayŭh kayuh adi Nabal ko nang.

¹³“Nakin pedang ngan!” ayŭh mritah ngara, ka sopŭrŭg ngara nakin pedang ngara. David nakin gŭh jangi pedang ka matak ngga pat ratus naan daya-i, tingge duwŭh ratus naan bada jaga barang ngara.

¹⁴Ndi naan so daya-gaji Nabal nang di Abigail, adi sawŭn Nabal, “Agi kaam dingah? David pait kada pinyisung-i so tarun tana-pajam ngga pinganang tabi yŭn tuan ami, pak ayŭh pimangŭh ngara.

¹⁵Pŭn ka ngara mbŭh raru mandis ngga kieh; ngara bŭn mito kieh, ka sitadŭn kieh ngga ngara di teya, mating kayuh ami dog naku.

¹⁶Ngara grindung kieh sandu singarŭm kieh nguan kaban biri sindŭk ngara.

¹⁷Turung bipikir pasar kayuh ati ka matŭd pikir mai yŭn ani patut dog ndai. Kayuh bisa jadi pinyirusag di tuan ami ka di sopŭrŭg rawang-i. Ayŭh anŭ paŭh kapang ka dŭh raan dingah kayuh nang daya!”

¹⁸Abigail rikas tambit 200 baru ruti, duwŭh bŭrŭh-kurit puno ngga wain, rimŭh pŭrŭng asak biri, 17 kilogram sirandang gandom, 100 tundun buwa anggor adi pisŭk, 200 kiping kue pisŭk buwa ara, ka na-i di tunduh kaldi.

¹⁹Komŭnŭ ayŭh nang di daya daya gaji-i anŭ, “Angān panu diŭ, te aku tunda angān.” Pak ayŭh mating nang ani ani di banŭh-i.

²⁰Ayŭh nunggang kaldi-i panu di tikok aran di sigŭn sandah kan gŭgŭh ayŭh bidapŭd ngga David ngga bara daya-i panu mandŭg nuju ayŭh.

²¹David aŭn bipikir, “Mani aku sah grindung buat-rata Nabal di tarun tana-pajam ati? Ndi mating gŭh kayuh adi ayŭh dapu dog naku, ka simuti meh ayŭh maras pingandai kana ku adi turung ayŭh!

²²Isa-i Tapa siŭ aku[71] kambŭi aku dŭh siŭ barang naan ngara anŭ diŭ so isan isan sipagi!”

²³Kan Abigail kiris David, ayŭh rikas mūn ka mŭŭb di tana

²⁴di kaja David, ka nang di ayŭh, “Turung, tuan, dingah kayuh adi re ku nang! Isa-i aku adi tanggong sarah anŭ.

²⁵Turung dŭhnyah piduri Nabal. Ayŭh anŭ mating kana-i! Ayŭh batur sak rati dŭn-i gŭh sibudo![72] Aku mating diginŭ kan daya-gaji mai mandŭg, tuan.

²⁶TUHAN inŭh adi bada kaam dŭh maras ka siŭ bara pinganyu mai. Ka madin aku bipayu di kaam ngga adŭn TUHAN adi udip, bara pinganyu mai ngga sopŭrŭg adi raan kinaman kaam re dog ukum mun Nabal.

²⁷Turung, tuan, trima pinganggen ati adi taban ku yŭn mai, ka nggen-i di bara daya mai.

²⁸Turung apun aku, tuan, kambŭi aku agi ndai sarah. TUHAN re bada kaam jadi raja, ka simŭnŭ gŭh bara sesang mai, sabab kaam biperang yŭn-I; ka kaam dŭh re ndai pingandai arap[73] sitŭkŭd udip mai.

²⁹Kambŭi daya nyerang kaam ka suba an siŭ kaam, TUHAN adi Tapa mai re grindung kaam, keya ka daya nguan jaga rata adi brega. Jeja ka pinganyu mai, Ayŭh re taran ngara, keya ka daya nyitamŭng batuh ngga sitamŭng.

³⁰Ka kan TUHAN mbŭh ndai sopŭrŭg kayuh kana adi Ayŭh mbŭh bijanji di kaam ka mbŭh bada kaam jadi raja Israel,

³¹nganŭ kaam dŭh re nyesar puan kah susah, tuan, amai kaam mating siŭ daya ngga dŭh biyŭn pada puan kah sabab baras dendam. Ka kan TUHAN nyiberkat kaam, tuan, turung dŭhnyah kambŭt aku.”

³²David nang di ayŭh, “Puji ka TUHAN, adi Tapa Israel, adi pait kuu andu ati bada bidapŭd ngga aku!

³³Aku nggen trima kaseh di Tapa amai pikir kana mu ka amai kayuh adi kuu mbŭh ndai andu ati adi bada aku dŭh siŭ daya puan kah maras dendam.

³⁴TUHAN mbŭh bitan aku so kinaman kuu. Pak aku bipayu ngga adŭn Tapa Israel kambŭi kuu dŭh rikas mandŭg di bidapŭd ngga aku, sopŭrŭg daya Nabal taŭn mbŭh kabŭs ngga isan isan sipagi!”

³⁵Komŭnŭ David trima kayuh adi-i taban yŭn-i ka nang di ayŭh, “Panu, pari maad ka dŭhnyah gapang. Aku re ndai nimun adi kuu raan.”

³⁶Abigail pari maad ka yŭn Nabal. Ayŭh agi di arŭn, aŭn guru man pinguman adi situgu ngga paan raja. Ayŭh mabuk buang asŭng-i sanang, jadi Abigail dŭh nang ani ani di ayŭh ndŭg andu jawa ndi.

³⁷Komŭnŭ, kan ayŭh mbŭh bua so mabuk-i, Abigail kidaan sopŭrŭg-i di ayŭh. Tipia meh ayŭh dog nyerang andam atin ndŭg ka ndi pŭrŭng ganan-i mabŭs.

³⁸Kira ka simŭng andu ripas anŭ, TUHAN tambit asŭng-i ka ayŭh kabŭs.

³⁹Kan David dingah Nabal mbŭh kabŭs, ayŭh nang, “Puji ka TUHAN! Ayŭh mbŭh maras Nabal amai-i pimangŭh aku, ka mbŭh bitan aku adi urun-I so ndai sarah. TUHAN mbŭh ngukum Nabal amai arap-i.” Komŭnŭ David pait pinganang ka Abigail yŭn re tambit ayŭh ndu sawŭn.

⁴⁰Bara daya gaji-i di ka yŭn Abigail di Carmel ka nang di ayŭh, “David pait kieh bada taban kuu ka yŭn adŭp-i jadi sawŭn-i.”

⁴¹Abigail mutu ubak-i ka nang, “Aku urun David, sidia an ngu kaja bara daya gaji-i.”

⁴²Ayŭh makat ka rasu nunggang kaldi-i. Ayō bara pinguses-i adi rimŭh naan, ayŭh matak tunda bara daya-gaji David, ka jadi sawŭn-i.

⁴³Diŭ so anŭ David taŭn mbŭh sawan ngga Ahinoam so Jezreel, ka madin Abigail gŭh jadi sawŭn-i.

⁴⁴ Di tika anŭ, Saul mbŭh nggen anak dayung-i Michal, adi ko jadi sawŭn David, di Palti anak Laish, so kupo Gallim.