Read Biatah Bidayuh 1 SAMUEL 26 Bible Online

1 SAMUEL 26 - Biatah Bidayuh bible

1 SAMUEL 26

¹ Agi kudu kudu naan daya so Ziph mandŭg ka Saul di Gibeah ka kidaan di ayŭh nang David agi bisukan di Darŭd Hachilah di bŭngŭn tarun tana-pajam Judea.

²Saul rasu di ngga taruh ribu naan soldadu adi siabo pandai birawan di dupan daya Israel ka tarun tana-pajam Ziph di jiroh David,

³ka bibari di bŭngŭn aran di Darŭd Hachilah. David gibabŭ di tarun tana-pajam, ka kan ayŭh dingah nang Saul mbŭh mandŭg di jiroh adŭp-i,

⁴ayŭh pait pinyiong ka mbŭh puan nang Saul sawŭ agi diginŭ.

⁵Ayŭh rasu di ka dapŭd tarun anŭ adi yŭn Saul ngga Abner anak Ner, adi pingibās bara soldadu Saul, bŭŭs. Saul bŭŭs di darŭm bari, ka bara daya-i bibari maning ayŭh.

⁶Komŭnŭ David siken Ahimelech adi daya Hitti, ka Abishai adi jurud Joab (sindŭ ngara Zeruiah), “Asi so angān duwŭh adi re di ayō aku ka bari Saul?” “Aku,”Abishai nam.

⁷Jadi ngarŭm anŭ David ngga Abishai mŭrŭt bari Saul ka dapŭd Saul bŭŭs di yun bari ka jarok-i dog juman di tana sindŭk ubak-i. Abner ngga bara soldadu bŭŭs maning ayŭh.

⁸Abishai nang di David, “Tapa mbŭh na pinganyu mai ka darŭm tangan mai ngarŭm ati. Bada aku juman jarok adŭp-i di sudo-i da tambus ndŭg tana. Ndi sidah dang gŭh aku juman, dŭhsah piduwŭh kari!”

⁹Pak David nang, “Kuu dŭh siŭn ida ida di tunduh-i! TUHAN re manŭn ngukum daya adi ida ida ngga raja adi-I mbŭh mien.

¹⁰Ngga adŭn TUHAN adi udip,” David nang, “Aku puan nang adŭp TUHAN re siŭ Saul, bait-i di tipuh-i kabŭs sadi adŭp-i puan kah di tipuh biperang.

¹¹ TUHAN kijaman aku siŭ daya adi-I mbŭh bada jadi raja! Ata tambit jarok ngga bŭrŭh piin-i adŭ ka bu”

¹²Jadi David tambit jarok ngga bŭrŭh piin batur so bŭngŭn ubak Saul, ka ayŭh ngga Abishai bu so nŭ. Mating daya kiris bait puan kayuh adi mbŭh jadi puan kah burah, amai TUHAN bada sopŭrŭg ngara rŭrŭ bŭŭs.

¹³Komŭnŭ David mutas di ka parad mandi rubān di ka tibung sandah, yŭn adi juan-i mua siramat,

¹⁴ka nyirais nang di bara soldadu Saul ngga Abner, “Abner! Tungang kuu dingah aku?” “Asi anŭ nyirais ka bada raja burah?” Abner siken.

¹⁵David nam, “Abner, dŭh kah kuu daya adi timagah di Israel? Mani meh kuu dŭh jaga tuan raja mu? Tejah agi daya mŭrŭt bari an siŭ tuan mu.

¹⁶Kuu dŭh ndai kraja mu, Abner! Aku bipayu ngga adŭn TUHAN sopŭrŭg ngan patut kabŭs, sabab angān dŭh jaga tuan ngan adi TUHAN mbŭh bada jadi raja. Tingga! Diki jarok raja? Diki bŭrŭh piin adi ko sindŭk ubak-i?”

¹⁷Saul natŭng sirŭŭn David ka siken, “David, kuu kah anŭ, nak?” “Aku, Tuan Raja,” David nam.

¹⁸Ka-i nang, “Mani tuan, kaam babŭ tadak aku, urun mai? Ani mbŭh aku ndai? Ani sarah mbŭh aku ndai?

¹⁹Tuan Raja, dingah kayuh adi re ku nang. Kambŭi TUHAN inŭh adi bada kaam simŭnŭ ngga aku, ndi sadis bisa bada Ayŭh nukar pikir-I. Pak kambŭi-i so manusia, isa-i pangu TUHAN nyatŭk ngara. Amai ngara mbŭh pibu aku so tarun tana TUHAN di ka rais adi yŭn aku kaŭs tungang nyambah tapa tapa saruh adŭ.

²⁰Dŭhnyah bada aku dog siŭ di tarun tana daya tami, jo so TUHAN. Mani raja Israel sah mandŭg di siŭ kutid mun aku ati? Mani ayŭh sah ngasū aku mun ngasū siok tarun?”

²¹Saul nam, “Aku mbŭh sarah. Mari, David, anak ku! Aku dŭh re ida ida ngga kuu dinge. Singumi kuu dŭh siŭ aku. Aku mbŭh sawŭ budo! Aku mbŭh ndai kayuh adi raru sipŭ!”

²²David nam, “Ta ati jarok mai, Tuan Raja. Bada ndi so daya mai mandŭg kamati di tambit-i.

²³TUHAN ngupah daya adi tŭtŭd ka adi tŭnggŭn. Andu ati Ayŭh na kaam ka darŭm tangan ku, pak aku dŭh ida ida ngga kaam, kaam adi TUHAN mbŭh bada jadi raja.

²⁴Nimun aku tandah kaam udip andu ati, isa-i TUHAN ndai simŭnŭ gŭh ngga aku ka pirupas aku so pinyusah!”

²⁵Saul nang di David, “Tapa nyiberkat kuu, nak! Kuu re mujur darŭm sopŭrŭg kayuh adi ndai mu!” Jadi David pijuu pimanu-i, ka Saul pari ka ramin-i.