Read Biatah Bidayuh 1 SAMUEL 29 Bible Online

1 SAMUEL 29 - Biatah Bidayuh bible

1 SAMUEL 29

¹Daya Philistine taban sopŭrŭg soldadu ngara bada tikuruk di Aphek, ka bara daya Israel bibari di rubang piin di Rubān Jezreel.

²Rimŭh naan raja daya Philistine anŭ ruah baris ngga tibaran tibaran soldadu adi siratus ngga adi siribu naan. David ngga bara-i baris tura ka punok ayō Raja Achish.

³Bara pingibās soldadu daya Philistine kiris ngara ka siken, “Ani ndai daya Hebrew ati digiti?” Achish nam, “Ati inŭh David, pinurung Raja Saul di Israel. Ayŭh agi ngga aku mbŭh mua tian-i. Gi-bŭn aku kiris ayŭh ndai sarah so andu-i mandŭg ka yŭn ku.”

⁴Pak bara pingibās soldadu daya Philistine anŭ tuas di Achish ka nang di ayŭh, “Bada daya anŭ pari ka kupo anŭ adi kuu mbŭh nggen di ayŭh. Dŭhnyah bada ayŭh sua matak biperang ayō ata. Ani re rabis kana adi ngga-i tambit atin tuan-i, kambŭi-i dŭh pinyikabŭs bara soldadu ta?

⁵ Buang ja, David garang anŭ nŭh, sianŭ adi bara dayung biragu nang, darŭm ngara bitanda, ‘Saul mbŭh siŭ biribu ribu naan pinganyu, pak David mbŭh siŭ bipuru-puru ribu naan pinganyu.’ ”

⁶Achish bagan David ka nang di ayŭh, “Aku bipayu ngga adŭn Tapa Israel adi udip nang kuu tian-ti tŭtŭd ngga aku; ka aku taŭn ngga sanang asŭng raan bada kuu sua ngga aku di perang ati. Gi-bŭn aku kiris kuu ndai sarah so andu mu mandŭg ka yŭn ku. Pak raja raja adi bŭkŭn dŭh nyibandar kuu sua.

⁷Maad adŭ kuu; ka dŭhnyah ndai ani ani adi bisa bada ngara dŭh munos asŭng di kuu.”

⁸David nam, “Ani sarah ku, tuan? Kambŭi, sak adi nang mai, kaam gi-bŭn kiris aku ndai sarah so andu aku piguru bituan di kaam, ani meh sarah aku sua ngga kaam rawan pinganyu mai, kaam adi tuan ka raja ku?”

⁹“Sawŭ,” Achish nam. “Aku nyirundeng kuu tŭtŭd keya ka malaikat Tapa. Pak raja raja adi bŭkŭn nang kuu dŭh siŭn sua ngga kieh di biperang.

¹⁰Ngapŭi meh, David, isan isan sipagi sopŭrŭg ngan adi bu so Saul ka mbŭh mandŭg ka yŭn ku, dŭh siŭn dŭh makat awar ka bu diŭ so andu jawa.”

¹¹Jadi David ngga bara daya-i matak awar isan isan andu jawa ndi pari ka Philistia. Bara soldadu daya Philistine pijuu pimanu ngara ka Jezreel.