Read Biatah Bidayuh 1 SAMUEL 3 Bible Online

1 SAMUEL 3 - Biatah Bidayuh bible

1 SAMUEL 3

¹Di jaman anŭ, di tika anak anŭ Samuel bituan di TUHAN di ribo pingatur Eli, pinganang dŭh bagŭ mandŭg so TUHAN, ka kayuh adi dog kiris keya ka darŭm pŭmŭh raru jarang gŭh mandŭg so Ayŭh.

²Jadi, ndi ngarŭm Eli, adi madin mbŭh batang karak, bŭŭs di birit adŭp-i,

³ka Samuel bŭŭs darŭm ramin TUHAN, briyŭn ngga Pati Simanya. Diŭ so siri jawa buang prita Bari TUHAN gibabŭ sakŭt,

⁴TUHAN bagan Samuel. Ayŭh nam, “Ani, tuan!”

⁵rasu bikaduh tudu Eli ka nang, “Kaam bagan aku, ta aku.” Pak Eli nam, “Aku mating bagan kuu; pari di bŭŭs.” Ka Samuel pari ka ambok-i

⁶TUHAN bagan Samuel dinge. Anak anŭ dŭh puan nang TUHAN bagan adŭp-i, amai TUHAN gi-bŭn minyu ngga ayŭh. Jadi ayŭh makat, di ka yŭn Eli, ka nang, “Kaam bagan aku, ta aku.” Pak Eli nam, “Nak, aku mating bagan kuu; pari di bŭŭs.”

⁸TUHAN bagan Samuel saba adi taruh; ayŭh makat, di ka yŭn Eli, ka nang, “Kaam bagan aku, ta aku.” Jadi Eli rada meh nang TUHAN inŭh adi bagan anak anŭ,

⁹jadi ayŭh nang di anak anŭ, “Pari di bŭŭs; ka kambŭi Ayŭh bagan kuu dinge, nang, ‘Minyu, TUHAN, urun Mai agi nyiringa.’ ” Jadi Samuel pari di ka ambok-i.

¹⁰TUHAN mandŭg ka mijog diginŭ, ka bagan sakanŭ gŭh dinge, “Samuel! Samuel!” Samuel nam, “Minyu; urun Mai agi nyiringa.”

¹¹TUHAN nang di ayŭh, “Agi andu Aku re ndai kayuh adi raru sipŭ di tunduh daya Israel ndŭg ka barang naan daya adi dingah-i re gŭgŭh.

¹²Di andu anŭ Aku re ndai sopŭrŭg kayuh adi muko Aku nang Aku re ndai di tunduh rawang Eli, so sibungas ndŭg sikasŭn-i.

¹³Aku muko kidaan di ayŭh[11] nang Aku re ngukum rawang-i ndŭg jŭ amai anak anak dari-i muko minyu arap rawan Aku. Eli puan ngara agi ndai simŭnŭ, pak ayŭh dŭh kijaman ngara.

¹⁴Ngapŭi Aku bipayu kidaan di rawang Eli nang mating sadis puan kah pinganggen re tungang kadi dosa adi raru sipŭ anŭ.”

¹⁵Samuel babŭ di ambok ndŭg jawa; komŭnŭ ayŭh makat ka kuka tiban tiban ramin TUHAN. Ayŭh taru re kidaan di Eli kayuh adi-i kiris ka dingah adi keya ka darŭm pŭmŭh.

¹⁶Eli bagan ayŭh, “Samuel, anak ku!” “Ani, tuan,” Samuel nan.

¹⁷“Ani nang TUHAN di kuu?” Eli siken. “Dŭhnyah miman tadŭ tadŭ kayuh so aku. Tapa re bandar bandar ngukum kuu kambŭi kuu dŭh kidaan di aku sopŭrŭg kayuh adi nang-I.”

¹⁸Jadi Samuel kidaan di ayŭh sopŭrŭg-i. Sopŭrŭg-i ayŭh dŭh miman. Eli nang, “Ayŭh anŭ TUHAN; Ayŭh re ndai tadŭ mun kayuh adi sŭn-i nang kana.”

¹⁹Buang Samuel masang baga bigatung, TUHAN agi ngga ayŭh ka bada bitŭtŭk barang masam kayuh adi Samuel nang.

²⁰Jadi sopŭrŭg daya Israel, so bŭngŭn ndi ndŭg bŭngŭn andi rais anŭ, puan nang Samuel inŭh sawŭ nabi TUHAN.

²¹TUHAN pijuu pinandŭng adŭp-I di Shiloh, di yŭn-I ko pinandŭng adŭp-I di Samuel ka ko minyu ngga ayŭh. Ka kan Samuel minyu, sopŭrŭg Israel nyiringa.