Read Biatah Bidayuh 1 SAMUEL 4 Bible Online

1 SAMUEL 4 - Biatah Bidayuh bible

1 SAMUEL 4

¹Di tipuh anŭ bara soldadu daya Philistine mbŭh tikuruk re biperang rawan soldadu daya Israel, jadi[12] bara soldadu daya Israel mbŭh matak di rawan ngara. Bara soldadu daya Israel mbŭh pijog bari ngara di Ebenezer, ka bara soldadu daya Philistine pijog tung ngara di Aphek.

²Bara soldadu daya Philistine nyerang bara soldadu daya Israel, ka ripas bisaad ngara mbŭh ngarah bara soldadu daya Israel ka mbŭh siŭ kurang rabis pat ribu naan daya di tarun yŭn biperang.

³Kan bara soldadu daya Israel adi gibabŭ udip pari ka tarun yŭn ngara bibari, bara pinguru Israel nang, “Mani TUHAN bada soldadu daya Philistine ngarah ata andu ati? Ja ata di tambit Pati Simanya TUHAN so Shiloh, isa Ayŭh[13] bisa sua ngga ata ka nyiramat ata so bara pinganyu ta.”

⁴ Jadi ngara pait pinyisung ka Shiloh bada di tambit Pati Simanya TUHAN Bisa-pŭrŭg, adi bitakta di tunduh cherubim.[14] Ka anak Eli adi duwŭh madis, Hophni ngga Phinehas, mandŭg taban Pati Simanya anŭ.

⁵Kan Pati Simanya mbŭh mandŭg, bara soldadu Israel bandar bandar nyirais ngga gaŭn ndŭg ka tana bigugoh.

⁶Bara soldadu Philistine dingah sirais ngara ka nang, “Dingah dudu sirais anŭ di bari daya Hebrew! Ani meh rati-i?” Kan ngara mbŭh puan nang Pati Simanya TUHAN mbŭh agi ndŭg bari bara soldadu Hebrew,

⁷ngara mbŭh taru ka nang, “Agi tapa mandŭg ka bari ngara! Mbŭh arah meh ata! Mating kayuh mun ati jadi di ata dawŭ-i!

⁸Asi tungang nyiramat ata so tapa tapa adi bikuasa anŭ? Anŭ inŭh tapa tapa adi muko siŭ bara daya Egypt di tarun tana-pajam!

⁹Dŭhnyah taru, angān soldadu daya Philistine! Birawan mun dari! Kambŭi dŭh, ata re jadi urun daya Hebrew, nimun ngara muko jadi urun ta dawŭ-i. Ngapŭi birawan mun dari nŭŭh!”

¹⁰Bara soldadu daya Philistine bandar bandar birawan ka ngarah bara soldadu daya Israel. Bara soldadu daya Israel bu pari ka bari ngara, amai ngara mbŭh bana arah. Agi 30,000 naan soldadu daya Israel dog siŭ.

¹¹Pati Simanya Tapa mbŭh dog sirapas, ka anak Eli, Hophni ngga Phinehas, mbŭh dog siŭ.

¹²Ndi naan daya so tibaran-asar Benjamin bikaduh so tarun adi yŭn biperang di ka Shiloh, ka mbŭh ndŭg nŭ andu anŭ gŭh. Ngga kiren atin susah-i ayŭh nyiratak piraka-i ka na tana di ubak-i.

¹³Eli, adi mbŭh raru gapang pasar Pati Simanya anŭ, agi guru di baku di pang aran nyidŭngŭ. Dari anŭ piagah agah anŭ di barang yŭn darŭm kupo, ka barang naan daya sien buang taru.

¹⁴Eli dingah dudu anŭ ka siken, “Dudu ani anŭ sakanŭ?” Daya anŭ rikas tudu Eli ka kidaan agah anŭ di ayŭh. (

¹⁵Nganŭ Eli mbŭh prii puru mai sawa umbur-i, ka mbŭh batang karak bandar.)

¹⁶Daya anŭ nang, “Aku bu pirupas adŭp ku so bisaad anŭ ka mbŭh bikaduh ndi aran aran kamati andu ati.” Eli siken ayŭh, “Ani mbŭh jadi, nak?”

¹⁷Daya anŭ adi taban agah nam, “Bara soldadu Israel mbŭh bu mangān bara soldadu Philistine. Ata mbŭh bana dog ngarah! Ka dinge, anak mai Hophni ngga Phinehas mbŭh dog siŭ, ka Pati Simanya Tapa mbŭh dog sirapas!”

¹⁸Kan dari anŭ nyabŭt Pati Simanya, Eli rabu sidakak so baku-i sindŭk tiban-bās kupo. Ayŭh mbŭh paŭh minyamba buang gamu, ka pinyirabu-i bada tungo-i pata ka-i kabŭs. Ayŭh jadi pinguru di Israel sitian pat puru sawa.

¹⁹Iban Eli, sawŭn Phinehas, mbŭh bite, ka tipuh adi ngga-i re biranak mbŭh raru sindŭk. Kan-i dingah Pati Simanya Tapa mbŭh dog sirapas, ka damŭh-i ngga banŭh-i mbŭh kabŭs, ayŭh rasu naman tain-i ka biranak.

²⁰Darŭm ayŭh mbŭh re kabŭs, bara dayung adi turung ayŭh nang di ayŭh, “Dŭhnyah taru! Dari anak mu!” Pak ayŭh dŭh piduri kayuh adi nang ngara ka dŭh nam ngara.

²¹Ayŭh kadŭn anak dari-i Ichabod,[15] nang-i, “Bragah Tapa mbŭh tingge Israel” -- rati-i Pati Simanya mbŭh dog sirapas, ka damŭh-i ngga banŭh-i mbŭh kabŭs.

²²Ayŭh nang, “Bragah Tapa mbŭh tingge Israel, amai Pati Simanya Tapa mbŭh dog sirapas.”