Read Biatah Bidayuh 1 SAMUEL 6 Bible Online

1 SAMUEL 6 - Biatah Bidayuh bible

1 SAMUEL 6

¹Kan Pati Simanya TUHAN mbŭh ju buran di Philistia,

²bara daya bagŭ bagan bara imam ngga bara pinanung ka siken, “Simuki ata re ngga Pati Simanya TUHAN anŭ? Kambŭi ata pari-i ka yŭn adŭp-i, ani patut ata pait samah-i?”

³Ngara nam, “Kambŭi angān pari Pati Simanya Tapa Israel, angān dŭh siŭn dŭh pait-i ngga pinganggen ka Ayŭh ngga nubos dosa ngan. Pati Simanya anŭ dŭh siŭn pari dŭh ngga pinganggen. Simŭnŭ angān bisa dog pibua, ka angān re puan mani Ayŭh dŭh ko ko ngukum angān.”

⁴“Ani pinganggen patut ami pait ka Ayŭh?” daya bagŭ siken. Ngara nam, “Rimŭh panggar suto-gayŭn pirakis mas ngga rimŭh pŭrŭng suto-gayŭn babu mas, ndi yŭn barang naan raja Philistine adi rimŭh naan. Sesak-andam anŭ mbŭh dog sopŭrŭg ngan samŭn rimŭh naan raja anŭ.

⁵Angān dŭh siŭn dŭh ndai suto-gayŭn pirakis ngga suto-gayŭn babu anŭ adi nyerang rais ngan, ka angān dŭh siŭn dŭh nggen stabi di Tapa Israel. Kadŭ Ayŭh an ko ngukum angān, tapa tapa ngan ngga tana ngan.

⁶Mani angān sah paŭh baking mun raja Egypt ngga bara daya-i? Dŭhnyah kambŭt munki Tapa nyibudo ngara ndŭg ka ngara mbŭh nyibandar daya Israel bu so Egypt.

⁷Ngapŭi meh, sidia ndi krita-sapi adi bauh ngga duwŭh sapi adi gi-bŭn dog bada nyiraja; ngatur ngara di krita-sapi anŭ yŭn-i tarik, ko anŭ taban anak anak sapi ngga pari ka kandang-i.

⁸Tambit Pati Simanya TUHAN, na-i di krita-sapi anŭ, ka na di darŭm ndi pati adi ngapid Pati Simanya anŭ suto-gayŭn pirakis mas ngga suto-gayŭn babu mas anŭ adi angān re pait ndu pinganggen ka TUHAN ngga nubos dosa ngan. Bada krita-sapi ngga sapi sapi anŭ panu ka tandah-i panu sadi adŭp-i.

⁹Komŭnŭ, ngatin pimanu-i; kambŭi pimanu-i nuju kupo Beth Shemesh, sirati-i taŭn Tapa Israel adi pait sesak-andam adi bisā anŭ bada dog ata. Pak kambŭi dŭh, ata re puan nang Tapa Israel dŭh inŭh adi pait andam anŭ. Anŭ mbŭh andam adi tipia timbur sadi adŭp-i.”

¹⁰Ngara ndai nimun adi mbŭh dog kidaan: ngara tambit sapi sapi anŭ ka ngatur-i di krita-sapi yŭn re tarik, ka kurung anak anak-i darŭm kandang.

¹¹Ngara na Pati Simanya anŭ darŭm krita-sapi, samah ngga pati adi brisi ngga suto-gayŭn babu mas ngga suto-gayŭn pirakis mas anŭ.

¹²Sapi sapi anŭ piguru panu di aran nuju Beth Shemesh, panu radus tŭnggŭn kamanŭ ka dŭh biruit bu so aran. Sapi sapi anŭ pira-muu adŭp-i buang panu. Raja Philistine adi rimŭh naan tunda sapi sapi anŭ panu jeh ndŭg baat Beth Shemesh.

¹³Bara daya Beth Shemesh agi aŭn ngatŭm gandom di rubān, kan ngara kiris Pati Simanya anŭ. Ngara mbŭh ruai gaŭn kan ngara kiris-i.

¹⁴Krita sapi anŭ rŭŭ sindŭk ndi tibande batuh di ŭmŭh ndi naan daya dŭn Joshua, adi rŭŭ di Beth Shemesh. Bara daya japa krita-sapi anŭ adi dog ndai so kayuh ka siŭ sapi sapi anŭ ka jugan-i ndu sadis badang ka TUHAN.

¹⁵Bara daya Levi tunduk Pati Simanya samŭn pati anŭ adi brisi ngga suto-gayŭn pirakis mas ngga suto-gayŭn babu mas, ka pasan dudu kayuh anŭ di tunduh tibande batuh anŭ. Komŭnŭ daya Beth Shemesh jugan sadis sadis badang ngga sadis sadis adi bŭkŭn ka TUHAN.

¹⁶Raja Philistine adi rimŭh naan nyibatŭh ngara ndai anŭ ka komŭnŭ ngara pari ka Ekron andu anŭ gŭh.

¹⁷Bara daya Philistine pait rimŭh panggar suto-gayŭn pirakis mas anŭ ka TUHAN ndu pinganggen ngga nubos dosa ngara, ndi panggar yŭn barang kupo anŭ adi rimŭh: Ashdod, Gaza, Ashkelon, Gath, ngga Ekron.

¹⁸Ngara pait gŭh rimŭh panggar suto-gayŭn babu mas anŭ: ndi yŭn barang kupo adi dog mritah rimŭh naan raja Philistine, kupo kupo adi bikuta ngga anak anak kupo adi dŭh bikuta. Tibande batuh anŭ adi di ŭmŭh Joshua daya Beth Shemesh, adi yŭn ngara pasan Pati Simanya gibabŭ agi diginŭ jadi saksi kayuh adi mbŭh jadi.

¹⁹TUHAN siŭ 70 naan daya Beth Shemesh sabab ngara tingga darŭm Pati Simanya anŭ. Ka daya ngurid amai TUHAN mbŭh bada raru bagŭ daya kabŭs di dupan ngara.

²⁰Jadi meh, bara daya Beth Shemesh nang, “Asi re tan nyindŭk TUHAN, Tapa kudus? Kamaki ata patut pait Ayŭh ngga ata pijo Ayŭh so adŭp ta?”

²¹Ngara pait pinyisung ka daya di Kiriath Jearim bada nang di ngara, “Daya Philistine mbŭh pari Pati Simanya TUHAN. Mandŭg kamati di tambit-i.”