Read Biatah Bidayuh 1 SAMUEL 8 Bible Online

1 SAMUEL 8 - Biatah Bidayuh bible

1 SAMUEL 8

¹Kan Samuel mbŭh minyamba, ayŭh tijuan anak anak dari-i jadi akim di Israel.

²Adi pinuai, dŭn-i Joel, ka sude-i dŭn Abijah; ngara jadi akim di Beersheba.

³Pak ngara dŭh tunda danding sama ngara; ngara gruwŭn adŭp-i dapŭd duit adŭ, sabab anŭ meh ngara trima suap ka dŭh nyirase har daya ngga batur.

⁴Komŭnŭ sopŭrŭg pinguru Israel mandŭg tikuruk, di ka yŭn Samuel di Ramah,

⁵ ka nang di ayŭh, “Tingga, kaam mbŭh jadi makin minyamba, ka anak anak mai mbŭh dŭh tunda danding mai. Ngapŭi meh, tijuan ndi naan raja yŭn ami, isa kieh biyŭn raja mun rais adi bŭkŭn.”

⁶Samuel mbŭh dŭh munos asŭng-i di pimite ngara; jadi ayŭh bidua ka TUHAN,

⁷ka TUHAN nang, “Dingah nŭh barang masam kayuh adi daya nang di kuu. Dŭh-i kuu adi ngara mbŭh tirawan; Aku ati inŭh adi abah ngara trima bada jadi raja ngara.

⁸So jaman Aku taban ngara ruah so Egypt, ngara mbŭh nyipunok Aku ka nyambah tapa tapa adi bŭkŭn; ka madin ngara mbŭh ndai di kuu kayuh adi ngara ari ndai di Aku.

⁹Ngapŭi-i meh, dingah nŭh pinganang ngara, pak bakan ngara ka kidaan munki raja re ngga ngara.”

¹⁰Samuel kidaan di bara daya adi mite raja, sopŭrŭg kayuh adi TUHAN muko kidaan di ayŭh.

¹¹“Simuti inŭh raja ngan re ngga angān,” Samuel nang di ngara. “Ayŭh re bada anak anak dari ngan jadi soldadu; kada so ngara re jadi soldadu adi pimanu krita kuda perang, ka adi bŭkŭn jadi soldadu pinunggang kuda, ka adi bŭkŭn re tukang bikaduh di jawin krita kuda perang-i.

¹²Ayŭh re bada kada so ngara jadi pingubak adi nguasa siribu naan soldadu, ka adi bŭkŭn nguasa rimŭh puru naan. Anak anak dari ngan re dog bada majak ŭmŭh-i, ngatŭm buwa di ŭmŭh-i, ka ndai sinyata ngga pingakas yŭn krita kuda perang-i.

¹³Bara anak dayung ngan re tukang ndai wangi yŭn-i, ka nyiraja jadi tukang tanŭk ngga tukang ndai ruti.

¹⁴Ayŭh re tambit teya ngan adi siabo kana, teya anggor, ngga teya kanā, ka nggen-i di bara pinurung-i.

¹⁵Ayŭh re tambit ndi utung-so-simŭng gandom ngga buwa anggor ngan yŭn bara pinurung istana-i ngga bara daya gaji-i.

¹⁶Ayŭh re tambit daya daya-gaji ngan ngga dāng kudip[17] ngan adi siabo kana, samŭn kaldi ngan, ka bada ngara nyiraja yŭn adŭp-i.

¹⁷Ayŭh re tambit ndi utung-so-simŭng so biri biri ngan. Ka adŭp ngan re jadi urun-i.

¹⁸Kan tipuh anŭ mbŭh mandŭg, angān re mingungut pasar raja ngan anŭ, adi adŭp ngan muko mien; pak TUHAN dŭh re piduri pingadu ngan.”

¹⁹Bara daya bagŭ abah dingah pinganang Samuel, pak tanŭ ka nang, “Dŭh! Kieh raan raja,

²⁰isa kieh mun bangsa daya bŭkŭn, biyŭn raja adŭp ami adi mritah kieh ka nguru kieh matak biperang.”

²¹Samuel nyiringa barang sak kayuh adi ngara nang, komŭnŭ di kidaan ka TUHAN.

²²TUHAN nam, “Ndai nŭh anŭ adi ngara raan, ka nggen raja di ngara.” Komŭnŭ Samuel kidaan di sopŭrŭg daya Israel bada mari ka ramin ngara.