Read Biatah Bidayuh 1 SAMUEL 9 Bible Online

1 SAMUEL 9 - Biatah Bidayuh bible

1 SAMUEL 9

¹Agi ndi naan daya adi kaya buang stabi daya dieh, dŭn Kish, so tibaran-asar Benjamin; ayŭh anŭ anak Abiel ka sukuh Zeror, ka so rawang Becorath, adi kada manak Aphiah.

²Ayŭh biyŭn ndi anak dari dŭn Saul, bujang adi piayong buang piaŭn. Ayŭh anŭ bigatung dŭ ajog-i so daya bŭkŭn di Israel buang piayong dŭ gŭh.

³Agi ndi sidah, kudu kudu kaldi adi dog dapu Kish rupas, jadi ayŭh nang di Saul, “Taban ndi naan so daya daya-gaji adi bŭkŭn ngga di jiroh kaldi kaldi anŭ.”

⁴Ngara di jiroh mutas rais tarun tana sandah Ephraim ngga di abong Shalishah, pak dŭh tungang dapŭd. Ngara panu jeh di ka abong Shaalim, pak kaldi kaldi anŭ mating diginŭ. Komŭnŭ ngara mutas tarun tana Benjamin, pak babŭ gŭh dŭh dapŭd-i.

⁵Kan ngara mbŭh ndŭg abong tarun Zuph, Saul nang di daya gaji-i, “Ja gŭh ata mari, te ka sama ku mbŭh dŭh tia bipikir pasar kaldi anŭ ka piguru gapang di ata.”

⁶Daya-gaji anŭ nam, “Kajŭn dawŭ! Di kupo ati agi ndi naan daya adi kudus, adi raru stabi daya dieh sabab sopŭrŭg kayuh adi nang-i jadi bitŭtŭk. Ja di ka yŭn-i, amai kadŭ ayŭh bisa kidaan di ata tarun yŭn ata bisa dapŭd kaldi kaldi anŭ.”

⁷“Kambŭi ata di ka yŭn-i, ani re ta nggen di ayŭh?” Saul siken. “Pinguman mbŭh mating tia darŭm kandi ta, ka ata dŭh gŭh biyŭn ani ani re ata nggen di ayŭh, dŭh kah?”

⁸Daya-gaji anŭ nam, “Aku agi ndi kiping duit pirak. Aku bisa nggen-i di ayŭh, ka ayŭh re kidaan di ata tarun yŭn ata bisa dapŭd kaldi kaldi anŭ.”

⁹Saul nam, “Kana garang! Ja ata di.” Jadi ngara di meh ka kupo anŭ adi yŭn daya kudus anŭ rŭŭ. Darŭm ngara maad sandah nuju kupo anŭ, ngara bidapŭd ngga kudu kudu naan bujang dayung re di pēn piin. Ngara siken so bara dayung anŭ, “Agi kah sitingga di kupo?” (Di jaman anŭ, nabi dog kadŭn sitingga; jadi kambŭi daya an siken kayuh di Tapa, daya nang, “Ja ata di dapŭd sitingga”)

¹²“Agi ayŭh,” bara dayung anŭ nam. “Sibatur-i, ayŭh agi panu di jawin diŭ so angān. Kambŭi angān rikas panu, angān re nyandat ayŭh. Angān re dapŭd ayŭh, kan angān mbŭh mŭrŭt kupo. Ayŭh mandŭg ka kupo andu ati sabab daya re jugan sadis di mija-sambah di tibung sandah. Bara daya adi dog bagan dŭh re piguru man ndŭg ka ayŭh mbŭh mandŭg, sabab ayŭh re nyiberkat sadis anŭ diŭ. Kambŭi angān di madin, angān re dapŭd ayŭh diŭ so-i maad sandah anŭ di man.”

¹⁴Jadi Saul ngga daya gaji-i di ka kupo, ka darŭm ngara mŭrŭt, ngara kiris Samuel panu nuju ngara re di ka tarun yŭn bisambah.

¹⁵Di andu adi diŭ so anŭ, TUHAN agi kidaan di Samuel,

¹⁶“Sipagi ngga arong munti andu Aku re pait ka yŭn mu ndi naan daya so tibaran-asar Benjamin; nginyo ayŭh ngga nandā ayŭh adi jadi raja daya Ku. Ayŭh re pirupas ngara so daya Philistine. Aku mbŭh kiris daya Ku sangsara ka mbŭh dingah sien ngara mite turung.”

¹⁷Kan Samuel kiris Saul, TUHAN nang di ayŭh, “Siati inŭh daya adi Aku ko kidaan di kuu. Ayŭh re mritah daya Ku.”

¹⁸Komŭnŭ Saul di tudu Samuel, adi mbŭh sindŭk tiban-bās kupo, ka siken, “Kidaan di aku, diki sitingga rŭŭ?”

¹⁹Samuel nam, “Aku ati inŭh ayŭh. Panu angān diŭ di ka tarun yŭn bisambah. Angān duwŭh re man ngga aku andu ati. Isan isan sipagi aku re nam sopŭrŭg pinyiken mu, komŭnŭ kuu bisa mari.

²⁰Jeja ka kaldi kaldi anŭ adi mbŭh taruh andu manyap, dŭhnyah gapang; kaldi kaldi anŭ mbŭh dog dapŭd. Pak asi meh sianŭ adi daya Israel mbŭh raru raan?[18] Kuu inŭh -- kuu ngga rawang sama mu.”

²¹Saul nam, “Aku ati so tibaran-asar Benjamin, tibaran-asar adi siabo sŭ di Israel, ka rawang ku inŭh adi siabo dŭh biyŭn dŭn darŭm tibaran-asar anŭ. Mani meh kaam sakanŭ minyu ngga aku?”

²²Komŭnŭ Samuel taban Saul ngga daya gaji-i ka darŭm ndi birit adi bayah ka bada ngara duwŭh guru di yŭn adi numbor ndi di mija bara daya adi muko dog bagan. Kurang rabis, agi taruh puru naan daya mbŭh guru diginŭ.

²³Samuel nang di daya tukang tanŭk, “Taban pire dagin anŭ adi aku muko nggen di kuu, adi aku mbŭh bada kuu nyidŭrŭ nyikŭn.”

²⁴Jadi daya tukang tanŭk taban pire dagin pŭŭh adi siabo kana anŭ ka nggen-i di Saul. Samuel[19] nang, “Tingga, ati inŭh pire adi mbŭh dog nitah yŭn mu. Man nŭh. Aku muko nitah-i yŭn mu isa kuu man-i madin ngga ngara ati adi muko dog bagan.”[20] Ka Saul meh man ngga Samuel di andu anŭ.

²⁵Kan ngara mbŭh mūn so tarun yŭn bisambah di ka kupo, ngara mamad ambok yŭn Saul[21] di tibung ramin,[22]

²⁶ka ayŭh bŭŭs diginŭ.[23] Ngga siri jawa Samuel bagan Saul di tibung ramin, “Makat meh, aku re nguru angān matak.” Saul makat, ka ayŭh ngga Samuel samah matak.

²⁷Kan ngara mbŭh ndŭg bŭngŭn kupo, Samuel nang di Saul, “Bada daya-gaji mu panu diŭ.” Daya-gaji anŭ panu diŭ, ka Samuel pijuu minyu, “Rŭŭ digiti nyitiro dawŭ-i, ka aku re kidaan di kuu kayuh adi Tapa ko nang.”