Read Bíbélì Mímọ́ ní Èdè Yorùbá Òde-Òní Ìwé Sámúẹ́lì Kejì 24 Bible Online

Ìwé Sámúẹ́lì Kejì 24 - Bíbélì Mímọ́ ní Èdè Yorùbá Òde-Òní bible

Ìwé Sámúẹ́lì Kejì 24

¹ Ìbínú OLÚWA sì ru sí Ísírẹ́lì, ó sì ti Dáfídì sí wọn, pé, “Lọ ka iye Ísírẹ́lì àti Júdà!”

²Ọba sì wí fún Jóábù Olórí ogun, tí ń bẹ lọ́dọ̀ rẹ̀ pé, “Lọ ní ìsinsìnyìí sí gbogbo ẹ̀yà Ísírẹ́lì láti Dánì títí dé Bíásébà, kí ẹ sì ka iye àwọn ènìyàn, kí èmi lè mọ iye àwọn ènìyàn náà!”

³Jóábù sì wí fún ọba pé, “Kí OLÚWA Ọlọ́run rẹ fi kún ìye àwọn ènìyàn náà, ìyekíye kí ó wù kí wọn jẹ́, ní ọrọrún, ojú OLÚWA mi ọba yóò sì rí i: ṣùgbọ́n èétiṣe tí OLÚWA mi ọba fi fẹ́ nǹkan yìí?”

⁴Ṣùgbọ́n ọ̀rọ̀ ọba borí ti Jóábù, àti ti àwọn olórí ogun. Jóábù àti àwọn olórí ogun sì jáde lọ kúrò níwájú ọba, láti lọ ka àwọn ènìyàn Ísírẹ́lì.

⁵Wọ́n sì kọjá odò Jọ́dánì, wọ́n sì pàgọ́ ní Áróérì, ní ìhà apá ọtún ìlú tí ó wà láàrin àfonífojì Gádì, àti sí ìhà Jásérì.

⁶Wọ́n sì wá sí Gílíádì, àti sí ilé Tátímhódíṣì; wọ́n sì wá sí Dan-Jaanì àti yíkákiri sí Sídónì,

⁷Wọ́n sì wá sí ìlú olodi Tírè, àti sí gbogbo ìlú àwọn Hífì, àti ti àwọn ará Kénánì: wọ́n sì jáde lọ síhà gúsù ti Júdà, àní sí Bééríṣébà.

⁸Wọ́n sì la gbogbo ilẹ̀ náà já, wọ́n sì wá sí Jérúsálẹ́mù ní òpin oṣù kẹsàn-án àti ogúnjọ́.

⁹Jóábù sì fi iye tí àwọn ènìyàn náà jásí lé ọba lọ́wọ́: ó sì jẹ́ òjì ọ̀kẹ́ ọkùnrin alágbára ní Ísírẹ́lì, àwọn onídà: àwọn ọkùnrin Júdà sì jẹ́ ọkẹ mẹ́ẹ̀dọ́gbọ̀n ènìyàn.

¹⁰Àyà Dáfídì sì gbọgbẹ́ lẹ́yìn ìgbà tí ó ka àwọn ènìyàn náà tán. Dáfídì sì wí fún OLÚWA pé, “Èmi ṣẹ̀ gidigidi ní èyí tí èmi ṣe: ṣùgbọ́n, èmi bẹ̀ ọ, OLÚWA, fi ẹ̀ṣẹ̀ ìránṣẹ́ rẹ jìn ní, nítorí pé èmi hùwà aṣiwèrè gidigidi!”

¹¹Dáfídì sì dìde ní òwúrọ̀, ọ̀rọ̀ OLÚWA sì tọ Gádì wòlíì wá, aríran Dáfídì wí pé:

¹²“Lọ kí o sì wí fún Dáfídì pé, ‘Bàyìí ni OLÚWA wí, èmi fi nǹkan mẹ́ta lọ̀ ọ́; yan ọ̀kan nínú wọn, kí èmi ó sì ṣe é sí ọ.’ ”

¹³Gádì sì tọ Dáfídì wá, ó sì bi í léèrè pé, “Kí ìyàn ọdún méje ó tọ̀ ọ́ wá ní ilẹ̀ rẹ bí? Tàbí kí ìwọ máa sá ní oṣù mẹ́ta níwájú àwọn ọ̀ta rẹ, nígbà tí wọn ó máa lé ọ? Tàbí kí àrun ìparun ijọ́ mẹ́ta ó wá sí ilẹ̀ rẹ? Ròó nísinsin yìí, kí o sì mọ èsì tí èmi ó mú padà tọ ẹni tí ó rán mi.”

¹⁴Dáfídì sì wí fún Gádì pé, “Ìyọnu ńlá bá mi. Jẹ́ kí a fi ara wa lé OLÚWA lọ́wọ́; nítorí pé àánú rẹ̀ pọ̀; kí ó má sì ṣe fi mí lé ènìyàn lọ́wọ́.”

¹⁵OLÚWA sì rán àrùn ìparun sí Ísírẹ́lì láti òwúrọ̀ títí dé àkókò tí a dá: ẹgbàá márùndínlógójì ènìyàn sì kú nínú àwọn ènìyàn náà láti Dánì títí fi dé Bééríṣébà.

¹⁶Nígbà tí ańgẹ́lì náà sì nawọ́ rẹ̀ sí Jérúsálẹ́mù láti pa á run, OLÚWA sì káàánú nítorí ibi náà, ó sì sọ fún ańgẹ́li tí ń pá àwọn ènìyàn náà run pé, “Ó tó, dá ọwọ́ rẹ dúró wàyìí!” Ańgẹ́lì OLÚWA náà sì wà níbi ìpakà Áráúnà ará Jèbúsì.

¹⁷Dáfídì sì wí fún OLÚWA nígbà tí ó rí ańgẹ́li tí ń kọlu àwọn ènìyàn pé, “Wò ó, èmi ti ṣẹ̀, èmi sì ti hùwà búburú ṣùgbọ́n àwọn àgùntàn wọ̀nyí, kín ni wọ́n ha ṣe? Jẹ́ kí ọwọ́ rẹ, èmi bẹ̀ ọ́, kí ó wà lára mi àti ìdílé baba mi.”

¹⁸Gádì sì tọ Dáfídì wá lọ́jọ́ náà, ó sì wí fún un pé, “Gòkè, tẹ́ pẹpẹ kan fún OLÚWA níbi ìpakà Áráúnà ará Jébúsì.”

¹⁹Gẹ́gẹ́ bí ọ̀rọ̀ Gádì, Dáfídì sì gòkè lọ bí OLÚWA ti pa á láṣẹ.

²⁰Áráúnà sì wò, ó sì rí ọba àti àwọn ìránṣẹ́ rẹ̀ ń bọ̀ wá lọ́dọ̀ rẹ̀: Áráúnà sì jáde, ó sì wólẹ̀ níwájú ọba ó sì dojú rẹ̀ bolẹ̀.

²¹Áráúnà sì wí pé, “Nítorí kín ni OLÚWA mi ọba ṣe tọ ìránṣẹ́ rẹ̀ wá?” Dáfídì sì dáhùn pé, “Láti ra ibi ìpakà rẹ lọ́wọ́ rẹ, láti tẹ́ pẹpẹ kan fún OLÚWA, kí àrùn ìparun lè dá lára àwọn ènìyàn náà.”

²²Áráúnà sì wí fún Dáfídì pé, “Jẹ́ kí OLÚWA mi ọba ó mú èyí tí ó dára lójú rẹ̀, kí o sì fi í rúbọ: wò ó, màlúù nìyìí láti fi ṣe ẹbọ sísun, àti ohun èlò ìpakà, àti ohun èlò mìíràn ti màlúù fún igi.

²³Gbogbo nǹkan wọ̀nyí ni Áráúnà fi fún ọba, bí ọba. Áráúnà sì wí fún ọba pé, Kí OLÚWA Ọlọ́run rẹ ó gba ọrẹ rẹ.”

²⁴Ọba sì wí fún Áráúnà pé, “Bẹ́ẹ̀ kọ́; ṣùgbọ́n èmi ó rà á ní iye kan lọ́wọ́ rẹ, bí ó ti wù kí ó ṣe; bẹ́ẹ̀ ni èmi kì yóò fi èyí tí èmi kò náwó fún, rú ẹbọ sísun sí OLÚWA Ọlọ́run mi.” Dáfídì sì ra ibi ìpakà náà, àti àwọn màlúù náà ní àádọ́ta sékélì fàdákà.

²⁵Dáfídì sì tẹ́ pẹpẹ kan níbẹ̀ sí OLÚWA, ó sì rú ẹbọ sísun àti ti ìlàjà. OLÚWA sì gbọ́ ẹ̀bẹ̀ fún ilẹ̀ náà, àrùn náà sì dá kúrò ní Ísírẹ́lì.