Read Bíbélì Mímọ́ ní Èdè Yorùbá Òde-Òní Ìwé Jóòbù 12 Bible Online

Ìwé Jóòbù 12 - Bíbélì Mímọ́ ní Èdè Yorùbá Òde-Òní bible

Ìwé Jóòbù 12

¹Jóòbù sì dáhùn, ó sì wí pé:

²“Kò sí àní-àní níbẹ̀, ṣùgbọ́n ẹ̀yin ni àwọn ènìyàn náà, ọgbọ́n yóò sì kú pẹ̀lú yín!

³Ṣùgbọ́n èmi ní ìyè nínú gẹ́gẹ́ bí ẹ̀yin: èmi kò rẹ̀yìn sí i yín: àní, ta ni kò mọ gbogbo nǹkan wọ̀nyí?

⁴“Èmi dàbí ẹni tí a ń fi ṣe ẹlẹ́yà lọ́dọ̀ aládùúgbò rẹ̀, tí ó ké pe Ọlọ́run, tí ó sì dá a lóhùn: à ń fi olóòótọ́ ẹni-ìdúró-ṣinṣin rẹ́rìn-ín ẹlẹ́yà.

⁵Ẹ̀gàn ni ẹni-ò-tòsì, tí ẹsẹ̀ rẹ múra tan láti yọ, nínú ìró ẹni tí ara rọ̀.

⁶Àgọ́ àwọn ìgárá ń bẹ̀rù; àwọn tí ó sì ń mú Ọlọ́run bínú wà láìléwu, àwọn ẹni tí ó sì gbá òrìṣà mú ní ọwọ́ wọn.

⁷“Ṣùgbọ́n nísínyìí bí àwọn ẹranko léèrè, wọn o kọ́ ọ ní ẹ̀kọ́, àti ẹyẹ ojú ọ̀run, wọn ó sì sọ fún ọ.

⁸Tàbí ba ilẹ̀ àyé sọ̀rọ̀, yóò sì kọ́ ọ, àwọn ẹja inú òkun yóò sì sọ fún ọ.

⁹Ta ni kò mọ̀ nínú gbogbo nǹkan wọ̀nyí pé, ọwọ́ OLÚWA ni ó ṣe nǹkan yìí?

¹⁰Ní ọwọ́ ẹni tí ẹ̀mí ohun alààyè gbogbo gbé wà, Àti ẹ̀mí gbogbo aráyé.

¹¹Etí kì í dán ọ̀rọ̀ wò bí, Tàbí adùn ẹnu kì í sì í tọ́ oúnjẹ rẹ̀ wò bí?

¹²Àwọn arúgbó ni ọgbọ́n wà fún, Àti nínú gígùn ọjọ́ ni òye?

¹³“Pẹ̀lú rẹ Ọlọ́run ni ọgbọ́n àti agbára: Òun ni ìmọ̀ àti òye.

¹⁴Kíyèsí i, ó bì wó, a kò sì lè gbe ró mọ́; Ó ṣé ènìyàn mọ́, kò sì sí ìsísílẹ̀ kan.

¹⁵Kíyèsí i, ó dá àwọn omi dúró, wọ́n sì gbẹ; Ó sì rán wọn jáde, wọ́n sì sẹ̀ bo ilẹ̀ ayé yípo.

¹⁶Pẹ̀lú rẹ ni agbára àti ìṣẹ́gun; Ẹni tí ń sìnà àti ẹni tí ń mú ni sìnà, tirẹ̀ ni wọ́n ń ṣe.

¹⁷Ó mú àwọn ìgbìmọ̀ lọ ní ìhòòhò, A sì sọ àwọn onídàájọ́ di òmùgọ̀.

¹⁸Ó tú ìdè ọba, Ó sì fi mú àmùrè gbà wọ́n ní ọ̀já.

¹⁹Ó mú àwọn àlùfáà lọ ní ìhòòhò, Ó sì tẹ orí àwọn alágbára ba.

²⁰Ó mú ọ̀rọ̀ ẹnu ẹni ìgbẹ́kẹ̀lé kúrò, Ó sì ra àwọn àgbààgbà ní iyè.

²¹Ó bu ẹ̀gàn lu àwọn ọmọ ọlọ́là, Ó sì tú àmùrè àwọn alágbára.

²²Ó hú ìdí ohun ìjìnlẹ̀ jáde láti inú òkùnkùn wá, Ó sì mú òjìji ikú wá sínú ìmọ́lẹ̀.

²³Òun a mú orílẹ̀-èdè bí sí i, a sì run wọ́n; Òun a sọ orílẹ̀-èdè di ńlá, a sì tún ṣẹ̀ wọn kù.

²⁴Òun a gba àyà olú àwọn ènìyàn aráyé, A sì máa mú wọn wọ́ kiri nínú ijù níbi tí ọ̀nà kò sí.

²⁵Wọn a máa fi ọwọ́ ta ilẹ̀ nínú òkùnkùn níbi tí kò sí ìmọ́lẹ̀, Òun a sì máa mú wọn tàsé ìrìn bí ọ̀mùtí.