Read Bíbélì Mímọ́ ní Èdè Yorùbá Òde-Òní Ìwé Jóòbù 13 Bible Online

Ìwé Jóòbù 13 - Bíbélì Mímọ́ ní Èdè Yorùbá Òde-Òní bible

Ìwé Jóòbù 13

¹“Ò ó, ojú mi ti rí gbogbo èyí rí, Etí mí sì gbọ́, ó sì ti yé e.

²Ohun tí ẹ̀yin mọ̀, èmi mọ̀ pẹ̀lú, èmi kò rẹ̀yìn sí yin.

³Nítòótọ́ èmi ó bá Olódumárè sọ̀rọ̀, Èmi sì ń fẹ́ bá Ọlọ́run sọ àsọyé.

⁴Èyin ni oníhùmọ̀ èké, oníṣègùn lásán ni gbogbo yín

⁵Áà! ẹ̀yin kì bá kúkú dákẹ́! Èyi ni kì bá sì ṣe ọgbọ́n yín.

⁶Ẹ gbọ́ àwíyé mi nísinsìn yìí, Ẹ sì fetísilẹ̀ sí àròyé ètè mi.

⁷Èyin fẹ́ sọ ìsọkúsọ fún Ọlọ́run? Ki ẹ sì fi ẹ̀tàn sọ̀rọ̀ gbè é?

⁸Ẹ̀yin fẹ́ ṣojúṣaajú rẹ̀? Ẹ̀yin fẹ́ gbèjà fún Ọlọ́run?

⁹Ó ha dára tí yóò fi húdìí yín sílẹ̀, Tàbí kí ẹ̀yin tàn án bí ẹnìkan ti ítan ẹnìkejì?

¹⁰Yóò máa bá yín wí nítòótọ́, Bí ẹ̀yin bá ṣojúusájú ènìyàn níkọ̀kọ̀.

¹¹Ìwà ọlá rẹ̀ kì yóò bà yín lẹ́rù bí? Ìpayà rẹ̀ kì yóò pá yín láyà?

¹²Ìrántí yín dàbí eérú; Ìlú odi yín ìlú odi amọ̀.

¹³“Ẹ pa ẹnu yín mọ́ kúrò lára mi, kí èmi kí ó lè sọ̀rọ̀, ohun tí ń bọ̀ wá íbá mi, kí ó máa bọ̀.

¹⁴Ǹjẹ́ nítorí kí ni èmi ṣe ń fi èyín mi bu ẹran ara mi jẹ, Tí mo sì gbé ẹ̀mí mi lé ara mi lọ́wọ́?

¹⁵Bí ó tilẹ̀ pa mí, síbẹ̀ èmi ó máa gbẹ́kẹ̀lé e; Ṣùgbọ́n èmi ó máa tẹnumọ́ ọ̀nà mi níwájú rẹ̀.

¹⁶Èyí ni yóò sì ṣe ìgbàlà mi, Àgàbàgebè kì yóò wá síwájú rẹ̀.

¹⁷Ẹ gbọ́ ọ̀rọ̀ ẹnu mi ní ìfàyà balẹ̀, àti àṣọpé mí ni etí yín.

¹⁸Wò ó nísinsin yìí, èmi ti làdí ọ̀ran mi sílẹ̀; èmi mọ̀ pé a ó dá mi láre.

¹⁹Ta ni òun ti yóò bá mi ṣàròyé? Ǹjẹ́ nísinsìn yìí, èmi fẹ́ pa ẹnu mí mọ́, èmi ó sì jọ́wọ́ ẹ̀mi mi lọ́wọ́.

²⁰“Ṣùgbọ́n, má ṣe ṣe ohun méjì yìí sí mi, Nígbà náà ni èmi kì yóò sì fi ara mi pamọ́ kúrò fún ọ:

²¹Fa ọwọ́ rẹ sẹ́yìn kurò lára mi, má sì jẹ́ kí ẹ̀rù rẹ kí ó pá mi láyà.

²²Nígbà náà ni kí ìwọ kí ó pè, èmi o sì dáhùn; Ta ni jẹ́ kí ń máa sọ̀rọ̀, ki ìwọ kí ó sì dá mi lóhùn.

²³Mélòó ní àìṣedédé àti ẹ̀ṣẹ̀ mi? Mú mi mọ̀ ìrékọjá àti ẹ̀ṣẹ̀ mi.

²⁴Nítorí kí ni ìwọ ṣe pa ojú rẹ mọ́, tí o sì yàn mí ní ọ̀tá rẹ?

²⁵Ìwọ ó fa ewé ya ti afẹ́fẹ́ ń fẹ́ síhìn-ín sọ́hùn-ún? Ìwọ a sì máa lépa àkémọ́lẹ̀ pòròpórò gbígbẹ?

²⁶Nítorí pé ìwọ kọ̀wé ohun kíkorò sí mi, o sì mú mi ní àìṣedéédéé èwe mi.

²⁷Ìwọ kàn àbà mọ́ mi lẹ́ṣẹ̀ pẹ̀lú, ìwọ sì ń wò ipa ọ̀nà ìrìn mi ní àwòfín; Ìwọ sì ń fi ìlà yí gìgisẹ̀ mi ká.

²⁸“Àní, yí ẹni tí á ti run ká, bí ohun tí ó bu, Bí aṣọ tí kòkòrò jẹ bàjẹ́.