Read Bíbélì Mímọ́ ní Èdè Yorùbá Òde-Òní Ìwé Jóòbù 15 Bible Online

Ìwé Jóòbù 15 - Bíbélì Mímọ́ ní Èdè Yorùbá Òde-Òní bible

Ìwé Jóòbù 15

¹Ígbà náà ní Élífásì, ará Témà, dáhùn wí pé:

²“Ọlọ́gbọ́n a máa sọ̀rọ̀ ìmọ̀ asán, kí ó sì máa fi afẹ́fẹ́ ìlà oòrun kún ara rẹ̀ nínú?

³Òun lè máa fi àròyé sọ̀rọ̀ tí kò ní èrè, tàbí pẹ̀lú ọ̀rọ̀ nínú èyí tí kò lè fi ṣe rere?

⁴Ìwọ ṣá ìbẹ̀rù tì, ìwọ sì dí àdúrà lọ́nà níwájú Ọlọ́run.

⁵Nítorí pé ẹnu ara rẹ̀ ni ó jẹ́wọ́ ẹ̀ṣẹ̀ rẹ̀, ìwọ sì yàn ahọ́n alárékérekè ni ààyò.

⁶Ẹnu ara rẹ̀ ni ó dá lẹ́bi, kì í ṣe èmi; àní ètè ara rẹ̀ ni ó jẹ́rìí tì ọ́.

⁷“Ìwọ ha íse ọkùnrin tí a kọ́ bi? Tabì a há dá ọ ṣáájú àwọn òkè?

⁸Ìwọ gburòó àsírí Ọlọ́run rí, tàbí ìwọ ha dá ọgbọ́n dúró sọ́dọ̀ ara rẹ?

⁹Kí ni ìwọ mọ̀ tí àwa kò mọ̀? Òye kí ní ó yé ọ tí kò sí nínú wa?

¹⁰Eléwú ogbó àti ògbólógbòó ènìyàn wà pẹ̀lú wa, tí wọ́n gbójú baba rẹ lọ.

¹¹Ìtùnú Ọlọ́run ha kéré lọ́dọ̀ rẹ? Ọ̀rọ̀ kan sì ṣe jẹ́jẹ́ jù lọ́dọ̀ rẹ?

¹²Èéṣe ti àyà rẹ fi ń dà ọ kiri, kí ni n mú ojú rẹ se wàìwàì.

¹³Tí ìwọ fi yí ẹ̀mí rẹ padà lòdì sí Ọlọ́run, tí ó fi ń jẹ́ ki ọ̀rọ̀kọ́rọ̀ kí ó máa bọ́ ní ẹnu rẹ̀ bẹ́ẹ̀?

¹⁴“Kí ni ènìyàn tí ó fi mọ́? Àti ẹni tí a tinú obìnrin bí tí yóò fi ṣe olódodo?

¹⁵Kíyèsí i, òun (Ọlọ́run) kò gbẹ́kẹ̀lé àwọn ẹni mímọ́ rẹ̀, àní àwọn ọ̀run kò mọ́ ní ojú rẹ̀;

¹⁶Ańbọ̀tórí ènìyàn, ẹni ìríra àti eléèérìí, tí ń mù ẹ̀ṣẹ̀ bi ẹní mú omi.

¹⁷“Èmi ó fihàn ọ́: gbọ́ ti èmi; Èyí tí èmi sì rí, òun ni èmi ó sì sọ,

¹⁸tí àwọn ọlọ́gbọ́n ti pa ní ìtàn lati ọ̀dọ̀ àwọn baba wọn wá, ti wọ́n kò sì fi pamọ́,

¹⁹Àwọn tí a fi ilẹ̀ ayé fún nìkan, àlejò kan kò sì là wọ́n kọjá.

²⁰Ènìyàn búburú ń ṣe làálàá, pẹ̀lú ìrora, ní ọjọ́ rẹ̀ gbogbo, àti iye ọdún ní a dá sílẹ̀ fún aninilára.

²¹Ìró ìbẹ̀rù ń bẹ ní etí rẹ̀; nínú ìrora ni apanirun yóò dìde sí i.

²²O kò gbàgbọ́ pé òun ó jáde kúrò nínú òkùnkùn; a sì ṣà á sápákan fún idà.

²³Ó ń wò káàkiri fún oúnjẹ wí pé, níbo ní ó wà? Ó mọ̀ pé ọjọ́ òkùnkùn súnmọ́ tòsí.

²⁴Ìpọ́njú pẹ̀lú ìrora ọkàn yóò mú un bẹ̀rù, wọ́n ó sì sẹ́gun rẹ̀ bi ọba ti ímúra ogun.

²⁵Nítorí pé ó ti nawọ́ rẹ̀ jáde lòdì sí Ọlọ́run, ó sì múra rẹ̀ le lòdì sí Olódùmáarè,

²⁶Ó súre, ó sì fi ẹ̀yìn giga, àní fi ìké kòóko àpáta rẹ̀ tí ó nipọn kọlù ú.

²⁷“Nítorí tí òun fi ọ̀rá rẹ̀ bo ara rẹ̀ lojú, o sì ṣe jabajaba ọ̀rá sí ẹ̀gbẹ́ rẹ̀.

²⁸Òun sì gbé inú ahoro ìlú ìtakété, àti nínú iléyílé tí ènìyàn kò gbé mọ́, tí ó múra tán lati di àlàpà.

²⁹Òun kò lé ìlà, bẹ́ẹ̀ ohun ìní rẹ̀ kò lè dúró pẹ́; Bẹ́ẹ̀ kò lè mú pípé rẹ̀ dúró pẹ́ lórí ilẹ̀.

³⁰Òun kì yóò jáde kúrò nínú òkùnkùn; ọ̀wọ́ iná ni yóò jó ẹ̀ka rẹ̀, àti nípaṣẹ̀ ẹ̀mí ẹnu rẹ̀ ní yóò máa kọjá lọ kúrò.

³¹Kí òun kí ó má ṣe gbẹ́kẹ̀le asán, kí ó má sì ṣe tan ara rẹ̀ jẹ. Nítorí pé asán ní yóò jásí èrè rẹ̀.

³²A ó mú un ṣẹ ṣáájú pípẹ́ ọjọ́ rẹ̀, ẹ̀ka rẹ̀ kì yóò sì tutù.

³³Yóò sì gbọ̀n àìpọ́n èṣo rẹ̀ dànù bí i àjàrà, yóò sì rẹ̀ ìyanna rẹ̀ nù bí i ti igi Ólífì.

³⁴Nítorí pé ayọ̀ àwọn àgàbàgebè yóò túká, iná ní yóò sì jó àgọ́ àwọn tí ó fẹ́ràn àbẹ̀tẹ́lẹ̀.

³⁵Wọ́n lóyún ìwà ìkà, wọ́n sì bí ẹ̀ṣẹ̀, ikùn wọn sì pèṣè ẹ̀tàn.”