Read Bíbélì Mímọ́ ní Èdè Yorùbá Òde-Òní Ìwé Jóòbù 17 Bible Online

Ìwé Jóòbù 17 - Bíbélì Mímọ́ ní Èdè Yorùbá Òde-Òní bible

Ìwé Jóòbù 17

¹“Ẹ̀mí mi bàjẹ́, ọjọ́ mi ni a ti gé kúrú, ìsà òkú dúró dè mí.

²Nítòótọ́ àwọn ẹlẹ́yà h wà lọ́dọ̀ mi, ojú mi sì tẹ̀mọ́ ìmúnibínú wọn.

³“Ǹjẹ́ nísinsínyí, fi lélẹ̀ yàn onígbọ̀wọ́ fún mi lọ́dọ̀ rẹ; ta ni OLÚWA tí yóò le ṣe ààbò fún mi?

⁴Nítorí pé ìwọ ti ṣé wọ́n láyà kúrò nínú òyè; nítorí náà ìwọ kì yóò gbé wọn lékè.

⁵Ẹni tí ó fi àwọn ọ̀rẹ́ hàn fún ìgárá, òun ni ojú àwọn ọmọ rẹ̀ yóò mú òfo.

⁶“Ọlọ́run ti sọ mi di ẹni òwe fún àwọn ènìyàn; níwájú wọn ni mo dàbí ẹni ìtutọ́ sí ní ojú.

⁷Ojú mí ṣú bàìbàì nítorí ìbìnújẹ́, gbogbo ẹ̀yà ara mi sì dàbí òjìji.

⁸Àwọn olódodo yóò yanu sí èyí, ẹni aláìsẹ̀ sì bínú sí àwọn àgàbàgebè.

⁹Olódodo pẹ̀lú yóò di ọ̀nà rẹ̀ mú, àti ọlọ́wọ́ mímì yóò máa lera síwájú.

¹⁰“Ṣùgbọ́n bí ó ṣe ti gbogbo yín, ẹ yí padà, kí ẹ sì tún bọ̀ nísinsin yìí; èmi kò le rí ọlọgbọ́n kan nínú yín.

¹¹Ọjọ́ tí èmi ti kọjá, ìro mi ti fà já, àní ìro ọkàn mi.

¹²Àwọn ènìyàn wọn yí ìsọ́ òru di ọ̀sán; wọ́n ní, ìmọ́lẹ̀ súnmọ́ ibi tí òkùnkùn dé.

¹³Bí mo tilẹ̀ ní ìrètí, ipò òku ní ilé mi; mo ti tẹ́ ìbùsùn mi sínú òkùnkùn.

¹⁴Èmi ti wí fún ìdibàjẹ́ pé, ìwọ ni baba mi, àti fún kòkòrò pé, ìwọ ni ìyá mi àti arábìnrin mi,

¹⁵Ìrètí mi ha dà nísinsinyí? Bí ó ṣe ti ìrètí mi ni, ta ni yóò rí i?

¹⁶Yóò sọ̀kalẹ̀ lọ sínú ipò òkú, nígbà tí a jùmọ̀ sinmi pọ̀ nínú erùpẹ̀ ilẹ̀?”