Read Bíbélì Mímọ́ ní Èdè Yorùbá Òde-Òní Ìwé Jóòbù 18 Bible Online

Ìwé Jóòbù 18 - Bíbélì Mímọ́ ní Èdè Yorùbá Òde-Òní bible

Ìwé Jóòbù 18

¹Ígbà náà ni Bílídádì, ará Ṣúà, dáhùn, ó sì wí pé:

²“Nígbà wo ni ẹ̀yin yóò tó fi ìdí ọ̀rọ̀ tì; ẹ rò ó, nígbẹ̀yìn rẹ̀ ni àwa ó tó máa sọ

³Nítorí kí ni a ṣe ń kà wá sí bí ẹranko, tí a sì ń kà wá si bí ẹni ẹ̀gàn ní ojú yín?

⁴Ìwọ fa ara rẹ ya pẹ́rẹpẹ̀rẹ nínú ìbínú rẹ̀; kí a ha kọ ayé sílẹ̀ nítorí rẹ̀ bi? Tàbí kí a sí àpáta kúrò ní ipò rẹ̀?

⁵“Nítòótọ́ ìmọ́lẹ̀ ènìyàn búburú ni a ó pa kúrò, Ọ̀wọ́ iná rẹ̀ kì yóò sì tan ìmọ́lẹ̀.

⁶Ìmọ́lẹ̀ yóò di òkùnkùn nínú àgọ́ rẹ̀, fìtílà ẹ̀gbẹ́ rẹ̀ ni a ó sì pa pẹ̀lú.

⁷Ìrìn ẹṣẹ̀ agbára rẹ̀ yóò di fífọn; ìmọ́lẹ̀ òun tìkárarẹ̀ ni yóò bí i ṣubú.

⁸Nípa ẹ̀ṣẹ̀ òun tìkararẹ̀ ó ti bọ́ sínú àwọ̀n, ó sì rìn lóri okùn dídẹ.

⁹Tàkúté ni yóò mú un ní gìgísẹ̀, àwọn àwọ̀n tí a dẹ yóò sì ṣẹ́gun rẹ̀.

¹⁰A dẹkùn sílẹ̀ fún un lórí ilẹ̀, a sì wà ọ̀fìn fún un lojú ọ̀nà.

¹¹Ẹ̀rù ńlá yóò bà á ní ìhà gbogbo, yóò sì lé e dé ẹsẹ̀ rẹ̀.

¹²Àìlera rẹ̀ yóò di pipa fún ebi, ìparun yóò dìde dúró sí i nígbà tí ó bá ṣubú.

¹³Yóò jẹ ẹ̀yà ara rẹ̀; àkọ́bí ikú ni yóò jẹ agbára rẹ̀ run.

¹⁴A ó fà á tu kurò nínú àgọ́ tí ó gbẹ́kẹ̀lé, a ó sì mú un tọ ọba ẹ̀rù ńlá nì lọ.

¹⁵Yóò sì máa jókòó nínú àgọ́ rẹ̀ èyí tí í ṣe tirẹ̀; ìmí ọjọ́ ni a ó fún káàkiri ibùgbé rẹ̀.

¹⁶Gbòngbò rẹ̀ yóò gbẹ níṣàlẹ̀, a ó sì ké ẹ̀ka rẹ̀ kúrò lókè.

¹⁷Ìrántí rẹ̀ yóò parun kúrò ni ayé, kì yóò sí orúkọ rẹ̀ ní ìgboro ìlú.

¹⁸A ó sì lée láti inú ìmọ́lẹ̀ sí inú òkùnkùn, a ó sì lé e kúrò ní ayé.

¹⁹Kì yóò ní ọmọ tàbí ọmọ ọmọ nínu àwọn ènìyàn rẹ̀, Bẹ́ẹ̀ ni kò sí ẹnikẹ́ni tí yóò kù nínú agbo ilé rẹ̀.

²⁰Ẹnu yóò ya àwọn ìran ti ìwọ̀ oòrùn sí ìgbà ọjọ́ rẹ̀, gẹ́gẹ́ bí ẹ̀rù ìwárìrì ti í bá àwọn ìran ti ìlà oòrùn.

²¹Nítòótọ́ irú bẹ́ẹ̀ ni ibùgbé àwọn ènìyàn búburú Èyí sì ni ipò ẹni tí kò mọ̀ Ọlọ́run.”