Read Bíbélì Mímọ́ ní Èdè Yorùbá Òde-Òní Ìwé Jóòbù 19 Bible Online

Ìwé Jóòbù 19 - Bíbélì Mímọ́ ní Èdè Yorùbá Òde-Òní bible

Ìwé Jóòbù 19

¹Ígbà náà ni Jóòbù dáhùn, ó sì wí pé:

²“Yóò ti pẹ́ tó tí ẹ̀yin ó fi máa fi ìyà jẹ mí, tí ẹ̀yin ó fi máa fi ọ̀rọ̀ mi ní ìjàǹjá?

³Ìgbà mẹ́wàá ní ẹ̀yin ti ń gàn mí; ojú kò tìyín tí ẹ fi jẹ mí níyà.

⁴Kí a sì wí bẹ́ẹ̀ pé, mo sìnà nítòótọ́, ìsìnà mi wà lára èmi tìkáarami.

⁵Bí ó tilẹ̀ ṣe pé ẹ̀yin ó ṣògo si mi lórí nítòótọ́, tí ẹ ó sì máa fi ẹ̀gàn mi gún mí lójú,

⁶Kí ẹ mọ̀ nísinsin yìí pé, Ọlọ́run ni ó bì mí ṣubú, ó sì nà àwọ̀n rẹ̀ yí mi ká.

⁷“Kiyè sì í, èmi ń kígbe pe, ‘Ọwọ́ alágbára;’ ṣùgbọ́n a kò gbọ́ ti èmi; mo kígbe fún ìrànlọ́wọ́, bẹ́ẹ̀ ni kò sí ìdajọ́.

⁸Ó sọgbà dí ọ̀nà mi tí èmi kò le è kọjá, Ó sì mú òkùnkùn ṣú sí ipa ọ̀nà mi.

⁹Ó ti bọ́ ògo mi, ó sì sí adé kúrò ní orí mi.

¹⁰Ó ti bà mí jẹ́ ní ìhà gbogbo, ẹ̀mí sì pin; ìrètí mi ni a ó sì fàtu bí igi.

¹¹Ó sì tinábọ ìbínú rẹ̀ sími, ó sì kà mí sí bí ọ̀kan nínú àwọn ọ̀tá rẹ̀.

¹²Ẹgbẹ́ ogun rẹ̀ sì dàpọ̀ sí mi, wọ́n sì mọ odi yí mi ká, wọ́n sì yí àgọ́ mi ká.

¹³“Ó mú àwọn arákùnrin mi jìn nà sí mi réré, àti àwọn ojúlùmọ̀ mi di àjèjì sí mi pátapáta.

¹⁴Àwọn alájọbí mi fà sẹ́yìn, àwọn afaramọ́ ọ̀rẹ́ mi sì di onígbàgbé mi.

¹⁵Àwọn ará inú ilé mi àti àwọn ìránṣẹ́bìnrin mi kà mí sí àjèjì; èmi jásí àjèjì ènìyàn ní ojú wọn.

¹⁶Mo pe ìránṣẹ́ mi, òun kò sì dá mi lóhùn; mo fi ẹnu mi bẹ̀ ẹ́.

¹⁷Ẹ̀mí mi sú àyà mi, àti òòrun mi sú àwọn ọmọ inú ìyá mi.

¹⁸Àní àwọn ọmọdé kùnrin fi mí ṣẹ̀sín: Mo dìde, wọ́n sì sọ̀rọ̀ ẹ̀gàn sí mi.

¹⁹Gbogbo àwọn ọ̀rẹ́ kòríkòsùn mi kórìíra mi, àwọn olùfẹ́ mi sì kẹ̀yìndà mí.

²⁰Egungun mi lẹ̀ mọ́ ara mi àti mọ́ ẹran ara mi, mo sì bọ́ pẹ̀lú awọ eyín mi.

²¹“Ẹ ṣáànú fún mi, ẹ ṣàánú fún mi, ẹ̀yin ọ̀rẹ́ mi, nítorí ọwọ́ Ọlọ́run ti bà mí.

²²Nitorí kí ni ẹ̀yin ṣe lépa mi bí Ọlọ́run, tí ẹran ara mi kò tẹ́ yín lọ́rùn?

²³“Áà! Ìbáṣe pé a le kọ̀wé ọ̀rọ̀ mi nísinsìn yìí, ìbáṣepé a le dà á sínú ìwé!

²⁴Kí a fi kálàmú irin àti ti òjé kọ wọ́n sínú àpáta fún láéláé.

²⁵Nítorí èmi mọ̀ pé olùdáùndè mi ń bẹ láàyè àti pe òun ni yóò dìde dúró lórí ilẹ̀ ní ìkẹyìn;

²⁶Àti lẹ́yìn ìgbà tí a pa àwọ̀ ara mi run, síbẹ̀ láìsí ẹran ara mi ni èmi ó rí Ọlọ́run,

²⁷Ẹni tí èmi ó rí fún ara mi, tí ojú mi ó sì wo, kì sì íṣe ti ẹlòmìíràn; ọkàn mi sì dákú ní inú mi.

²⁸“Bí ẹ̀yin bá wí pé, ‘àwa ó ti lépa rẹ̀ tó! Àti pé, gbogbo ọ̀rọ̀ náà ni a ṣáà rí ní ọwọ́ rẹ̀,’

²⁹Kí ẹ̀yin kí ó bẹ̀rù; nítorí ìbínú ní ímú ìjìyà wá nípa ìdà Kí ẹ̀yin kí ó lè mọ̀ pé ìdájọ́ kan ń bẹ.”