Read Bíbélì Mímọ́ ní Èdè Yorùbá Òde-Òní Ìwé Jóòbù 20 Bible Online

Ìwé Jóòbù 20 - Bíbélì Mímọ́ ní Èdè Yorùbá Òde-Òní bible

Ìwé Jóòbù 20

¹Ígbà náà ní Sófárì, ara Náámà dáhùn, ó sì wí pé:

²“Nítorí náà ní ìro inú mi dá mi lóhùn, àti nítorí èyí náà ní mo sì yára si gidigidi.

³Mo ti gbọ́ ẹ̀san ẹ̀gàn mi, ẹ̀mí òye mi sì dá mi lóhùn.

⁴“Ìwọ kò mọ̀ èyí rí ní ìgbà àtijọ́, láti ìgbà tí a sọ ènìyàn lọ́jọ̀ silẹ̀ ayé,

⁵Pé, orin ayọ̀ ènìyàn búburú, ìgbà kúkúrú ni, àti pé, ní ìṣẹ́jú kan ní ayọ̀ àgàbàgebè?

⁶Bí ọláńlá rẹ̀ tilẹ̀ gòkè dé ọ̀run, ti ori rẹ̀ sì kan àwọsánmà;

⁷Ṣùgbọ́n yóò ṣègbé láéláé bí ìgbẹ́ ara rẹ̀; àwọn tí ó ti rí i rí yóò wí pé, ‘Òun ha dà?’

⁸Yóò fò lọ bí àlá, a kì yóò sì rí i, àní a ó lé e lọ bi ìran òru.

⁹Ojú tí ó ti rí i rí kì yóò sì rí i mọ́, bẹ́ẹ̀ ni ibùjókòó rẹ̀ kì yóò sì ri i mọ́.

¹⁰Àwọn ọmọ rẹ̀ yóò máa wá àti rí ojú-rere lọ́dọ̀ talákà, ọwọ́ rẹ̀ yóò sì kó ọrọ̀ wọn padà.

¹¹Egungun rẹ̀ kún fún agbára ìgbà èwe rẹ̀, tí yóò bá a dùbúlẹ̀ nínú erùpẹ̀.

¹²“Bí ìwà búburú tilẹ̀ dún ní ẹnu rẹ̀, bí ó tilẹ̀ pa á mọ́ nísàlẹ̀ ahọ́n rẹ̀,

¹³bí ó tilẹ̀ dá a sí, tí kò si kọ̀ ọ́ sílẹ̀, tí ó pa á mọ́ síbẹ̀ ní ẹnu rẹ̀,

¹⁴Ṣùgbọ́n oúnjẹ rẹ̀ nínú ikùn rẹ̀ ti yípadà, ó jásí òróró pamọ́lẹ̀ nínú rẹ̀;

¹⁵Ó ti gbé ọrọ̀ mì, yóò sì tún bí i jáde; Ọlọ́run yóò pọ̀ ọ́ yọ jáde láti inú rẹ̀ wá.

¹⁶Ó ti fà oró pamọ́lẹ̀ múu; ahọ́n gúnte ní yóò pa á.

¹⁷Kì yóò rí odò wọ̀n-ọn-nì, ìṣàn omi, odò tí ń sàn fún oyin àti ti òrí àmọ́.

¹⁸Ohun tí ó ṣíṣẹ́ fún ni yóò mú un padà, kí yóò sì gbé e mì; gẹ́gẹ́ bí ọrọ̀ tí ó ní, kì yóò sì yọ̀ nínú rẹ̀.

¹⁹Nítorí tí ó fi owó rẹ̀ ni talákà lára, ó sì ti kẹ́hìndà wọ́n; Nítorí ti ó fi agbára gbé ilé tí òun kò kọ́.

²⁰“Nítorí òun kò mọ̀ ìwà pẹ̀lẹ́ nínú ara rẹ̀, kì yóò sì gbà nínú èyí tí ọkán rẹ̀ fẹ́ sílẹ̀.

²¹Ohun kan kò kù fún jíjẹ́ rẹ̀; Nitorí náà ọ̀rọ̀ rẹ̀ kì yóò dúró pẹ́.

²²Nínú ànító rẹ̀, ìdààmú yóò dé bá a; àwọn ènìyàn búburú yóò dáwọ́ jọ lé e lórí.

²³Yóò sì ṣe, nígbà tí ó bá fẹ́ jẹun Ọlọ́run yóò fà ríru ìbínú rẹ̀ sí í lórí, nígbà tó bá ń jẹun lọ́wọ́, yóò sì rọ òjò ìbínú rẹ̀ lé e lórí.

²⁴Yóò sá kúrò lọ́wọ́ ohun ogun ìrìn; ọrun akọ irin ní yóò ta a po yọ.

²⁵O fà á yọ, ó sì jáde kúrò lára; idà dídán ní ń jáde láti inú òróòro wá: Ẹ̀rù ńlá ń bẹ ní ara rẹ̀.

²⁶Òkùnkùn biribiri ní a ti pamọ́ fún ìṣúra rẹ̀; iná ti a kò fẹ́ ní yóò jó o run: yóò sì jẹ èyí tí ó kù nínú àgọ́ rẹ̀ run.

²⁷Ọ̀run yóò fi ẹ̀ṣẹ̀ rẹ hàn, ayé yóò sì dìde dúró sí i.

²⁸Ìbísí ilé rẹ̀ yóò kọjá lọ, àti ohun ìní rẹ̀ yóò ṣàn dànù lọ ni ọjọ́ ìbínú Ọlọ́run.

²⁹Èyi ni ìpín ènìyàn buburú láti ọ̀dọ̀ Ọlọ́run wá, àti ogún tí a yàn sílẹ̀ fún un láti ọ̀dọ̀ Ọlọ́run.”