Read Bíbélì Mímọ́ ní Èdè Yorùbá Òde-Òní Ìwé Jóòbù 21 Bible Online

Ìwé Jóòbù 21 - Bíbélì Mímọ́ ní Èdè Yorùbá Òde-Òní bible

Ìwé Jóòbù 21

¹Jóòbù wá dahùn, ó sì wí pé:

²“Ẹ tẹ́tí silẹ̀ dẹdẹ sì àwọn ọ̀rẹ́ mi, kí èyí kí ó jásí ìtùnú tí ó fún mi.

³Ẹ jọ̀wọ́ mi ki èmi sọ̀rọ̀; lẹ́yìn ìgbà tí mo bá sọ tán, ìwọ máa fi ṣẹ̀sín ń ṣo.

⁴“Bí ó ṣe tí èmi ni, àròyé mi iṣe sí ènìyàn bí? Tàbí èétíṣe tí ọkàn mi kì yóò fi ṣe àìbalẹ̀?

⁵Ẹ wò mí fín, kí ẹnu kí ó sì yà yín, kí ẹ sì fi ọwọ́ lé ẹnu yín.

⁶Àní nígbà tí mo rántí, ẹ̀rù bà mí, ìwárìrì sì mú mi lára.

⁷Nítorí kí ní ènìyàn búburú fi wà ní ayé, tí wọ́n gbó, àní tí wọ́n di alágbára ní ipa?

⁸Irú ọmọ wọn fi ìdí kalẹ̀ ní ojú wọn pẹ̀lú wọn, àti ọmọ-ọmọ wọn ní ojú wọn.

⁹Ilé wọn wà láìní ewu àti ẹ̀rù, bẹ́ẹ̀ ni ọ̀pá iná Ọlọ́run kò sí lára wọn.

¹⁰Akọ màlúù wọn a máa gùn, kì ísì íṣe; abo màlúù wọn a máa bí, kì í sì í ṣẹ́yun;

¹¹Wọn a máa rán àwọn ọmọ wọn wẹ́ẹ́wẹ́ẹ́ jáde bí agbo ẹran, àwọn ọmọ wọn a sì máa jó kiri.

¹²Wọ́n mú ohun ọ̀nà orin, ìlù àti háápù, wọ́n sì ń yọ̀ sí ohùn fèrè

¹³Wọ́n ní ọjọ́ wọn nínú ọrọ̀; wọn sì lọ sí ipò òkú ní àlàáfíà.

¹⁴Nítorí náà ni wọ́n ṣe wí fún Ọlọ́run pé, lọ kúrò lọ́dọ̀ wa, nítorí pé wọn kò fẹ́ ìmọ̀ ipa ọ̀nà rẹ!

¹⁵Kí ni Olódùmarè tí àwa ó fi máa sìn in? Èrè kí ni a ó sì jẹ bí àwa ba gbàdúrà sí i?

¹⁶Kíyè sí i, àlàáfíà wọn kò sí nípa ọwọ́ wọn; ìmọ̀ ènìyàn búburú jìnnà sí ni réré.

¹⁷“Ìgbà mélòómélòó ní a ń pa iná ènìyàn búburú kú? Ìgbà mélòómélòó ní ìparun wọn dé bá wọn, tí Ọlọ́run sì í máa pín ìbìnújẹ́ nínú ìbínú rẹ̀?

¹⁸Wọ́n dàbí àkékù oko níwájú afẹ́fẹ́, àti bí ìyàngbò, tí ẹfúùfù ńlá fẹ́ lọ.

¹⁹Ẹ̀yin wí pé, ‘Ọlọ́run to iya ẹ̀ṣẹ̀ rẹ̀ jọ fún àwọn ọmọ rẹ̀.’ Jẹ́ kí ó san án fún un, yóò sì mọ̀ ọ́n.

²⁰Ojú rẹ̀ yóò rí ìparun ara rẹ̀, yóò sì máa mu nínú ríru ìbínú Olódùmarè.

²¹Nítorí pé àlàáfíà kí ni ó ní nínú ilé rẹ̀ lẹ́yìn rẹ̀, nígbà tí a bá ké iye oṣù rẹ̀ kúrò ní agbede-méjì?

²²“Ẹnikẹ́ni le íkọ́ Ọlọ́run ní ìmọ̀? Òun ní í sáa ń ṣe ìdájọ́ ẹni ibi gíga.

²³Ẹnìkan a kú nínu pípé agbára rẹ̀, ó wà nínú ìrọra àti ìdákẹ́ pátapáta.

²⁴Ọpọ́n rẹ̀ kún fún omi ọmú, egungun rẹ̀ sì tutù fún ọ̀rá.

²⁵Ẹlòmìíràn a sì kú ninú kíkorò ọkàn rẹ̀, tí kò sì fi inú dídùn jẹun.

²⁶Wọ́n o dùbúlẹ̀ bákan náà nínú erùpẹ̀, kòkòrò yóò sì ṣùbò wọ́n.

²⁷“Kíyèsí i, èmi mọ̀ ìrò inú yín àti àrékérekè ọkàn yín láti ṣe ìlòdì sí mi.

²⁸Nítorí tí ẹ̀yin wí pé, ‘Níbo ní ilé ọmọ aládé, àti níbo ní àgọ́ àwọn ènìyàn búburú nì gbé wà?’

²⁹Ẹ̀yin kò béèrè lọ́wọ́ àwọn tí ń kọjá lọ ní ọ̀nà? Ẹ̀yin kò mọ̀ àmì wọn, pé

³⁰Ènìyàn búburú ní a fi pamọ́ fún ọjọ́ ìparun? A ó sì mú wọn jáde ní ọjọ́ ríru ìbínú.

³¹Ta ni yóò sọ ipa ọ̀nà rẹ̀ kò ó ní ojú, ta ni yóò sì san án padà fún un ní èyí tí ó ti ṣe?

³²Síbẹ̀ a ó sì sin ín ní ọ̀nà ipò òkú, a ó sì máa ṣọ́ ibojì òkú.

³³Ògúlùtù àfonífojì yóò dùn mọ́ ọn. Gbogbo ènìyàn yóò sì máa tọ̀ ọ́ lẹ́yìn, bí ènìyàn àìníye ti lọ ṣíwájú rẹ̀.

³⁴“Èé ha ti ṣe tí ẹ̀yin fi ń tù mí nínú lásán, bí ò ṣepé ní ìdáhùn yín, eké kù níbẹ̀!”