Read Bíbélì Mímọ́ ní Èdè Yorùbá Òde-Òní Ìwé Jóòbù 22 Bible Online

Ìwé Jóòbù 22 - Bíbélì Mímọ́ ní Èdè Yorùbá Òde-Òní bible

Ìwé Jóòbù 22

¹Ígbà náà ni Élífásì, ará Témà, dáhùn wí pé:

² “Ènìyàn lè è ṣe rere fún Ọlọ́run? Bí ọlọ́gbọ́n ti í ṣe rere fún ara rẹ̀?

³Ohun ayọ̀ ha ni fún Olódùmáarè pé, olódodo ni ìwọ? Tàbí èrè kí ni fún un, ti ìwọ mú ọ̀nà rẹ̀ pé?

⁴“Yóò ha bá ọ wí bí, nítorí ìbẹ̀rù Ọlọ́run rẹ? Yóò ha bá ọ lọ sínú ìdájọ́ bí?

⁵Ìwà búburú rẹ kò ha tóbi, àti ẹ̀ṣẹ̀ rẹ láìníye?

⁶Nítòótọ́ ìwọ bèèrè fún ààbò ni ọwọ́ arákùnrin rẹ láìnídìí, ìwọ sì tú oníhòhò ní aṣọ wọn.

⁷Ìwọ kò fi omi fún aláàárẹ̀ mu, ìwọ sì háwọ́ oúnjẹ fún ẹni tí ebi ń pa.

⁸Bí ó ṣe ti alágbára nì ni, òun ni ó ní ilẹ̀, ọlọ́lá sì tẹ̀dó sínú rẹ̀.

⁹Ìwọ ti rán àwọn opó padà lọ ní ọwọ́ òfo; Apá àwọn ọmọ aláìní baba ti di ṣiṣẹ́.

¹⁰Nítorí náà ni ìdẹkùn ṣe yí ọ káàkiri, àti ìbẹ̀rù òjijì ń yọ ọ́ lẹ́nu,

¹¹Èé ṣe tí òkùnkùn, fi pọ̀ tóbẹ́ẹ̀ tí ìwọ kò fi lè ríran; Èé ṣe tí ọ̀pọ̀lọpọ̀ omi sì bò ọ́ mọ́lẹ̀.

¹²“Ọlọ́run kò ha jẹ́ ẹni gíga ọ̀run? Ṣá wò orí àwọn ìràwọ̀ bí wọ́n ti ga tó!

¹³Ìwọ sì wí pé, Ọlọ́run ti ṣe mọ̀? Òun ha lè ṣe ìdájọ́ láti inú òkùnkùn wá bí?

¹⁴Àwọ̀sánmọ̀ tí ó nípọn ni ìbora fún un, tí kò fi lè ríran; ó sì rìn nínú àyíká ọ̀run.

¹⁵Ìwọ fẹ́ rìn ìpa ọ̀nà ìgbàanì tí àwọn ènìyàn búburú tí rìn?

¹⁶A ké wọn lulẹ̀ kúrò nínú ayé láìpé ọjọ́ wọn; ìpilẹ̀ wọn ti dé bí odò síṣàn;

¹⁷Àwọn ẹni tí ó wí fún Ọlọ́run pé, lọ kúrò lọ́dọ̀ wa! Kí ni Olódùmárè yóò ṣe fún wọn?

¹⁸Ṣíbẹ̀ ó fi ohun rere kún ilé wọn! Ṣùgbọ́n ìmọ̀ ènìyàn búburú jìnnà sí mi!

¹⁹“Àwọn olódodo rí ìparun wọn, wọ́n sì yọ̀, àwọn aláìlẹ̀ṣẹ̀ sì fi wọ́n rẹ́rìn ín ẹlẹ́yà pé,

²⁰Lótìítọ́ àwọn ọ̀ta wa ni a ké kúrò, iná yóò sì jó oró wọn run.

²¹“Fa ara rẹ súnmọ́ Ọlọ́run, ìwọ ó sì rí àlàáfíà; Pẹ̀lú rẹ̀ nípa èyí ni rere yóò wá bá ọ.

²²Èmi bẹ̀ ọ́, gba òfin láti ẹnu rẹ̀ wá, kí o sì tò ọ̀rọ̀ rẹ̀ sí àyà rẹ.

²³Bí ìwọ bá yípadà sọ́dọ̀ Olódùmáarè, a sì gbé ọ ró, bí ìwọ bá sì mú ẹ̀ṣẹ̀ jìnnà réré kúrò nínú àgọ́ rẹ,

²⁴Tí ìwọ bá tẹ́ wúrà dáradára sílẹ̀ lórí erùpẹ̀ àti wúrà ófiri lábẹ́ òkúta odò,

²⁵Nígbà náà ní Olódùmáarè yóò jẹ́ wúrà rẹ, àní yóò sì jẹ́ fàdákà fún ọ ní ọ̀pọ̀lọpọ̀.

²⁶Lótìítọ́ nígbà náà ní ìwọ ó ní inú dídùn nínú Olódùmáarè, ìwọ ó sì gbé ojú rẹ sókè sọ́dọ̀ Ọlọ́run.

²⁷Bí ìwọ bá gbàdúrà rẹ sọ́dọ̀ rẹ̀, yóò sì gbọ́ tìrẹ, ìwọ ó sì san ẹ̀jẹ́ rẹ.

²⁸Ìwọ ó sì gbìmọ̀ ohun kan pẹ̀lú, yóò sì fi ìdí múlẹ̀ fún ọ; ìmọ́lẹ̀ yóò sì mọ́ sípa ọ̀nà rẹ.

²⁹Nígbà tí ipa-ọ̀nà rẹ bá lọ sísàlẹ̀, nígbà náà ni ìwọ o wí pé, ‘Ìgbésókè ń bẹ!’ Ọlọ́run yóò sì gba onírẹ̀lẹ̀ là!

³⁰Yóò gba ẹni tí kì í iṣe aláìjẹ̀bi là, a ó sì gbà á nípa mímọ́ ọwọ́ rẹ̀.”