Read Bíbélì Mímọ́ ní Èdè Yorùbá Òde-Òní Ìwé Jóòbù 24 Bible Online

Ìwé Jóòbù 24 - Bíbélì Mímọ́ ní Èdè Yorùbá Òde-Òní bible

Ìwé Jóòbù 24

¹“Se bí ìgbà kò pamọ́ lọ́dọ̀ Olódùmárè fún ìdájọ́, èéṣe tí ojúlùmọ̀ rẹ̀ kò fi rí ọjọ́ rẹ̀?

²Díẹ̀ nínú wọn a ṣún àmì ààlà ilẹ̀, wọ́n á fi agbára kó agbo ẹran lọ, wọ́n sì ji wọn.

³Wọ́n á sì dà kẹ́tẹ́kẹ́tẹ́ aláìní baba lọ, wọ́n a sì gba ọ̀dá-màlúù opó ní ohun ògo.

⁴Wọ́n á bi aláìní kúrò lójú ọ̀nà, àwọn talákà àyé a sá pamọ́ pọ̀.

⁵Kíyèsí i, bí i kẹ́tẹ́kẹ́tẹ́ ìgbẹ́ nínú ijù ni àwọn talákà ijáde lọ sí iṣẹ́ wọn; Wọ́n a tètè dìde láti wá ohun ọdẹ; ijù pèsè oúnjẹ fún wọn àti fún àwọn ọmọ wọn

⁶Olúkulùkù a sì ṣa ọkà oúnjẹ ẹran rẹ̀ nínú oko, wọn a sì ká ọgbà àjàrà ènìyàn búburú.

⁷Ní hòòhò ni wọn má a sùn láìní aṣọ, tí wọn kò ní ìbora nínú òtútù.

⁸Ọ̀wàrà òjò òkè ńlá sì pa wọ́n, wọ́n sì lẹ̀mọ́ àpáta nítorí tí kò sí ààbò.

⁹Wọ́n já ọmọ aláìní baba kúrò ní ẹnu ọmú, wọ́n sì gbà ọmọ talákà. Nítorí gbèsè

¹⁰Wọ́n rìn kiri níhòòhò láìní aṣọ; àwọn tí ebi ń pa rẹrù ìdì ọkà,

¹¹Àwọn ẹni tí ń fún òróró nínú àgbàlá wọn, tí wọ́n sì ń tẹ ìfúntí àjàrà, òǹgbẹ sì ń gbẹ wọn.

¹²Àwọn ènìyàn ń kérora láti ìlú wá, ọkàn àwọn ẹni tí ó gbọgbẹ́ kígbe sókè; fún ìrànlọ́wọ́ ṣíbẹ̀ Ọlọ́run kò kíyèsí àṣìṣe náà.

¹³“Àwọn ni ó wà nínú àwọn tí ó kọ̀ ìmọ́lẹ̀; Wọn kò mọ̀ ipa ọ̀nà rẹ̀, bẹ́ẹ̀ ni wọn kò dúró nípa ọ̀nà rẹ̀.

¹⁴Panipani a dìde ní àfẹ̀mọ́júmọ́, a sì pa talákà àti aláìní, àti ní òru a di olè.

¹⁵Ojú alágbèrè pẹ̀lú dúró de àfẹ̀mọ́júmọ́ ọjọ́; ‘Ó ní, ojú ẹnìkan kì yóò rí mi;’ ó sì fi ìbòjú bojú rẹ̀.

¹⁶Ní òkùnkùn wọn á rúnlẹ̀ wọlé, tí wọ́n ti fi ojú sọ fún ara wọn ní ọ̀sán, wọn kò mọ̀ ìmọ́lẹ̀.

¹⁷Nítorí pé bí òru dúdú ní òwúrọ̀ fún gbogbo wọn; nítorí tí wọn sì mọ̀ ìbẹ̀rù òkùnkùn.

¹⁸“Ó yára lọ bí ẹni lójú omi; ìpín wọn ní ilé ayé ni a ó parun; òun kò rìn mọ́ ní ọ̀nà ọgbà àjàrà.

¹⁹Ọ̀dá àti òru ní ímú omi ojọ-didi gbẹ, bẹ́ẹ̀ ní isà òkú írun àwọn ẹlẹ́ṣẹ̀.

²⁰Inú ìbímọ yóò gbàgbé rẹ̀, kòkòrò ní yóò máa fi adùn jẹun lára rẹ̀, a kì yóò rántí ènìyàn búburú mọ́; Bẹ́ẹ̀ ní a ó sì ṣẹ ìwà búburú bí ẹní ṣẹ́ igi;

²¹Ẹni tí o hù ìwà búburú sí àgàn tí kò ṣe rere sí opó.

²²Ṣùgbọ́n ó fi ipá Ọlọ́run rẹ̀ fà alágbára lọ pẹ̀lú; Ó dìde, kò sí ẹni tí ẹ̀mí rẹ̀ dá lójú.

²³Ọlọ́run sì fi ìwà àìléwu fún un, àti nínú èyí ní a ó sì tì i lẹ́yìn, ojú rẹ̀ sì wà ní ipa ọ̀nà wọn.

²⁴A gbé wọn lékè nígbà díẹ̀; wọ́n kọjá lọ, a sì rẹ̀ wọ́n sílẹ̀; A sì mú wọn kúrò ní ọ̀nà, bí àwọn ẹlòmìíràn, a sì ké wọn kúrò bí orí sírì itú ọkà bàbà.

²⁵“Ǹjẹ́, bí kò bá rí bẹ́ẹ̀ nísinsìn yìí, ta ni yóò mú mi ní èké, tí yóò sì sọ ọ̀rọ̀ mi di aláìníláárí?”