Read Bíbélì Mímọ́ ní Èdè Yorùbá Òde-Òní Ìwé Jóòbù 27 Bible Online

Ìwé Jóòbù 27 - Bíbélì Mímọ́ ní Èdè Yorùbá Òde-Òní bible

Ìwé Jóòbù 27

¹Pẹ̀lúpẹ̀lú Jóòbù sì tún sọ kún ọ̀rọ̀ òwe rẹ̀, ó sì wí pé:

²“Bí Ọlọ́run ti ń bẹ, ẹni tí ó gba ìdájọ́ mi lọ, àti Olódùmárè tí ó bà mi ní ọkàn jẹ́;

³(Níwọ̀n ìgbà tí ẹ̀mí mi ń bẹ nínú mi, àti tí ẹ̀mi Ọlọ́run ń bẹ nínú ihò imú mi.)

⁴Ètè mi kì yóò sọ̀rọ̀ èké, Bẹ́ẹ̀ ni ahọ́n mi kì yóò sọ̀rọ̀ ẹ̀tàn.

⁵Kí a má ríi pé èmi ń dá yín láre; títí èmi ó fi kú, èmi kì yóò sí ìwà òtítọ́ mi kúrò lọ́dọ̀ mi.

⁶Òdodo mi ni èmi dìmú ṣinṣin, èmi kì yóò sì jọ̀wọ́ rẹ̀ lọ́wọ́; àyà mi kì yóò sì gan ọjọ́ kan nínú ọjọ́ ayé mi.

⁷“Kí ọ̀ta mi kí ó dàbí ènìyàn búburú, àti ẹni tí ń dìde sími kí ó dàbí ẹni aláìsòdodo.

⁸Nítorí kí ni ìrètí àgàbàgebè, nígbà tí Ọlọ́run bá ké ẹ̀mí rẹ̀ kúrò, nígbà tí ó sì fà á jáde?

⁹Ọlọ́run yóò ha gbọ́ àdúrà rẹ̀, nígbà tí ìpọ́jú bá dé sí i?

¹⁰Òun ha le ní inú dídùn sí Olódùmarè? Òun ha lé máa képe Ọlọ́run nígbà gbogbo?

¹¹“Èmi ó kọ́ yín ní ẹ̀kọ́ ní ti ọwọ́ Ọlọ́run: ọ̀nà tí ńbẹ lọ́dọ̀ Olódùmarè ni èmi kì yóò fi pamọ́.

¹²Kíyèsí i, gbogbo yín ni ó ti rí i; nítorí kí ni ẹ̀yin ṣe já sí asán pọ̀ bẹ́ẹ̀?

¹³“Ẹ̀yin ni ìpín ènìyàn búburú lọ́dọ̀ Ọlọ́run, àti ogún àwọn aninilára, tí wọ́n ó gbà lọ́wọ́ Olódùmáre:

¹⁴Bí àwọn ọmọ rẹ bá di púpọ̀, fún idà ni; àwọn ọmọ ọmọ rẹ̀ kì yóò yó fún oúnjẹ.

¹⁵Àwọn tí ó kú nínú tirẹ̀ ni a ó sìnkú nínú àjàkálẹ̀-àrùn: àwọn opó rẹ̀ kì yóò sì sunkún fún wọn.

¹⁶Bí ó tilẹ̀ kó fàdákà jọ bí erùpẹ̀, tí ó sì dá aṣọ jọ bí amọ̀;

¹⁷Àwọn ohun tí ó tò jọ àwọn olóòótọ́ ni yóò lò ó; àwọn aláìṣẹ̀ ni yóò sì pín fàdákà rẹ̀.

¹⁸Òun kọ́ ilé rẹ̀ gẹ́gẹ́ bí kòkòrò aṣọ, àti bí ahéré tí olùsọ́ kọ́.

¹⁹Ọlọ́rọ̀ yóò dùbúlẹ̀, ṣùgbọ́n òun kì yóò tún ṣe bẹ́ẹ̀ mọ́; ó síjú rẹ̀, òun kò sì sí. Nígbà tí ó bá la ojú rẹ̀, gbogbo rẹ̀ a lọ

²⁰Ẹ̀rù ńlá bàá bí omi ṣíṣàn; ẹ̀fúùfù ńlá jí i gbé lọ ní òru.

²¹Ẹ̀fúùfù ìlà oòrùn gbé e lọ, òun sì lọ; àti bí ìjì ńlá ó sì fà á kúrò ní ipò rẹ̀.

²²Nítorí pé Olódùmárè yóò kọ lù ú, kì yóò sì dá a sí; òun ìbá yọ̀ láti sá kúrò ní ọwọ́ rẹ̀.

²³Àwọn ènìyàn yóò sì ṣápẹ́ sí i lórí, wọn yóò sì ṣe síọ̀ sí i kúrò ní ipò rẹ̀.