Read Bíbélì Mímọ́ ní Èdè Yorùbá Òde-Òní Ìwé Jóòbù 29 Bible Online

Ìwé Jóòbù 29 - Bíbélì Mímọ́ ní Èdè Yorùbá Òde-Òní bible

Ìwé Jóòbù 29

¹Pẹ̀lúpẹ̀lù, Jóòbù sì tún tẹ̀ ṣíwájú nínú ọ̀rọ̀ rẹ̀, ó sì wí pé:

²“Áà! ìbá ṣe pé èmi wà bí ìgbà oṣù tí ó kọjá, bí ọjọ́ tí Ọlọ́run pamímọ́;

³Nígbà tí fìtílà rẹ tàn sí mi ní orí, àti nípa ìmọ́lẹ̀ rẹ̀ èmi rìn nínú òkùnkùn já;

⁴Bí mo tirí nígbà ọ̀dọ́ mi, nígbà tí ọ̀rẹ́ Ọlọ́run tímọ́tímọ́ bùkún ilé mi

⁵Nígbà tí Olódùmarè wà pẹ̀lú mi, nígbà tí àwọn ọmọ mi wà yí mi ká;

⁶Nígbà tí èmi fi òrí àmọ́ n wẹ ìsísẹ̀ mi, àti tí àpata ń tú ìsàn òróró jáde fún mi wá.

⁷“Nígbà tí mo jáde la àárin ìlú lọ sí ẹnu ibodè, nígbà tí mo tẹ́ ìtẹ́ mi ní ìgboro,

⁸Nígbà náà ni àwọn ọmọkùnrin rí mi, wọ́n sì sápamọ́, àwọn àgbà dìde dúró ní ẹṣẹ̀ wọn;

⁹Àwọn ọmọ aládé dákẹ́ ọ̀rọ̀ sí sọ, wọn a sì fí ọwọ́ wọn lé ẹnu;

¹⁰Àwọn ọmọ ọlọ́lá dákẹ́, ahọ́n wọn sì lẹ̀mọ́ èrìgì ẹnu wọn.

¹¹Nígbà tí etí gbọ́, ó sì súre fún mi, àti nígbà tí ojú sì rí mi, ó jẹ́rìí mi;

¹²Nítorí mo gbà talákà tí n fẹ́ ìrànlọ́wọ́, àti aláìní baba, tí kò sí olùrànlọ́wọ́ fún un

¹³Ẹni tí ó ń kìlọ̀ súre fún mi, èmi sì mú àyà opó kọrin fún ayọ̀.

¹⁴Èmi sì mú òdodo wọ̀ bí aṣọ, ẹ̀tọ́ mi dà bí aṣọ ìgúnwà àti adé ọba.

¹⁵Mo ṣe ojú fún afọ́jú mo sì ṣe ẹṣẹ̀ fún amúkùnún.

¹⁶Mo ṣe baba fún talákà, mo ṣe ìwádìí ọ̀ràn àjòjì tí èmi kò mọ̀ rí.

¹⁷Mo sì ká eyín ẹ̀rẹ̀kẹ́ ìkà ènìyàn, mo sì já ohun ọdẹ náà kúrò ní eyín rẹ̀.

¹⁸“Nígbà náà ni mo rò pé, ‘Èmi yóò kú nínú ilé mi, èmi yóò sì mú ọjọ́ mi pọ̀ sí i bí i yanrìn.

¹⁹Gbòǹgbò mi yóò ta kan omi, ìrì yóò sì sẹ̀ ní gbogbo òru sí ara ẹ̀ka mi.

²⁰Ògo mi yóò wà ní ọ̀tún ní ọ̀dọ̀ mi, ọrun mi sì padà di titun ní ọwọ́ mi’

²¹“Èmi ni ènìyàn ń dẹtí sílẹ̀ sí, wọn a sì dúró, wọn a sì dákẹ́ rọ́rọ́ ní ìmọ̀ràn mi.

²²Lẹ́yìn ọ̀rọ̀ mi, wọn kò tún sọ̀rọ̀ mọ́; ọ̀rọ̀ mi wọ̀ wọ́n ní etí ṣinṣin.

²³Wọn a sì dúró dè mí bí ẹni wí pé wọ́n dúró fún ọ̀wọ́ òjò wọn a sì mu nínú ọ̀rọ̀ mi bí ẹní mu nínú òjò àrọ̀-kúrò.

²⁴Èmi sì rẹ́rìn ín sí wọn nígbà tí wọn kò bá gbà á gbọ́; ìmọ́lẹ̀ ojú mi jẹ́ iyebíye síwọn.

²⁵Mo la ọ̀nà sílẹ̀ fún wọn, mo sì jókòó bí olóyè wọn; mo jókòó bí ọba ní àárin ológun rẹ̀; mo sì rí bí ẹni tí ń tu ẹni tí ń sọ̀fọ̀ nínú.