Read Bíbélì Mímọ́ ní Èdè Yorùbá Òde-Òní Ìwé Jóòbù 3 Bible Online

Ìwé Jóòbù 3 - Bíbélì Mímọ́ ní Èdè Yorùbá Òde-Òní bible

Ìwé Jóòbù 3

¹Ẹ̀yìn èyí ní Jóòbù yanu, ó sì fi ọjọ́ ìbí rẹ̀ ré

²Jóòbù sọ, ó sì wí pé:

³ “Kí ọjọ́ tí a bi mi kí ó di ìgbàgbé, àti òru ni, nínú èyí tí a wí pé, ‘A loyún ọmọkùnrin kan!’

⁴Kí ọjọ́ náà kí ó já si òkùnkùn, kí Ọlọ́run kí ó má ṣe kà á sí láti ọ̀run wá; bẹ́ẹ̀ ni kí ìmọ́lẹ̀ kí ó má ṣe mọ́ sí i.

⁵Kí òkùnkùn àti òjìjì ikú fi ṣe ti ara wọn; kí àwọ-sánmọ̀ kí ó bà lé e; kí ìṣúdúdú ọjọ́ kí ó pa láyà.

⁶Kí òkùnkùn kí ó ṣú bo òru náà biribiri, kí ó má ṣe yọ pẹ̀lú ọjọ́ ọdún náà: kí ó má ṣe kà a mọ́ iye ọjọ́ oṣù.

⁷Kí òru náà kí ó yàgàn; kí ohun ayọ̀ kan kí ó má ṣe wọ inú rẹ̀ lọ.

⁸Kí àwọn tí í fi ọjọ́ gégùn-ún kí o fi gégùn-ún, tí wọ́n mura tán láti ru Léfíátánì sókè.

⁹Kí ìràwọ̀ òféfé ọjọ́ rẹ̀ kí ó ṣókùnkùn; kí ó má wá ìmọ́lẹ̀, ṣùgbọ́n kí ó máa mọ́ síi, bẹ́ẹ̀ ni kí ó má ṣe rí àfẹ̀rẹ̀mọ́jú mọ́

¹⁰Nítorí tí kò sé ìlẹ̀kùn inú ìyá mi, bẹ́ẹ̀ ni kò pa ìbànújẹ́ rẹ́ ní ojú mi.

¹¹“Èéṣe tí èmi kò fi kú láti inú wá, tàbí tí èmi kò fi pín ẹ̀mí ní ìgbà tí mo ti inú jáde wá?

¹²Èéṣe tí eékún wá pàdé mi, tàbí ọmú tí èmi yóò mu?

¹³Ǹjẹ́ nísinsìn yìí èmi ìbá ti dúbúlẹ̀ jẹ́ẹ́; èmi a sì dákẹ́, èmi ìbá ti sùn ǹjẹ́ èmi ìbá ti sinmi

¹⁴pẹ̀lú àwọn ọba àti ìgbìmọ̀ ayé tí ìmọ́lẹ̀ takété fún ara wọn.

¹⁵Tàbí pẹ̀lú àwọn ọmọ-aládé tí ó ní wúrà, tí wọ́n sì fi fàdákà kun ilé wọn

¹⁶Tàbí bí ọ̀lẹ̀ tí a sin, èmi kì bá ti sí: bí ọmọ ìṣúnú tí kò rí ìmọ́lẹ̀?

¹⁷Níbẹ̀ ni ẹni-búburú síwọ́ ìyọ nilẹ́nu, níbẹ̀ ni ẹni àárẹ̀ wà nínú ìsinmi.

¹⁸Níbẹ̀ ni àwọn ìgbèkùn sinmi pọ̀, wọn kò gbóhùn amúnisìn mọ́.

¹⁹Àti èwe àti àgbà wà níbẹ̀, ẹrú sì di òmìnira kúrò lọ́wọ́ olówó rẹ̀.

²⁰“Nítorí kí ni a ṣe fi ìmọ́lẹ̀ fún òtòsì, àti ìyè fún ọlọ́kan kíkorò,

²¹tí wọ́n dúró de ikú, ṣùgbọ́n òun kò wá, tí wọ́n wálẹ̀ wá a jù fún ìṣúra tí a bò mọ́lẹ̀ pamọ́.

²²Ẹni tí ó yọ̀ gidigidi, tí inú wọ́n sì dùn nígbà tí wọ́n wá ibojì òkú rí?

²³Kí ni a fi ìmọ́lẹ̀ fún ẹni tí ọ̀nà rẹ̀ fi ara pamọ́ fún tí Ọlọ́run sì ṣọgbà yí wọn ká?

²⁴Nítorí pé èémí-ẹ̀dùn wà ṣáájú oúnjẹ mi; ikérora mi sì tú jáde bí omi.

²⁵Nítorí pé ohun náà tí mo bẹ̀rù gidigidi ni ó dé bá mi yìí, àti ohun tí mo fòyà rẹ̀ bá mi ó sì ṣubú lù mí.

²⁶Èmi kò wà ni ìléwu rí, bẹ́ẹ̀ ni èmi kò ní ìsinmi; bẹ́ẹ̀ ni èmi kò ni ìfàyà balẹ̀, síbẹ̀síbẹ̀ ìyọnu dé.”