Read Bíbélì Mímọ́ ní Èdè Yorùbá Òde-Òní Ìwé Jóòbù 30 Bible Online

Ìwé Jóòbù 30 - Bíbélì Mímọ́ ní Èdè Yorùbá Òde-Òní bible

Ìwé Jóòbù 30

¹“Ṣùgbọ́n nísinsin yìí, àwọn tí mo gbà ní àbúrò ń fi mí ṣe ẹlẹ́yà, baba ẹni tí èmi kẹ́gàn láti tò pẹ̀lú àwọn ajá agbo-ẹran mi.

²Kí ni ìwúlò agbára ọwọ́ wọn sími, níwọ̀n ìgbà tí agbára wọn ti fi wọ́n sílẹ̀?

³Wọ́n rù nítorí àìní àti ìyàn wọ́n ń rìn káàkiri ní ilẹ̀ gbígbẹ ní ibi ìkọsílẹ̀ ní òru.

⁴Àwọn ẹni tí ń já ewé iyọ̀ ní ẹ̀bá ìgbẹ́; gbogbo igikígi ni ounjẹ jíjẹ wọn.

⁵A lé wọn kúrò láàrin ènìyàn, àwọn ènìyàn sì pariwo lé wọn lórí bí ẹní pariwo lé olè lórí.

⁶A mú wọn gbe inú pàlàpálá òkùta àfonífojì, nínú ihò ilẹ̀ àti ti òkúta.

⁷Wọ́n ń dún bí ẹranko ní àárin ìgbẹ́, wọ́n kó ara wọn jọpọ̀ ní abẹ́ èṣìsì.

⁸Àwọn ọmọ ẹni tí òye kò yé, àní àwọn ọmọ lásán, a sì lé wọn jáde kúrò ní orí ilẹ̀.

⁹“Ǹjẹ́ nísinsin yìí, àwọn ọmọ wọn ń fi mí ṣe ẹlẹ́yà nínú orin; àní èmi di ẹni ìsọ̀rọ̀ sí láàrin wọn.

¹⁰Wọ́n kórìíra mi; wọ́n sá kúrò jìnnà sími, wọn kò sì bìkítà láti tutọ́ sími lójú.

¹¹Nítorí Ọlọ́run ti tú okùn ìyè mi, ó sì pọ́n mi lójú; àwọn pẹ̀lú sì dẹ ìjánu níwájú mi.

¹²Àwọn ènìyàn lásán dìde ní apá ọ̀tún mi; wọ́n tì ẹsẹ̀ mi kúrò, wọ́n sì la ipa ọ̀nà ìparun sílẹ̀ dèmí.

¹³Wọ́n da ipa ọ̀nà mi rú; wọ́n sì sọ ìparun mi di púpọ̀, àwọn tí kò ní olùrànlọ́wọ́.

¹⁴Wọ́n ya sími bí i omi tí ó ya gbuuru; ní ariwo ńlá ni wọ́n kó ara wọn ká tì sí mi.

¹⁵Ẹ̀rù ńlá bà mí; wọ́n lépa ọkàn mi bí ẹ̀fúùfù, àlàáfíà mi sì kọjá lọ bí àwọ̀ sánmọ̀.

¹⁶“Àti nísinsin yìí ọkàn mí sì dà jáde síi; ọjọ́ ìpọ́njú mi dì mí mú.

¹⁷Òru gún mi nínú egungun mi, ìyí tí ó bù mí jẹ kò sì sinmi.

¹⁸Nípa agbára ńlá rẹ̀ Ọlọ́run wà bí aṣọ ìbora fún mi, ó sì lẹ̀mọ́ mi ní ara yíká bí ọrùn aṣọ ìlekè mi.

¹⁹Ọlọ́run ti mú mi lọ sínú ẹrẹ̀, èmi sì dàbí eruku àti eérú.

²⁰“Èmi ké pè ọ́ ìwọ Ọlọ́run ṣùgbọ́n, ìwọ kò dámi lóhùn; èmi dìde dúró ìwọ sì wò mí lásán.

²¹Ìwọ padà di ẹni ìkà sími; ọwọ́ agbára rẹ ni ìwọ fi dè mí ní ọ̀nà.

²²Ìwọ gbémi sókè sí inú ẹ̀fúùfù, ìwọ múmi fò lọ, bẹ́ẹ̀ ni ìwọ sì sọ mí di asán pátapáta.

²³Èmi sáà mọ̀ pé ìwọ yóò mú mi lọ sínú ikú, sí ilé ìpéjọ tí a yàn fún gbogbo alààyè.

²⁴“Bí ó ti wù kí ó rí, ẹnìkan kí yóò ha na ọwọ́ rẹ̀ nígbà ìṣubu rẹ̀, tàbí kì yóò ké nínú ìparun rẹ̀.

²⁵Èmi kò ha sunkún bí fún ẹni tí ó wà nínú ìṣòro? Ọkàn mi kò ha bàjẹ́ fún talákà bí?

²⁶Nígbà tí mo fojú sọ́nà fún àlàáfíà, ibi sì dé; nígbà tí mo dúró de ìmọ́lẹ̀, òkùnkùn sì dé.

²⁷Ikùn mí n ru kò sì sinmi; Ọjọ́ ìpọ́njú ti dé bámi.

²⁸Èmí ń rìn kiri nínú ọ̀fọ̀, ṣùgbọ́n kì í ṣe nínú òòrùn; èmi dìde dúró ní àwùjọ mo sì kígbé fún ìrànlọ́wọ́.

²⁹Èmi ti di arákùnrin ìkòokò, èmi di ẹgbẹ́ àwọn ògòǹgò.

³⁰Àwọ̀ mi di dúdú ó sì ń bọ́wọ̀; egungun mi sì jórun fún oru.

³¹Hapu orin mi pẹ̀lú sì di ti ọ̀fọ̀, àti ìpè orin mi sì di ohùn àwọn tí ń sunkún.