Read Bíbélì Mímọ́ ní Èdè Yorùbá Òde-Òní Ìwé Jóòbù 32 Bible Online

Ìwé Jóòbù 32 - Bíbélì Mímọ́ ní Èdè Yorùbá Òde-Òní bible

Ìwé Jóòbù 32

¹Bẹ́ẹ̀ ni àwọn ọkùnrin mẹ́tẹ̀ẹ̀ta wọ̀nyí dákẹ́ láti dá Jóòbù lóhùn, nítorí ó ṣe olódodo lójú ara rẹ̀.

²Nígbà náà ni inú bí Élíhù ọmọ Bárákélì ará Búsì, láti ìbátan ìdílé Rámù; ó bínú si Jóòbù nítorí ti ó dá ara rẹ̀ láre kàkà ki ó dá Ọlọ́run láre.

³Inú sì bí i sí àwọn ọ̀rẹ́ rẹ̀ mẹ́tẹ̀ẹ̀ta, nítorí tí wọn kò rí ọ̀nà láti dá Jóòbù lóhùn bẹ́ẹ̀ ni wọ́n dá Jóòbù lẹ́bi.

⁴Ǹjẹ́ Élihù ti dúró tití Jóòbù fi sọ̀rọ̀ tán nitorí tí àwọn wọ̀nyí dàgbà ju òun lọ ní iye ọjọ́.

⁵Nígbà tí Élíhù ríi pé ìdáhùn ọ̀rọ̀ kò sí ní ẹnu àwọn ọkùnrin mẹ́tẹ̀ẹ̀ta wọ̀nyí nígbà náà ni ó bínú.

⁶Élíhù, ọmọ Bárákélì, ará Búsì, dáhùn ó sì wí pé: ọmọdé ní èmi àgbà sì ní ẹ̀yin; Ǹjẹ́ nítorí náà ní mo dúró mo sì ń bẹ̀rù láti fi ìmọ̀ mi hàn yin.

⁷Èmi wí pé ọjọjọ́ ni ìbá sọ̀rọ̀, àti ọ̀pọ̀lọpọ̀ ọdún ní ìbá kọ́ ni ní ọgbọ́n.

⁸Ṣùgbọ́n ẹ̀mi kan ní ó wà nínú ènìyàn àti ìmísí Olódùmarè ní ì sì máa fún wọn ní òye.

⁹Ènìyàn ńláńlá kì íṣe ọlọ́gbọ́n, Bẹ́ẹ̀ ni àwọn àgbà ní òye ẹ̀tọ́ kò yé.

¹⁰“Nítorí náà ní èmí ṣe wí pé: Ẹ dẹtí sílẹ̀ sí mi; èmí pẹ̀lú yóò fi ìmọ̀ mi hàn.

¹¹Kíyèsí i, èmí ti dúró de ọ̀rọ̀ yín; Èmi fetísí àròyé yín, nígbà tí ẹ̀yin ń wá ọ̀rọ̀ ti ẹ̀nyín yóò sọ;

¹²Àní mo fíyèsí yín tinútinú; sì kíyèsí i, kò sí ẹnìkan nínú yín tí ó le já Jóòbù ní irọ́, tàbí tí ó lè dá a lóhùn àríyànjiyàn rẹ̀!

¹³Kí ẹ̀yín kí ó má ṣe wí pé, àwa wá ọgbọ́n ní àwárí: Ọlọ́run ni ó lè bì í ṣubú, kì í ṣe ènìyàn.

¹⁴Bí òun kò ti sọ̀rọ̀ sí mi, bẹ́ẹ̀ ni èmí kì yóò fi ọ̀rọ̀ yín dá a lóhùn.

¹⁵“Ẹnu sì yà wọ́n, wọn kò sì dáhùn mọ́, wọ́n síwọ́ ọ̀rọ̀ ísọ́.

¹⁶Mo si reti, nítorí wọn kò sì fọhún, wọ́n dákẹ́ jẹ́ẹ́; wọn kò sì dáhùn mọ́.

¹⁷Bẹ́ẹ̀ ni èmí ò sì dáhùn nípa ti èmí, èmí pẹ̀lú yóò sì fi ìmọ̀ mi hàn.

¹⁸Nítorí pé èmí kún fún ọ̀rọ̀ sísọ, èmí ń rọ̀ mi ni inú mi.

¹⁹Kíyèsí i, ìkùn mi dàbí ọtí wáìnì, tí kò ní ojú-ìhò; ó múra tán láti bẹ́ bí ìgò-àwọ̀ tuntun.

²⁰Èmí ó sọ, kí ara kí ó le rọ̀ mí, èmí ó sí ètè mi, èmí ó sì dáhùn.

²¹Lótítọ́ èmí kì yóò ṣe ojúṣàájú sí ẹnìkankan, bẹ́ẹ̀ ni èmí kì yóò sì ṣe ìpọ́nni fún ẹnìkan.

²²Nítorí pé èmí kò mọ̀ ọ̀rọ̀ ìpọ́nni í sọ; ní ṣíṣe bẹ́ẹ̀, Ẹlẹ́dàá mi yóò mú mi kúrò lọ́gán.