Read Bíbélì Mímọ́ ní Èdè Yorùbá Òde-Òní Ìwé Jóòbù 33 Bible Online

Ìwé Jóòbù 33 - Bíbélì Mímọ́ ní Èdè Yorùbá Òde-Òní bible

Ìwé Jóòbù 33

¹“Njẹ́ nítorí náà, Jóòbù, èmí bẹ̀ ọ, gbọ́ ọ̀rọ̀ mi kí o sì fetísí ọ̀rọ̀ mi!

²Kíyèsí i nísinsìnyí, èmí ya ẹnu mi, ahọ́n mi sì sọ̀rọ̀ ní ẹnu mi.

³Ọ̀rọ̀ mi yóò sì jási ìdúró ṣinṣin ọkàn mi, ètè mi yóò sì sọ ìmọ̀ mi jáde dájúdájú.

⁴Ẹ̀mí Ọlọ́run Ní ó tí dá mi, Àti ìmísí Olódùmáre ni ó ti fún mi ní ìyè.

⁵Bí ìwọ bá le dá mi lóhùn, tò ọ̀rọ̀ rẹ̀ lẹ́ṣẹẹsẹ níwájú mi; dìdé!

⁶Kíyèsí i, bí ìwọ ṣe jẹ́ ti Ọlọ́run, bẹ́ẹ̀ ni èmí náà; láti amọ̀ wá ni a sì ti dá mi pẹ̀lú

⁷Kíyèsí i, ẹrù ń lá mi kì yóò bà ọ; bẹ́ẹ̀ ni ọwọ́ mi kì yóò wúwo sí ọ lára.

⁸“Nítòótọ́ ìwọ sọ ní etí mi, èmí sì gbọ́ ọ̀rọ̀ rẹ̀ wí pé,

⁹‘Èmí mọ́, laini ẹ̀ṣẹ̀ ìrékọjá; Àláìṣẹ̀ ní èmí; bẹ́ẹ̀ àìṣéédéé kò sí ní ọwọ́ mi.

¹⁰Kíyèsí i, Ọlọ́run ti rí àìṣedéédéé pẹ̀lú mi; ó kà mí sì ọ̀tá rẹ̀.

¹¹Ó kàn ẹ̀ṣẹ̀ mi sínú àbà; o kíyèsi ipa ọ̀nà mi gbogbo.’

¹²“Kíyèsí i, nínú èyí ìwọ sìnà! Èmí o dá ọ lóhùn pé, Ọlọ́run tóbi jù ènìyàn lọ!

¹³Nítorí kí ni ìwọ ṣe ń báa jà, wí pé, òun kò níi sọ ọ̀rọ̀ kan nítorí iṣẹ́ rẹ̀?

¹⁴Nítorí pe Ọlọ́run sọ̀rọ̀ lẹ́ẹkan, àní lẹ́ẹkẹji, ṣùgbọn ènìyàn kò róye rẹ̀.

¹⁵Nínú àlá, ní ojúran òru, nígbà tó orun ìjìká bá kùn ènìyàn lọ, ní sísùn lórí ìbùṣùn,

¹⁶Nígbà náà ni ó lè sọ̀rọ̀ ní etí wọn, yóò sì dẹ́rùbà wọ́n pẹ̀lú ìbáwí,

¹⁷Kí ó lè fa ènìyàn sẹ́yìn kúrò nínú ètè rẹ̀; Kí ó sì pa ìgbéraga mọ́ kúrò lọ́dọ̀ ènìyàn;

¹⁸Ó sì fa ọkàn rẹ̀ pàdà kúro nínú ìsà-òkú, àti ẹ̀mí rẹ̀ láti ṣẹ̀gbé lọ́wọ́ ìdà.

¹⁹A sì nà á lórí ibùsùn ìrọra rẹ̀; Pẹ̀lúpẹ̀lú a fi ìjà egungun rẹ̀ ti ó dúró pẹ́ nà án.

²⁰Bẹ́ẹ̀ ni ẹ̀mí rẹ kọ ounjẹ, ọkàn rẹ̀ sì kọ oúnjẹ dídùn.

²¹Ẹran ara rẹ̀ run, títí a kò sì fi lè ríi mọ́ egungun rẹ̀ tí a kò rí sì ta jáde.

²²Àní ọkàn rẹ̀ sì súnmọ́ ìsà òkú, ẹ̀mí rẹ̀ sìsúnmọ́ ọ̀dọ̀ àwọn ìranṣẹ́ ikú.

²³“Bí oníṣẹ́ kan ba wà lọ́dọ̀ rẹ̀, ẹni tí ń ṣe alágbàwí, ọ̀kan ninú ẹgbẹ̀rún láti fi ọ̀nà pípé hàn ni,

²⁴Nígbà náà ni ó ṣe oore ọ̀fẹ́ fún un ó sì wí pé, gbà á kúrò nínú ìlọ sínú ìsà òkú èmi ti ràá pàdà;

²⁵Ara rẹ̀ yóò sì di ọ̀tun bí i ti ọmọ kékeré, yóò sì tún padà sí ọjọ́ ìgbà èwe rẹ̀;

²⁶Ó gbàdúrà sọ́dọ̀ Ọlọ́run, òun sì se oju rere rẹ̀, o sì rí ojú rẹ̀ pẹ̀lú ayọ̀, òhun o san òdodo rẹ̀ padà fún ènìyàn

²⁷Ó wá sọ́dọ̀ ènìyàn ó sì wí pé èmi ṣẹ̀, kò sì sí èyí tí o tọ́, mo sì ti yí èyí tí ó tọ́ po, a kò sì san ẹ̀san rẹ̀ fún mi;

²⁸ó ti gba ọkàn mi kúrò nínú ìlọ sínú ihò, ẹ̀mí mi yóò sì rí ìmọ́lẹ̀!

²⁹“Wò ó! Nǹkan wọ̀nyí ni Ọlọ́run máa ń ṣe fún ènìyàn nígbà méjì àti nígbà mẹ́ta,

³⁰Láti mú ọkàn rẹ padà kúrò nínú isà òkú, láti fi ìmọ́lẹ̀ alààyè mọ́ sí i.

³¹“Jóòbù, kíyèsìí gidigidi kí o sì fetí sí mi; pa ẹnu rẹ mọ́, èmi ó sì máa sọ ọ́

³²Bí ìwọ bá sì ní ohun íwí, dá mi lóhùn; máa sọ, nítorí pé èmi fẹ́ dá ọ láre.

³³Bí bẹ́ẹ̀ kọ́, gbọ́ tèmi; pa ẹnu rẹ mọ́ èmi ó sì kọ́ ọ ní ọgbọ́n.”