Read Bíbélì Mímọ́ ní Èdè Yorùbá Òde-Òní Ìwé Jóòbù 34 Bible Online

Ìwé Jóòbù 34 - Bíbélì Mímọ́ ní Èdè Yorùbá Òde-Òní bible

Ìwé Jóòbù 34

¹Nígbà náà ni Élíhù dáhùn, ó sì wí pé:

²“Ẹ̀yin ọlọ́gbọ́n ẹ gbọ́ ọ̀rọ̀ mi, kí ẹ sì fi etí sílẹ̀ sí mi ẹ̀yin tí ẹ ní ìmòye.

³Nítorí pé etí a máa dán ọ̀rọ̀ wò, bí adùn ẹnu ti ń tọ́ oúnjẹ wò.

⁴Ẹ jẹ́ kí a ṣà ẹ̀tọ́ yàn fún ara wa; ẹ jẹ́ kí a mọ ohun tí ó dára láàrin wa.

⁵“Nítorí pé Jóòbù wí pé, ‘Aláìlẹ́sẹ̀ ni èmi; Ọlọ́run sì ti gba ìdájọ́ mi lọ.

⁶Èmi ha purọ́ sí ẹ̀tọ́ mi bí, bí mo tilẹ̀ jẹ́ aláìjẹ̀bi, ọfà rẹ̀ kò ní àwòtán dídì ọgbẹ́.’

⁷Ọkùnrin wo ni ó dàbí Jóòbù, tí ń mu ẹ̀gàn bí ẹní mú omi?

⁸Tí ń bá àwọn oníṣẹ́ ẹ̀ṣẹ̀ kẹ́gbẹ́ tí ó sì ń bá àwọn ènìyàn búburú rìn.

⁹Nítorí ó sá ti wí pé, ‘Èrè kan kò sí fún ènìyàn, tí yóò fí máa ṣe inú dídùn sí Ọlọ́run.’

¹⁰“Ǹjẹ́ nítorí náà, ẹ fetí sílẹ̀ sí mi ẹ fi etí sí mi ẹ̀yin ènìyàn amòye: Ódodi fún Ọlọ́run ti ìbá fi hùwà búburú àti fún Olódùmárè, tí yóò fí ṣe àìṣedéédéé!

¹¹Nítorí pé ó ń sá fún ènìyàn fún ohun tí a bá ṣe, yóò sì mú olúkúlùkù kí ó rí gẹ́gẹ́ bí ipa ọ̀nà rẹ̀.

¹²Nítòótọ́ Ọlọ́run kì yóò hùwàkúwà; bẹ́ẹ̀ ni Olódùmarè kì yóò yí ìdájọ́ po.

¹³Ta ni ó yàn ań lórí, tàbí ta ni ó fi gbogbo ayé lée lọ́wọ́?

¹⁴Bí ó bá gbé ayé rẹ̀ lé kìkì ara rẹ̀ tí ó sì gba ọkàn rẹ̀ àti ẹ̀mí rẹ̀ sọ́dọ̀ ara rẹ̀,

¹⁵gbogbo ènìyàn ni yóò parun pọ̀, ènìyàn a sì tún padà di erùpẹ̀.

¹⁶“Ǹjẹ́ nisinsìnyí, bí ìwọ bá ní òye, gbọ́ èyí; fetísí ohùn ẹnu mi.

¹⁷Ẹni tí ó kóríra òtítọ́ ha le iṣe olórí bí? Ìwọ ó hà sì dá olóótọ́ àti ẹni ńlá lẹ́bi?

¹⁸O ha tọ́ láti wí fún ọba pé, ènìyàn búburú ní ìwọ, tàbí fún àwọn ọmọ aládé pé, ìkà ni ẹ̀yin;

¹⁹Ańbọ̀tórí fún ẹni tí kì í ṣójúṣàájú àwọn ọmọ-aládé tàbí tí kò kà ọlọ́rọ̀ sí talákà lọ. Nítorí pé iṣẹ́ ọwọ́ rẹ̀ ni gbogbo wọn í ṣe?

²⁰Ní ìṣẹ́jú kán ni wọn ó kú, láàrin ọ̀gànjọ́ àwọn ènìyàn á sì di yíyọ́, wọn a sì kọjá lọ; A sì mú àwọn alágbára kúrò láìsí ọwọ́ ènìyàn níbẹ̀.

²¹“Nítorí pé ojú rẹ̀ ń bẹ ní ipa-ọ̀nà ènìyàn, òun sì rí ìrìn rẹ̀ gbogbo.

²²Kò sí ibi òkùnkùn, tàbí ojìjì ikú, níbi tí àwọn oníṣẹ́ ẹ̀ṣẹ̀ yóò gbé sá pamọ́ sí.

²³Nítorí pé òun kò pẹ́ àti kíyèsí ẹnìkan, kí òun kí ó sì mú lọ sínú ìdájọ́ níwájú Ọlọ́run.

²⁴Òun ó sì fọ́ àwọn alágbára túútúú láìní ìwádìí, a sì fi ẹlòmìíràn dípò wọn,

²⁵nítorí pé ó mọ iṣẹ́ wọn, ó sì yí wọn po ní òru; bẹ́ẹ̀ ni wọ́n di ìtẹ́rẹ́ pọ̀.

²⁶Ó kọlù wọ́n nítorí ìwà búburú wọn níbi tí àwọn ẹlòmìíràn rí i,

²⁷nítorí pé wọ́n padà sẹ́yìndà sí i, wọn kò sì fi yè sí ipa ọ̀nà rẹ̀ gbogbo,

²⁸kí wọn kí ó sì mú igbe ẹkún àwọn tálákà lọ dé ọ̀dọ̀ rẹ̀, òun sì gbọ́ igbe ẹkún aláìní

²⁹ṣùgbọ́n nígbà tí ó bá dákẹ́ síbẹ̀, ta ni yóò dá lẹ́bi? Nígbà tí ó bá pa ojú rẹ̀ mọ́, ta ni yóò lè rí i? Bẹ́ẹ̀ ni ó ṣe é orilẹ̀ èdè tàbi sí ènìyàn kan ṣoṣo;

³⁰Kí àgàbàgebè kí ó má báà jọba kí wọn kí ó má di ìdẹ̀wò fún ènìyàn.

³¹“Nítorí pé ẹnìkan ha lè wí fún Ọlọ́run pé, èmi jẹ̀bí; èmi kò sì ní ṣẹ̀ mọ́?

³²Èyí tí èmi kò rí ìwọ fi kọ́ mi bi mo bá sì dẹ́sẹ̀ èmi kì yóò ṣe bẹ́ẹ̀ mọ́.

³³Íṣe bí ti inú rẹ̀ pe òun ó san ẹ̀ṣẹ̀ padà? Ǹjẹ́ òun yóò san án padà bí ìwọ bá kọ̀ ọ́ láti jẹ́wọ́ tàbí ìwọ ìbá fẹ́ kì í ṣe èmi; Pẹ̀lúpẹ̀lú ohun tí ìwọ mọ̀, sọ ọ!

³⁴“Àwọn ènìyàn amòye yóò wí fún mi, àti pẹ̀lúpẹ̀lú ẹnikẹ́ni tí í ṣe ọlọ́gbọ́n tí ó sì gbọ́ mi pé,

³⁵‘Jóòbù ti fi àìmọ̀ sọ̀rọ̀, ọ̀rọ̀ rẹ̀ sì ṣe aláìgbọ́n.’

³⁶Ìfẹ́ mi ni kí a dán Jóòbù wò dé òpin, nítorí ìdahùn rẹ̀ dà bí i ti ènìyàn búburú:

³⁷Nítorí pe ó fi ìṣọ̀tẹ̀ kún ẹ̀ṣẹ̀ rẹ̀; ó pàtẹ́wọ́ ní àárin wa, ó sì sọ ọ̀rọ̀ di púpọ̀ sí Ọlọ́run.”