Read Bíbélì Mímọ́ ní Èdè Yorùbá Òde-Òní Ìwé Jóòbù 38 Bible Online

Ìwé Jóòbù 38 - Bíbélì Mímọ́ ní Èdè Yorùbá Òde-Òní bible

Ìwé Jóòbù 38

¹Ígbà náà ní OLÚWA dá Jóòbù lóhùn láti inú ìjì àjàyíká wá, ó sì wí pé:

²“Ta ni èyí tí ń fi ọ̀rọ̀ àìní ìgbirò ṣu ìmọ̀ ní òkùnkùn?

³Di ẹ̀gbẹ́ ara rẹ ní àmùrè bí ọkùnrin nísinsin yìí, nítorí pé èmi yóò béèrè lọ́wọ́ rẹ kí o sì dámi lóhùn.

⁴“Níbo ni ìwọ wà nígbà ti mo fi ìpìnlẹ̀ ayé sọlẹ̀? Wí bí ìwọ bá mòye.

⁵Ta ni ó fi ìwọ̀ rẹ lélẹ̀, dájú bí ìwọ bá mọ̀ ọ́n? Tàbí ta ni ó ta okùn wíwọ̀n sórí rẹ?

⁶Lórí ibo ni a gbé kan ìpìnlẹ̀ rẹ̀ mọ́, tàbí ta ni ó fi òkúta igun rẹ̀ lélẹ̀,

⁷Nígbà náà àwọn ìràwọ̀ òwúrọ̀ jùmọ̀ Kọrin pọ̀, tí gbogbo àwọn áńgẹ́lì hó ìhó ayọ̀?

⁸“Tàbí ta ni ó fi ìlẹ̀kùn sé omi òkun mọ́, nígbà tí ó ya padà bí ẹni pé ó ti inú jáde wá,

⁹Nígbà tí mo fi àwọ sánmọ̀ ṣe aṣọ rẹ̀, tí mo sì fi òkùnkùn biribiri se ọ̀já ìgbà nú rẹ̀,

¹⁰Nígbà tí mo ṣe òpin fún-un, tí mo sì se bèbè àti ìlẹ̀kùn,

¹¹Tí mo sì wí pé níhìn-ín ni ìwọ ó dé, kí o má sì rékọjá, níhìn-ín sì ni ìgbéraga rẹ yóò gbé dúró mọ?

¹²“Ìwọ pàṣẹ fún òwúrọ̀ láti ìgbà ọjọ́ rẹ̀ wá ìwọ sì mú ìlà oòrùn mọ ipò rẹ̀,

¹³Kí ó lè di òpin ilẹ̀ ayé mú, ki a lè gbọ́n àwọn ènìyàn búburú kúrò nínú rẹ̀?

¹⁴Kí ó yí padà bí amọ̀ fún èdìdì amọ̀, kí gbogbo rẹ̀ kí ó sì fi ara rẹ̀ hàn bí ẹni pé nínú aṣọ ìgúnwà.

¹⁵A sì fa ìmọ́lẹ̀ wọn sẹ́yìn kúrò lọ́dọ̀ ènìyàn búburú, apá gíga yóò sì ṣẹ́.

¹⁶“Ìwọ ha wọ inú ìsun òkun lọ rí bí? Ìwọ sì rìn lórí ìsàlẹ̀ ibú ńlá?

¹⁷A ha sílẹ̀kùn ikú sílẹ̀ fún ọ rí bí, ìwọ sì rí ilẹ̀kùn òjìji òkú?

¹⁸Ìwọ mòye ibú ayé bí? Sọ bí ìwọ bá mọ gbogbo èyí.

¹⁹“Ọ̀nà wo ni ìmọ́lẹ̀ ń gbé? Bí ó ṣe ti òkùnkùn, níbo ni ipò rẹ̀,

²⁰Tí ìwọ í fi mú un lọ síbi àlá rẹ̀, tí ìwọ ó sì le mọ ipa ọ̀nà lọ sínú ilé rẹ̀?

²¹Ìwọ mọ èyí, nitorí nígbà náà ni a bí ọ? Iye ọjọ́ rẹ sì pọ̀.

²²“Ìwọ ha wọ inú ìṣúra ìdì Sínóò lọ rí bí, kìwọ sì rí ilé ìṣúrà òjò rí,

²³Tí mo ti fi pamọ́ de ìgbà ìyọnu, dé ọjọ́ ogun àti ìjà?

²⁴Ọ̀nà wo ǹi ó lọ sí ibi tí ìmọ́lẹ̀ fi ń ya, tí afẹ́fẹ́ ìlà oòrùn ń tàn káàkiri lórí ilẹ̀ ayé?

²⁵Ta ni ó la ipadò fún ẹkun omi, àti ọ̀nà fún mọ̀nàmọ́ná àrá,

²⁶Láti mú u rọ̀jò sórí ayé níbi tí ènìyàn kò sí, ní ihà níbi tí ènìyàn kò sí;

²⁷Láti tẹ́ ilẹ̀ tútù, aṣálẹ̀ àti ẹgàn lọ́rùn láti mú àṣẹ̀ṣẹ̀yọ ewéko rú jáde?

²⁸Òjò ha ní baba bí? Tàbí ta ni o bí ikùn ìṣẹ ìrì?

²⁹Láti inú ta ni ìdì omi ti jáde wá? Ta ni ó bí ìrì dídì ọ̀run?

³⁰Omi di lile bí òkúta, ojú ibú ńlá sì dìlù pọ̀.

³¹“Ìwọ ha le fi ọ̀já de àwọn ìràwọ̀ Píléyádè dáradára? Tàbí ìwọ le tún di Ìràwọ̀ Óríónù?

³²Ìwọ le mú àwọn àmì méjìlá ìràwọ̀ Másárótì jáde wá nígbà àkókò wọn? Tàbí ìwọ le ṣe amọ̀nà Béárì pẹ̀lú àwọn ọmọ rẹ̀?

³³Ǹjẹ́ ìwọ mọ ìlànà ọ̀run? Ìwọ le fi ìjọba Ọlọ́run lélẹ̀ lórí ayé?

³⁴“Ìwọ le gbé ohùn rẹ sókè dé àwọ̀sánmọ̀, kí ọ̀pọ̀lọpọ̀ omi kí ó lè bò ọ́?

³⁵Ìwọ le rán mọ̀nàmọ́ná kí wọn kí ó le lọ, ní ọ̀nà wọn kí wọn kí ó sì wí fún wọn pé, àwa nìyí?

³⁶Ta ni ó fi ọgbọ́n pamọ́ sí ayé tàbí tí ó fi òye sínú ọkàn?

³⁷Ta ni ó fi ọgbọ́n ka iye àwọ̀ sánmọ̀? Ta ni ó sì mú ìgò ọ̀run dà jáde,

³⁸Nígbà tí erupẹ̀ di líle, àti ògúlùtú dípò?

³⁹“Ìwọ ha dẹ ọdẹ fún abo kìnnìún bí? Ìwọ ó sì tẹ ebi ẹgbọ̀rọ̀ kìnnìún lọ́rùn,

⁴⁰Nígbà tí wọ́n bá ń mọ́lẹ̀ nínú ihò tí wọ́n sì ba ní ibùba de ohun ọdẹ?

⁴¹Ta ni ó ń pèsè ohun jíjẹ fún ìwọ, nígbà tí àwọn ọmọ rẹ ń ké pe Ọlọ́run, tí wọ́n sì máa ń fò kiri nítorí àìní ohun jíjẹ?