Read Bíbélì Mímọ́ ní Èdè Yorùbá Òde-Òní Ìwé Jóòbù 39 Bible Online

Ìwé Jóòbù 39 - Bíbélì Mímọ́ ní Èdè Yorùbá Òde-Òní bible

Ìwé Jóòbù 39

¹“Ìwọ mọ àkókò ìgbà tíàwọn ewúrẹ́ orí àpáta ìbímọ? Ìwọ sì lè kíyèsí ìgbà tí abo àgbọ̀nrín ń bímọ?

²Ìwọ lè ka iye òṣùpá tí wọn ń pè, ìwọ sì mọ àkókò ìgbà tí wọn ń bímọ,

³Wọ́n tẹ ara wọn ba, wọ́n bí mọ, wọ́n sì mú ìkáànú wọn jáde.

⁴Àwọn ọmọ wọn rí dáradára, wọ́n dàgbà nínú ọ̀dàn; wọ́n jáde lọ, wọn kò sì tún padà wá sọ́dọ̀ wọn.

⁵“Ta ni ó jọ̀wọ́ kẹ́tẹ́kẹ́tẹ́ oko lọ́wọ́? Tàbí ta ní ó tú ìdè kẹ́tẹ́kẹ́tẹ́ ìgbẹ́,

⁶Èyí tí mo fi ihà ṣe ilé fún, àti ilẹ̀ iyọ̀ ní ibùgbé rẹ̀

⁷Ó rẹ́rìnín sí ariwo ìlú, bẹ́ẹ̀ ni Òun kò sì gbọ́ igbe darandaran.

⁸Orí àtòlé òkè ńlá ni ibùjókòó rẹ̀, Òun asì má a wá ewé tútù gbogbo rí.

⁹“Àgbáǹréré ha jẹ́ sìn ọ́ bí? Tàbí, ó jẹ́ dúró ní ibùjẹ ẹran rẹ ní òru?

¹⁰Ìwọ le fi òkò tata de àgbáǹréré nínú aporo? Tàbí ó jẹ́ máa fa ìtulẹ̀ nínú aporo oko tọ̀ ọ́ lẹ́yìn?

¹¹Ìwọ ó gbẹ́kẹ̀ lée nítorí agbára rẹ̀ pọ̀ ìwọ ó sì fi iṣẹ́ rẹ lé e lọ́wọ́?

¹²Ìwọ le gbẹ́kẹ̀ le pé, yóò mú èso oko rẹ̀ wá sílé, àti pé yóò sì kó ọ jọ sínu àká rẹ?

¹³“Ìyẹ́ abo ògòǹgò ń fi ayọ̀ fì; Ṣùgbọ́n a kò le fi àká we ara wọn ní ìyẹ́ àti ìhùhù

¹⁴Ó yé ẹ̀yìn rẹ̀ sílẹ̀ lórí ilẹ̀, a sì mú wọn gbóná nínú ekuru;

¹⁵Tí ó sì gbàgbé pé, ẹ̀sẹ̀ lè tẹ̀ wọ́n fọ́, tàbí pé ẹranko ìgbẹ́ lè tẹ̀ wọ́n fọ́.

¹⁶Kò ní àánú sí àwọn ọmọ rẹ̀ bí ẹni pé wọn kì í ṣe tirẹ̀; asán ni iṣẹ́ rẹ̀, láì ní ìbẹ̀rù;

¹⁷Nítorí pé Ọlọ́run kò fún-un ní ọgbọ́n, bẹ́ẹ̀ ni kò sì fi ìpín òye fún un.

¹⁸Nígbà tí ó gbé ara sókè, ó gan ẹṣin àti ẹlẹ́ṣin.

¹⁹“Ìwọ ni ó fi agbára fún ẹṣin bí? tàbí ṣé Ìwọ ni ó fi gọ̀gọ̀ wọ ọrùn rẹ̀ ní aṣọ?

²⁰Ìwọ le mú fò sókè bí ẹlẹ́ǹgà? Ògo èémí imú rẹ ní ẹ̀rù ńlá;

²¹Ó fi ẹsẹ̀ halẹ̀ nínú àfonífojì, ó sì yọ̀ sí agbára rẹ̀; ó lọ jáde láti pàdé àwọn ìhámọ́ra ogun.

²²Ó fi ojú kékeré wo ẹ̀rù, àyà kò sì fòó; bẹ́ẹ̀ ni kì í sì í padà ṣẹ́yìn kúrò lọ́wọ́ idà.

²³Lọ́dọ̀ rẹ ni apó-ọfà ń mì pẹ́kẹ́pẹ́kẹ́, àti ọ̀kọ̀ dídán àti àpáta.

²⁴Ó fi kíkorò ojú àti ìbínú ńlá gbé ilẹ̀ mì, bẹ́ẹ̀ ni òun kò sì gbàá gbọ́ pé, ìró ipè ni.

²⁵Ó wí nígbà ìpè pé, Háà! Háà! Ó sì gbóhùn ogun lókè réré, ara àwọn balógun àti ariwo ogun wọn.

²⁶“Àwòdì ha máa ti ipa ọgbọ́n rẹ̀ fò sókè tí ó sì mọ ìyẹ́ apá rẹ̀ sí ìhà gúsù?

²⁷Idì ha máa fi àṣẹ rẹ̀ fò sókè kí ó sì lọ tẹ́ ìtẹ́ rẹ̀ sí òkè gíga?

²⁸Ó ń gbé, ó sì ń wò ní orí àpáta, lórí pàlàpálá òkúta àti ibi orí òkè.

²⁹Láti ibẹ̀ lọ ni ó ti ń wá oúnjẹ́ kiri, ojú rẹ̀ sì ríran rí òkè réré.

³⁰Àwọn ọmọ rẹ̀ pẹ̀lú a máa mu ẹ̀jẹ̀, níbi tí òkú bá gbé wà, níbẹ̀ ni òun wà pẹ̀lú.”