Read Bíbélì Mímọ́ ní Èdè Yorùbá Òde-Òní Ìwé Jóòbù 40 Bible Online

Ìwé Jóòbù 40 - Bíbélì Mímọ́ ní Èdè Yorùbá Òde-Òní bible

Ìwé Jóòbù 40

¹OLÚWA dá Jóòbù lóhùn sí pẹ̀lú, ó sì wi pé:

²“ẹni tí ń wá ẹ̀sùn yóò bá Olódùmarè wíjọ́ bí? Ẹni tí ń bá Ọlọ́run jiyàn jẹ́ kí ó dáhùn!”

³Nígbà náà ni Jóòbù dá OLÚWA lóhùn wá ó sì wí pé,

⁴“Kíyèsí i, èmi kò jámọ́ ohun kankan; ohun kí ni èmi ó dà? Èmi ó fi ọwọ́ le ẹnu mi.

⁵Ẹ̀ẹ̀kan ní mo sọ̀rọ̀, ṣùgbọ́n èmi kò rí ìdáhùn kankan; lẹ́ẹ̀kejì ni, èmi kò sì ní sọ ọ́ mọ́.”

⁶Nígbà náà ní OLÚWA sọ̀rọ̀ fún un láti inú ìjì àjàyíká wá, ó sì wí pé:

⁷“Di àmùrè gíri ní ẹgbẹ́ rẹ, èmi ó bi ọ léèrè, kí ìwọ kí ó sì dá mi lóhùn.

⁸“Ìwọ ha fẹ́ mú ìdájọ́ mi di asán? Ìwọ ó sì dá mi lẹ́bi, kí ìwọ lè ṣe olódodo

⁹Ìwọ ni apá bí Ọlọ́run tàbí ìwọ lè fi ohùn sán àrá bí òun?

¹⁰Fi ọlá ńlá àti ọlá ìtayọ rẹ̀ ṣe ara rẹ ní ọ̀ṣọ́, tí ó sì fi ògo àti títóbi ọ̀ṣọ́ bi ara ní aṣọ.

¹¹Mú ìrúnu ìbínú rẹ jáde; kíyèsí gbogbo ìwà ìgbéraga rẹ kí o sì rẹ̀ ẹ́ sílẹ̀

¹²Wo gbogbo ìwà ìgbéraga, ènìyàn kí o sì rẹ ẹ sílẹ̀, kí o sì tẹ ènìyàn búburú mọ́lẹ̀ ní ipò wọn.

¹³Sin gbogbo wọn pa pọ̀ nínú erùpẹ̀, kí o sì di ojú ìkọ̀kọ̀ wọn ní isà òkú

¹⁴Nígbà náà ní èmi ó yàn ọ́ pé, ọwọ́ ọ̀tún ara rẹ lè gbà ọ́ là.

¹⁵“Ǹjẹ́ nísinsìnyí kíyèsí Béhámótì tí mo dá pẹ̀lú rẹ: òun ha máa jẹ koríko bí ọ̀dá màlúù.

¹⁶Wò o nísinsìnyí, agbára rẹ wà ní ẹ̀gbẹ́ rẹ, àti ipa rẹ nínú ìṣàn ìkún rẹ.

¹⁷Òun a máa jù ìru rẹ̀ bí i igi kédarì; Isan itan rẹ̀ dijọ pọ̀.

¹⁸Egungun rẹ̀ ní ògùsọ̀ idẹ; Egungun rẹ̀ dàbí ọ̀pá irin.

¹⁹Òun ni olórí nínú àwọn iṣẹ́ Ọlọ́run; ṣíbẹ̀ Ẹlẹ́dàá rẹ̀ fi idà rẹ̀ lé e lọ́wọ́.

²⁰Nítòótọ́ òkè ńláńlá ní imu ohun jíjẹ fún un wá, níbi tí gbogbo ẹranko ìgbẹ́ máa siré ní ẹ̀gbẹ́ ibẹ̀

²¹Ó dùbúlẹ̀ lábẹ́ igi lótósì, lábẹ́ èèsún àti ẹrẹ̀.

²²Igi lótósì síji wọn bò o; igi àrọ̀rọ̀ odò yí i kákiri.

²³Kíyèsí i, odò ńlá sàn jọjọ, òun kò sálọ; ó wà láìléwu bí ó bá ṣe pé odò Jọ́rdánì ti ṣàn lọ sí ẹnu rẹ̀.

²⁴Ẹnìkan ha lè ímú u ní ojú rẹ̀, tàbí a máa fi ọ̀kọ̀ gún imú rẹ̀?