Read Bíbélì Mímọ́ ní Èdè Yorùbá Òde-Òní Ìwé Jóòbù 6 Bible Online

Ìwé Jóòbù 6 - Bíbélì Mímọ́ ní Èdè Yorùbá Òde-Òní bible

Ìwé Jóòbù 6

¹Jóòbù sì dáhùn ó si wí pé:

²“Áà! à bá lè wọ̀n ìbìnújẹ́ mi nínú òṣùwọ̀n, kí a sì le gbé ọ̀fọ̀ mi lé orí òṣùwọ̀n ṣọ̀kan pọ̀!

³Ǹjẹ́ nísinsìn yìí, ìbá wúwo jú iyánrìn òkun lọ: nítorí náà ni ọ̀rọ̀ mi ṣe ń tàsé

⁴Nítorí pé ọfà Olódùmárè wọ̀ mi nínú, oró èyí tí ọkàn mi mú; ìpayà-ẹ̀rù Ọlọ́run dúró tì mí.

⁵Ǹjẹ́ kẹ́tẹ́kẹ́tẹ́ ìgbẹ́ á máa dún nígbà tí ó bá ní koríko, tàbí ọ̀dá-màlúù a máa dún sórí ìjẹ rẹ̀?

⁶A ha lè jẹ ohun tí kò ní adùn ní àìní iyọ̀, tàbi adùn ha wà nínú fúnfún eyin?

⁷Ohun ti ọ̀kan mi kọ̀ láti tọ́wò, òun ni ó dàbí oúnjẹ mi tí kò ní adùn.

⁸“Áà! èmi ìbá lè rí ìbéèrè mi gbà; àti pé, kí Ọlọ́run lè fi ohun tí èmi ṣàfẹ́rí fún mi.

⁹Àní Ọlọ́rin ìbá jẹ́ pa mí run, tí òun ì bá jẹ́ siwọ́ rẹ̀ kì ó sì ké mi kúrò.

¹⁰Nígbà náà ní èmi ì bá ní ìtùnú síbẹ̀, àní èmi ì bá mú ọkàn mi le nínú ìbànújẹ́ mi ti kò dá ni sí: nítorí èmi kò fi ọ̀rọ̀ ẹni mímọ́ ni sin rí.

¹¹“Kí ní agbára mi tí èmi ó fi retí? Kí sì ní òpin mi tí èmi ó fi ní sùúrù?

¹²Agbára mi iṣe agbára òkúta bí, tàbí ẹran ara iṣe idẹ?

¹³Ìrànlọ́wọ́ mi kò ha wà nínú mi: ọgbọ́n ha ti sálọ kúrò lọ́dọ̀ mi bí?

¹⁴“Ẹni tí àyà rẹ̀ yọ́ dànù, ta ni a bá máa ṣàánú fún láti ọ̀dọ̀ ọ̀rẹ́ rẹ̀ wá, kí ó má ba à kọ ìbẹ̀rù Olódumáarè sílẹ̀?

¹⁵Àwọn ará mi ṣọ̀tẹ̀ bí odò sólo bí ìṣàn gúru omi odò sólo, wọ́n ṣàn kọjá lọ.

¹⁶Tí ó dúdú nítorí omi dídì, àti níbi tí odò dídì gbé lùmọ̀ sí.

¹⁷Nígbà kúgbà tí wọ́n bá gbóná wọn a sì yọ́ ṣànlọ, nígbà tí òòrùn bá mú, wọn a sì gbẹ kúrò ni ipò wọn.

¹⁸Ìyà ọ̀nà wọn a sì yípadà sí apá kan, wọ́n gòkè sí ibi asán, wọ́n sì run.

¹⁹Ẹgbẹ́ ogun Témà ń wòye àwọn ọwọ́ àrò Sébà ń dúró dè wọ́n.

²⁰Wọ́n já lulẹ̀, nítorí tí wọ́n gbẹ́kẹ̀ wọn lée; wọ́n débẹ̀, wọ́n sì dààmú.

²¹Ǹjẹ́ nísinsìn yìí, ẹ̀yin dàbí wọn; ẹ̀yin rí ìrẹ̀sílẹ̀ mi àyà sì fò mí.

²²Èmi ó ha wí pé, ‘Ẹ mú ohun fún mi wá, tàbí pé ẹ fún mi ní ẹ̀bùn nínú ohun ìní yín?

²³Tàbí, ẹgbà mí lọ́wọ́ ọ̀tá ni, tàbí, ẹrà mí padà kúrò lọ́wọ́ alágbára nì.’?

²⁴“Ẹ kọ́ mi, èmi ó sì pa ẹnu mi mọ́ kí ẹ sì mú mi wòye níbi tí mo gbé ti sìnà.

²⁵Wò ó! Bí ọ̀rọ̀ òtítọ́ ti lágbára tó ṣùgbọ́n kí ni àròyé ìbàwí yín já sí?

²⁶Ẹ̀yin ṣè bí ẹ ó bá ọ̀rọ̀ àti ohùn ẹnu tí ó takú wí tí ó dà bí afẹ́fẹ́.

²⁷Àní ẹ̀yin ṣe gẹ́gẹ́ bí aláìní baba, ẹ̀yin sì da iye lé ọ̀rẹ́ yín.

²⁸“Nítorí náà, kí èyí kí ó tó fún yín. Ẹ má wò mi! Nitorí pé ó hàn gbangba pé: Ní ojú yín ni èmi kì yóò sèké.

²⁹Èmi ń bẹ̀ yín, ẹ padà, kí ó má sì ṣe jásí ẹ̀ṣẹ̀; àní, ẹ sì tún padà, àre mi ń bẹ nínú ọ̀rọ̀ yìí.

³⁰Àìṣedédé ha wà ní ahọ́n mi? Ǹjẹ́ ìtọ́wò ẹnu mi kò kúkú le mọ ohun ti ó burú jù?