Read Bíbélì Mímọ́ ní Èdè Yorùbá Òde-Òní Ìwé Jóòbù 9 Bible Online

Ìwé Jóòbù 9 - Bíbélì Mímọ́ ní Èdè Yorùbá Òde-Òní bible

Ìwé Jóòbù 9

¹Jóòbù sì dáhùn ó sì wí pé:

²“Èmi mọ̀ pe bẹ́ẹ̀ ni ní òtítọ́! Báwo ní ènìyàn yóò ha ti ṣe jẹ́ aláre níwájú Ọlọ́run?

³Bí ó bá ṣe pé yóò bá jà, òun kì yóò lè dálóhùn kan nínú ẹgbẹ̀rùn-ún ọ̀rọ̀.

⁴Ọlọ́gbọ́n nínú àwọn alágbára ní ipa ní Òún; ta ni ó ṣe agídí sí i tí ó sì gbé fún rí?

⁵Ẹni tí ó sí òkè nídìí tí wọn kò sì mọ́: tí ó taari wọn ṣubú ní ìbínú rẹ̀

⁶Tí ó mi ilẹ̀ ayé tìtì kúrò ní ipò rẹ̀, ọwọ̀n rẹ̀ sì mì tìtì

⁷Ó pàṣẹ fún oòrùn kò sì le è ràn kí ó sì dí ìmọ́lẹ̀ ìràwọ̀ mọ́.

⁸Òun nìkanṣoṣo ni ó na ojú ọ̀run lọ, ti ó sì ń rìn lórí ìgbì òkun.

⁹Ẹni tí ó dá ìràwọ̀ Béárì, Óríónì àti Píléíádè àti yàrá púpọ̀ ti gúsù.

¹⁰Ẹni tí ń ṣe ohun tí ó tóbi jù àwàrí lọ, àní ohun ìyanu láìní iye.

¹¹Kíyèsí i, ó ń kọjá lọ ní ẹ̀bá ọ̀dọ̀ mi, èmi kò sì rí i, ó sì kọjá síwáju, bẹ́ẹ̀ ni èmi kò rí ojú rẹ̀.

¹²Kiyèsí i, ó já a gbà lọ, ta ni ó lè fà á padà? Ta ni yóò bi í pé kí ni ìwọ ń ṣe nì?

¹³Ọlọ́run kò ní fa ìbínú rẹ̀ sẹ́yìn, àwọn oní rànlọ́wọ́ ti Ráhábù a sì tẹriba lábẹ́ rẹ̀.

¹⁴“Kí ní ṣe tí èmi ò fi dá a lóhùn? Tí èmi kò fi máa fi ọ̀rọ̀ àwàwí mi ṣe àwsíyé fún-un?

¹⁵Bí ó tilẹ̀ ṣe pé mo ṣe aláìlẹ́bi, èmi kò gbọdọ̀ dá a lóhùn, ṣùgbọ́n èmi ó gbàdúrà fún àánú.

¹⁶Bí èmi bá sì ké pè é, tí Òun sì dá mi lóhùn, èmi kì yóò sì gbàgbọ́ pé, Òun ti fetí sí ohùn mi.

¹⁷Nítorí pé òun yóò lọ̀ mi lúúlúú pẹ̀lú ìjì ńlá ó sọ ọgbẹ́ mi di pupọ̀ láìnídìí.

¹⁸Òun kì yóò jẹ́ kí èmi kí ó rí ẹ̀mí mi, ṣùgbọ́n ó mú ohun kíkorò kún un fún mi.

¹⁹Bí mo bá sọ ti agbára, wò ó! Alágbára ni, tàbí ńi ti ìdájọ́, ta ni yóò dá àkókò fún mi láti rò?

²⁰Bí mo tilẹ̀ dá ara mi láre, ẹnu ara mi óò dá mi lẹ́bi; bí mo wí pé olódodo ni èmi yóò sì fi mí hàn ní ẹni ẹ̀bi.

²¹“Olóòótọ́ ni mo ṣe, síbẹ̀ èmi kò kíyèsí ara mi, ayé mi ní èmi ìbá máa gàn.

²²Ohùn kan náà ni, nítorí náà ni èmi se sọ: ‘Òun a pa ẹni òtítọ́ àti ènìyàn búburú pẹ̀lú.’

²³Bí ìjàǹbá bá pani lójijì, yóò rẹ́rín-ín ìdàwọ́ aláìṣẹ̀.

²⁴Nígbà tí a bá fi ayé lé ọwọ́ ènìyàn búburú; ó sì bo àwọn onídàájọ́ rẹ̀ lójú; bí kò bá rí bẹ́ẹ̀ ǹjẹ́ ta ni?

²⁵“Ǹjẹ́ nísinsìn yìí ọjọ́ mi yára ju oníṣẹ́ lọ, wọ́n fò lọ, wọn kò rí ayọ̀.

²⁶Wọ́n kọjá lọ bí ọkọ̀ eésú tí ń ṣúré lọ; bí idì tí ń yára si ohùn ọdẹ.

²⁷Bí èmi bá wí pé, ‘Èmi ó gbàgbé arò ìbìnújẹ́ mi, èmi ó fi ọkàn lélẹ̀, èmi ó sì rẹ ara mi lẹ́kún.’

²⁸Ẹ̀rù ìbànújẹ́ mi gbogbo bà mí, èmi mọ̀ pé ìwọ kì yóò mú mi bí aláìṣẹ̀.

²⁹Bí ó bá ṣe pé ènìyàn búburú ni èmi, ǹjẹ́ kí ni èmi ń ṣe làálàá lásán sí?

³⁰Bí mo tilẹ̀ fi ọṣẹ ojú dídì wẹ ara mi, tí mo fi omi àrò wẹ ọwọ́ mi mọ́,

³¹ṣíbẹ̀ ìwọ ó gbé mi wọ inú ihò ọ̀gọ̀dọ̀ aṣọ ara mi yóò sọ mi di ìríra.

³²“Nítorí Òun kì í ṣe ènìyàn bí èmi, tí èmi ó fi dá a lóhùn tí àwa o fi pàdé ní ìdájọ́.

³³Bẹ́ẹ̀ ni kò sí alátúnṣe kan ní agbede-méjì wa tí ìbá fi ọwọ́ rẹ̀ lé àwa méjèèjì lára.

³⁴Kí ẹnìkan ṣá à mú ọ̀pá Ọlọ́run kúrò lára mi, kí ìbẹ̀rù rẹ̀ kí ó má sì se dáyà fò mí

³⁵Nígbà náà ni èmi ìbá sọ̀rọ̀, èmi kì bá sì bẹ̀rù rẹ̀; ṣùgbọ́n bí ó tí dáré-ti mi, kò ri bẹ́ẹ̀ fún mi.