Read Bíbélì Mímọ́ ní Èdè Yorùbá Òde-Òní Ìwé Sáàmù 102 Bible Online

Ìwé Sáàmù 102 - Bíbélì Mímọ́ ní Èdè Yorùbá Òde-Òní bible

Ìwé Sáàmù 102

¹Gbọ́ àdúrà mi, OLÚWA: Jẹ́ kí igbe ẹ̀bẹ̀ mi kí ó wá sí ọ̀dọ̀ Rẹ

²Má ṣe pa ojú Rẹ mọ́ kúrò lọ́dọ̀ mi ní ọjọ́ tí èmi wà nínú ìpọ́njú. Dẹ etí Rẹ sí mi; nígbà tí mo bá pè, dámi lóhùn kíákíá.

³Nítorí tí ọjọ́ rú bí èéfin; egungun mi sì jóná bí ààrò

⁴Àyà mi lù, ó sì rọ bí i koríko; mo gbàgbé láti jẹ oúnjẹ mi.

⁵Nítorí ohùn ìkérora mi, egungun mi lẹ̀ mọ́ ẹran ara mi.

⁶Èmi dà bí ẹyẹ igún ni ijù: èmi dàbí òwìwí ibi ahoro.

⁷Èmi dìde; èmí dàbí ẹyẹ lórí ilé.

⁸Ní ọjọ́ gbogbo àwọn ọ̀ta ológosẹ́ mi ń gàn mí; àwọn tí ń ṣe ìkanra sí mi ń fi orúkọ mi bú.

⁹Èmi jẹ eérú gẹ́gẹ́ bí oúnjẹ mi, èmi si da ohun mímu mi pọ̀ pẹ̀lú omíjé.

¹⁰Nítorí ìbínú ríru Rẹ, nítorí ìwọ ti gbé mi sókè, ìwọ sì gbé mi ṣánlẹ̀.

¹¹Ọjọ́ mi dàbí òjìji àṣálẹ́ èmi sì rọ bí koríko

¹²Ṣùgbọ́n ìwọ, OLÚWA, ni yóò dúró láéláé; ìrántí Rẹ láti ìran dé ìran.

¹³Ìwọ ó dìde ìwọ o sì ṣàánú fún Síónì, nítorí ìgbà àti ṣe ojú rere sí i; àkókò náà ti dé.

¹⁴Nítorí tí àwọn òkúta jẹ́ inú dídùn sí àwọn ìránṣẹ́ Rẹ; wọ́n sì káànú ẹrùpẹ̀ Rẹ.

¹⁵Àwọn ayé yóò bẹ̀rù orúkọ OLÚWA, gbogbo ọba ayé yóò máa bẹ̀rù ògo Rẹ.

¹⁶Torí tí OLÚWA yóò gbé Síónì ró, yóò farahàn nínú ògo Rẹ̀.

¹⁷Yóò dáhùn àdúrà àwọn aláìní; kì yóò si gan ẹ̀bẹ̀ wọn.

¹⁸Jẹ́ kí a kọ èyí fún ìran tí ń bọ̀, àwọn ènìyàn tí a kò tí ì dá yóò yin OLÚWA:

¹⁹“OLÚWA wo ilẹ̀ láti òkè mímọ́ Rẹ̀ wá láti ọ̀run wá ni ó bojúwo ayé,

²⁰Láti gbọ́ ìrora ará túbú, lati tú àwọn tí a yàn sí ikú sílẹ̀.”

²¹Kí a lè sọ orúkọ OLÚWA ni Síónì àti ìyìn Rẹ̀ ní Jérúsálẹ́mù.

²²Ní ìgbà tí a kó àwọn ènìyàn àti ìjọba pọ̀ láti máa sìn OLÚWA.

²³Ní ipa ọ̀nà mi, ó Rẹ agbára mi sílẹ̀, ó gé ọjọ́ mi kúrú.

²⁴Èmi sì wí pé; “Ọlọ́run mi, Má ṣe mú mi kúrò ní agbede-méjì ọjọ́ mi; ọdún Rẹ̀ ń lọ láti ìran dé ìran.

²⁵ Ní ìbẹ̀rẹ̀ ní ìwọ fi ìpilẹ̀ ayé sọlẹ̀, ọrun si jẹ́ iṣẹ́ ọwọ́ Rẹ.

²⁶Wọn yóò ṣègbé, wọn yóò parun, ṣùgbọ́n ìwọ yóò wà; gbogbo wọn ni yóò gbó bí aṣọ. Bí ẹ̀wù ni ìwọ yóò pààrọ̀ wọn wọn yóò sì di àpatì.

²⁷Ṣùgbọ́n ìwọ wà digbí ṣíbẹ̀, ọdún Rẹ kò sì ni òpin.

²⁸Àwọn ọmọ ìránṣẹ́ Rẹ̀ yóò dúró ní iwájú Rẹ pẹ́; a o sì fi ẹsẹ̀ irú ọmọ wọn sọlẹ̀ ní iwájú Rẹ.”