Read Bíbélì Mímọ́ ní Èdè Yorùbá Òde-Òní Ìwé Sáàmù 104 Bible Online

Ìwé Sáàmù 104 - Bíbélì Mímọ́ ní Èdè Yorùbá Òde-Òní bible

Ìwé Sáàmù 104

¹Yin OLÚWA, ìwọ ọkàn mi. OLÚWA Ọlọ́run mi, ìwọ tóbi jọjọ; ọlá àti ọlá ńláni ìwọ wọ̀ ní aṣọ.

²Ìwọ fi ìmọ́lẹ̀ bo ara Rẹ̀ gẹ́gẹ́ bí aṣọ; ó tẹ ọ̀run bí títẹ́ ẹní

³Ìwọ tí ó fi omi ṣe ìtì igi-àjà ìyẹ̀wù Rẹ. Ìwọ ti ó ṣe àwọ̀sánmọ̀ ni kẹ̀kẹ́-ogun Rẹ ìwọ tí ó ń rìn lórí àpá ìyẹ́ afẹ́fẹ́.

⁴ Ó fi ẹ̀fúùfù ṣe àwọn ìránṣẹ́ Rẹ, Ọ̀wọ́ iná ni àwọn olùránsẹ́ Rẹ.

⁵O fi ayé gúnlẹ̀ lórí àwọn ìpìlẹ̀; tí a kò le è mi láéláé.

⁶Ìwọ fi ibú omi bò ó mọ́lẹ̀ bí aṣọ; àwọn omi sì dúró lórí àwọn òkè ńlá.

⁷Ṣùgbọ́n nípa ìbáwí Rẹ ni àwọn omi lọ, nípa ohùn àrá Rẹ ni wọ́n sálọ;

⁸Wọn ṣàn kọjá lórí àwọn òkè, wọn sọ̀kalẹ̀ lọ sí àwọn pẹ̀tẹ́lẹ̀, sí ibi tí ìwọ ti yàn fún wọn.

⁹Ìwọ gbé òpin tí wọn kò le kọjá Rẹ̀ kálẹ̀; láéláé ní wọ́n kò ní lé bo ayé mọ́lẹ̀ lẹ́ẹ̀kan síi.

¹⁰Ìwọ mú kí ìsun da omi sí àwọn àfonífojì; tí ó ń ṣàn láàrin àwọn òkè.

¹¹Wọn fún gbogbo àwọn ẹranko igbó ní omi àwọn kẹ́tẹ́kẹ́tẹ́ ń pa òùngbẹ wọn.

¹²Àwọn ẹyẹ ojú òfurufu tẹ́ ìtẹ́ wọn lẹ́gbẹ̀ẹ́ omi wọn ń kọrin láàrin àwọn ẹ̀ka.

¹³Ó bú omi rìn àwọn òkè láti iyẹ̀wù Rẹ̀ wá; a tẹ́ ayé lọ́rùn nípa èṣo iṣẹ́ ọwọ́ Rẹ.

¹⁴Ó mú kí koríko hù jáde fún àwọn ẹranko láti jẹ àti àwọn ewébẹ fún ènìyàn láti lò kí ó le mú oúnjẹ jáde láti ilẹ̀ wá:

¹⁵Ọtí wáìnì tí ó ń mú ọkàn ènìyàn yọ̀, òróró láti mú ojú Rẹ̀ tan, àti àkàrà láti ra ọkàn Rẹ̀ padà.

¹⁶Àwọn igi OLÚWA ni a bomi rin dáradára, Kédárì tí Lébánónì tí ó gbìn.

¹⁷Níbẹ̀ ní àwọn ẹyẹ ṣe ìtẹ́ wọn bí ó se tí àkọ̀ ni, orí igi páìnì ni ilé Rẹ̀.

¹⁸Àwọn òkè gíga ni ààbò fún àwọn ewúrẹ́ igbó; àti àwọn àlàpà jẹ ààbò fún àwọn ehoro.

¹⁹Òsúpá jẹ àmì fún àkókò òòrùn sì mọ̀ ìgbà tí yóò wọ̀.

²⁰Ìwọ mú òkùnkùn wá, ó sì di òru, nínú èyí tí gbogbo ẹ̀ranko igbó ń rìn kiri.

²¹Kìnnìún ń bú ramúramù fún ohun ọdẹ wọn wọ́n sì ń wá oúnjẹ wọn láti ọ̀dọ̀ Ọlọ́run.

²²Òòrùn ràn, wọn sì kó ara wọn jọ, wọn padà lọ dùbúlẹ̀ sí ìhò wọn.

²³Ọkùnrin jáde lọ sí iṣẹ́ wọn, àti sí làálàá Rẹ̀ títí di àṣálẹ́.

²⁴Iṣẹ́ Rẹ ti pọ̀ tó, OLÚWA! Nínú ọgbọ́n ni ìwọ ṣe gbogbo wọn: ayé kún fún àwọn ìṣẹ̀dá a Rẹ.

²⁵Bẹ́ẹ̀ ni òkun yìí tí ó tóbi, tí ó sì ni ìbú, tí ó kún fún àwọn ẹ̀dá alààyè ní ìṣàlẹ̀ láìníye ohun alàyè tí tóbi àti kékeré.

²⁶Níbẹ̀ ni ọkọ̀ ń lọ síwá sẹ́yìn, àti Léfíàtanì, tí ìwọ dá láti ṣe àríyá nínú Rẹ̀.

²⁷Àwọn wọ̀nyí ń wò ọ́ láti fún wọn ní oúnjẹ wọn lákòókò Rẹ̀.

²⁸Nígbà tí ìwọ bá fi fún wọn, wọn yóò kó o jọ; nígbà tí ìwọ bá là ọwọ Rẹ̀, a tẹ́ wọn lọ́rùn pẹ̀lú ohun rere.

²⁹Nígbà tí ìwọ bá pa ojú Rẹ mọ́ ara kò rọ̀ wọ́n nígbà tí ìwọ bá mú ẹ̀mí wọn lọ, wọn ó kú, wọn o sì padà sí erùpẹ̀.

³⁰Nígbà tí ìwọ rán ẹ̀mí Rẹ, ní a dá wọn, ìwọ sì tún ojú ayé ṣe.

³¹Jẹ́ kí ògo OLÚWA wà pẹ́ títí láé; kí inú OLÚWA kí ó dùn ní ti iṣẹ́ Rẹ̀

³²Ẹni tí ó wo ayé, tí ó sì wárìrì, ẹni tí ó fọwọ́ tọ́ àwọn òkè, tí wọ́n yọ èéfín.

³³Ní gbogbo ayé mí ní ń ó kọrin sí OLÚWA: èmi ó kọrin ìyìn sí OLÚWA níwọ̀n ìgbà tí mo wà láàyè.

³⁴Jẹ́ kí ẹ̀kọ́ mi kí ó tẹ ọ lọ́rùn bí mo tí ń yọ̀ nínú OLÚWA.

³⁵Ṣùgbọ́n kí ẹlẹ́sẹ̀ kúrò láyé kí ènìyàn búburú má sì sí mọ́. Yin OLÚWA, ìwọ ọkàn mi. Yin OLÚWA.